Директор алмашганда ЭРИ билан нима қилиш керак

Тавсияда:

– раҳбар ишдан бўшатилганда унинг ЭРИси билан боғлиқ ҳаракатлар;
– ишдан бўшатилган раҳбар номига расмийлаштирилган юридик шахснинг ЭРИни бекор қилиш;
– янги раҳбар номига юридик шахснинг ЭРИни олиш;
– директор ўзгарганда my.mehnat.uz сайтидаги шахсий кабинетга кириш;
– ташкилотда юридик шахснинг ЭРИдан фойдаланиш.

Ташкилотда раҳбарни алмаштириш бир қатор муаммоларни ҳал қилишни ўз ичига олади. Улардан бири «Yangi texnologiyalar» ИАМ ЭРИ калитларини рўйхатга олиш Маркази орқали собиқ раҳбар номига берилган электрон рақамли имзони қайта рўйхатдан ўтказишдир. Мазкур электрон рақамли имзолар давлат ва хўжалик бошқаруви органлари, маҳаллий давлат ҳокимияти органлари томонидан кўрсатилаётган барча турдаги электрон хизматлардан текин фойдаланиш имконини бераётгани учун муҳим аҳамиятга эга. 

Ишдан бўшатилгандан сўнг раҳбарнинг ЭРИ билан нима қилиш керак 

Собиқ раҳбар номига иккита электрон рақамли имзо берилган бўлиши мумкин – жисмоний ва юридик шахсга. Ҳар иккисидан, хусусан, my.soliq.uz, my.mehnat.uz сайтларидаги ташкилотнинг шахсий кабинетида, ЭСФ тизимида ишлаш учун фойдаланиш мумкин. Келгусида ушбу ЭРИлар ёрдамида ташкилот номидан ҳаракатларни амалга оширмаслигини таъминлаш учун тегишли чораларни кўринг.

Биринчи навбатда, my.soliq.uz сайтида раҳбарнинг ишдан бўшатилиши муносабати билан ташкилотнинг ҳисоб маълумотларини ўзгартириш тўғрисида ариза юборинг.