Fevral oyida ekspertlarning materiallari siz uchun foydali boʻladi:
Bu Prezidentning 07.09.2021 yildagi “Soliq majburiyatlarini bajarishda tadbirkorlik sub’yektlariga yanada qulay shart-sharoitlar yaratish chora-tadbirlari toʻgʻrisida”gi Farmonida nazarda tutilgan. Buxgalter.uz tafsilotlarni aniqlashtirdi:
Soliq organlari tadbirkorlar uchun hisobotni qanday tayyorlaydilar
2022 yil yanvar – iyul oylarida eksperiment tariqasida Xorazm viloyati DSBda hisobda turgan soliq toʻlovchilar uchun soliq hisobotlari soliqchilar tomonidan hisoblab chiqariladi va shakllantirib beriladi:
- yuridik shaхslardan olinadigan yer soligʻi boʻyicha – Kadastr agentligi organlari ma’lumotlari asosida;
- QQS, aksiz soligʻi va aylanmadan olinadigan soliq boʻyicha – EHF, onlayn-NKT ma’lumotlari hamda soliq organlarida mavjud boshqa ma’lumotlar asosida.
Soliq organlari hisobot loyihasini soliq toʻlovchilar uchun belgilangan tegishli soliq hisobotini taqdim etish muddatidan kamida 10 kun oldin soliq toʻlovchining shaхsiy kabineti orqali yuboradi.
Soliq toʻlovchi uni olgan kundan boshlab 5 kun ichida uni tasdiqlashi yoki rad etishi, soliq hisobotini qayta ishlashi va oʻrnatilgan tartibda taqdim etishi kerak boʻladi.
2022 yil 1 avgustga qadar eksperiment natijalaridan kelib chiqqan holda quyidagilar toʻgʻrisida takliflar ishlab chiqiladi:
- eksperimentni respublikaning barcha hududlarida tatbiq etish;
- soliq organlari tomonidan soliq hisoboti shakllantiriladigan soliqlar roʻyхatini kengaytirish.
Hisobvaraq-fakturalar shakllaridagi oʻzgartirishlar
2022 yil 1 yanvarga qadar soliq toʻlovchilar QQS, aksiz soligʻi va aylanmadan olinadigan soliqni hisoblash uchun zarur boʻlgan soliq solish ob’yekti yoki soliq solish bilan bogʻliq boshqa ob’yektlarni EHFda aks ettirishlari mumkin. Demak, yil yakuniga qadar hisobvaraq-faktura shaklini yana oʻzgartirishadi.
Qanday sanksiyalar bekor qilinadi
2022 yil 1 yanvardan boshlab quyidagilar uchun moliyaviy sanksiyalar bekor qilinadi:
- kameral soliq tekshiruvi boʻyicha aniqlangan huquqbuzarliklar uchun;
- tadbirkorlik sub’yektlari tomonidan soliq hisobotini belgilangan muddatlarda taqdim etmaganlik uchun.
2021 yil 1 noyabrga qadar qonunchilik hujjatlariga oʻzgartirish va qoʻshimchalar toʻgʻrisidagi takliflar kiritiladi.
