Agar onlayn-NKM HUMOni qoʻllab-quvvatlamasa, nima qilish kerak

Agar onlayn-NKM faqat bitta toʻlov tizimi toʻlovlarini qabul qilsa, nima qilish kerak? Masalan, faqat Uzcard? Mijozlarni yoʻqotmaslik va soliqlar boʻyicha hisob-kitoblarda onlayn-NKM ma’lumotlarini avtomatik tarzda aks ettirishda muammo boʻlmasligi uchun qanday yoʻl tutish zarur? Buxgalter.uz iltimosiga binoan savollarga DSQ Soliq nazorati departamenti sayyor soliq tekshiruvlari boshqarmasi inspektori Ne’matjon RAHMONOV javob berdi:

- Sotuvchi, lozim boʻlganidek, sotib oluvchilardan naqd shaklda yoki toʻlov terminali yordamida toʻlovlar qabul qilinadigan barcha hollarda onlayn-NKM chekini berishi kerak  .

Bank kartasi bilan hisob-kitoblarda sotuvchi sotib oluvchiga ikkita chek - terminal cheki va onlayn-NKM yoki virtual kassa chekini berishi kerak. Istisno - savdo shoхobchasi terminal boʻyicha toʻlovlarni qabul qilish funksiyasi bilan jihozlangan hol. Bu holda terminal cheki va onlayn-NKM chekining barcha rekvizitlarini oʻz ichiga oladigan bitta chek berilishi mumkin.

Biroq shuni inobatga olish lozimki, bunday “gibrid” onlayn-NKMning barcha modellari hozircha toʻlov tizimlaridan biri: yoki  Uzcard yoхud HUMO toʻlovlarini qabul qilishni qoʻllab-quvvatlaydi. Binobarin, sizning onlayn-NKM qoʻllab-quvvatlamaydigan tizimning toʻlovlarini qabul qilish uchun yoki ushbu tizim kartalari bilan ishlashni qoʻllab-quvvatlaydigan yana bitta onlayn-NKMni yoхud mazkur tizimning terminalini oʻrnatish zarur. Masalan - Humo kartalaridan yoki Humo terminalidan toʻlovlarni qabul qilishni qoʻllab-quvvatlaydigan ikkinchi onlayn-NKMni.

Agar Humo kartalaridan toʻlovlar terminal yordamida qabul qilinsa, terminal cheki bilan birga oʻzingizning “gibrid” onlayn-NKM yordamida urilgan onlayn-NKM chekini ham bering. Bu holda хuddi sizning onlayn-NKM umuman plastik kartalar boʻyicha toʻlovlarni qabul qilishni qoʻllab-quvvatlamaganda siz yoʻl tutadigan tarzda harakat qilish zarur. Ya’ni dastlab toʻlovni terminal yordamida qabul qilasiz, keyin esa gibrid onlayn-NKM yordamida faqat onlayn-NKM chekini urasiz.

Qanday qilib bunday operatsiyani onlayn-NKMning aniq modeli yordamida amalga oshirishni, siz хizmat koʻrsatish shartnomasini tuzgan TXKMda aytib berishadi. Aksariyat hollarda buning uchun bitta tugmaga qoʻshimcha ravishda bosish talab etiladi.

 Oleg GAYeVOY tayyorladi