Nazorat qilinadigan bitimlar toʻgʻrisida xabarnoma qanday topshiriladi

Soliq toʻlovchilar soliq organlarini kalendar yilda oʻzlari tuzgan nazorat qilinadigan bitimlar toʻgʻrisida xabardor qilishi shart . Ushbu xabarnomaning shaklini aynan qayerdan izlash mumkinligini buxgalter.uz iltimosiga binoan Soliq qoʻmitasida tushuntirishdi:

– Qanday bitimlar nazorat qilinadigan bitimlar jumlasiga kirishi SKning 180-181-moddalarida batafsil bayon etilgan.  Oʻzaro bogʻliq boʻlgan shaxslarning belgilari SKning 37-moddasida koʻrsatilgan.

Xabarnomaning elektron shakli 2022 yilda ishlab chiqilgan va my.soliq.uzda – “Elektron hisobot” boʻlimida, “Boshqa hisobot shakllari”da joylashtirilgan:

• “Daromadlar chet ellik shaxsga toʻlanganligi toʻgʻrisidagi va nazorat qilinadigan bitimlar toʻgʻrisidagi xabarnomalar” (shakllar paketi kodi 423).

“Nazorat qilinadigan bitimlar toʻgʻrisida xabarnoma”, shakl kodi (42302_1) 

Ushbu xabarnoma shakli quyidagi varaqlardan (axborotdan) iborat boʻlib, qoʻlda toʻldiriladi:

• Nazorat qilinadigan bitimlar toʻgʻrisida xabarnoma;
• Soliq toʻlovchi – jismoniy shaxs toʻgʻrisida ma’lumot;
• Nazorat qilinadigan bitimlar toʻgʻrisida ma’lumot (bir turdagi bitimlar guruhiga);
• Bitim predmeti (bir turdagi bitimlar guruhi) toʻgʻrisida ma’lumotlar;
• Nazorat qilinadigan bitim ishtirokchisi – yuridik shaxs toʻgʻrisida ma’lumot;
• Nazorat qilinadigan bitim ishtirokchisi – jismoniy shaxs toʻgʻrisida ma’lumot.

Bundan tashqari, 2023 yil 30 yanvarda my3.soliq.uz saytida sinov rejimida xabarnomaning yangi shakli – reyestrni Excel formatida biriktirish imkoniyati bilan joylashtirildi. Lekin uni haqiqatda faqat 14 fevralda ochishdi. Soliq qoʻmitasi mutaxassislarining tushuntirishlaricha – bu vaqt mobaynida soliq toʻlovchilarda  my.soliq.uzda 42302_1 kodi ostida joylashtirilgan shakl boʻyicha xabarnomani topshirish imkoniyati boʻlgan, xususan, koʻpchilik uni soliq organlariga taqdim etish muddatlarini buzmagan holda, buni amalga oshirishdi.