Konsalting xarajatlarini kapitallashtirish mumkinmi

«Korxona investitsiya loyihalari doirasida qurilish ishlarini amalga oshiradi. Toʻgʻridan-toʻgʻri xarajatlardan tashqari qurilish smetasida konsalting xarajatlari nazarda tutilgan, qurilish boʻyicha mutaxassislar ham jalb qilinadi. Pudratchi tomonidan taqdim etilgan hujjatlarga muvofiq xarajatlar 0810-schyotiga kiritiladi. Bir nechta ob’yektlar qurilmoqda.

1. Konsalting xarajatlari ob’yektning boshlangʻich narxiga kiritiladimi?

2. Agar shunday boʻlsa, bu xarajatlar turli ob’yektlar oʻrtasida qanday taqsimlanadi? Bajarilgan ishlar dalolatnomasida qurilish ishlari, qurilish smetalarini tayyorlash boʻyicha ishlar umumiy summa bilan koʻrsatilgan». 

Savollarga Iqtisodiyot va moliya vazirligi qoshidagi Oʻquv markazi direktori oʻrinbosari Sharofitdin Haydarov javob berdi:

– 1. Savolingizdan kelib chiqadiki, qurilayotgan koʻchmas mulk ob’yektlaridan tashkilotning shaxsiy ehtiyojlari uchun foydalanasiz. Bu qurilish tugagandan soʻng, agar ular tashkilotingizning hisob siyosatida belgilangan mezonlarga javob bersa, ular asosiy vositalar tarkibiga oʻtkazilishini anglatadi.

Korxonaning oʻzida tayyorlangan asosiy vositalarning boshlangʻich qiymati deb mazkur asosiy vositalarni barpo etish (qurish, qurib bitkazish) boʻyicha haqiqiy xarajatlar summasi tan olinadi.

Qurilish davrida qurilish uchun olingan kreditlar boʻyicha hisoblangan foizlar barpo etilgan asosiy vositalarning boshlangʻich qiymatiga kiritiladi .

Konsalting xarajatlari qurilish smetasiga kiritilganligi sababli ular ob’yektlarni qurish bilan bevosita bogʻliq va asosiy vositalarning boshlangʻich qiymatiga kiritiladi.

2. Agar konsalting xarajatlari bir nechta koʻchmas mulk ob’yektlariga tegishli boʻlsa, ularni ushbu ob’yektlarga taqsimlash kerak. Taqsimlash bazasini oʻzingiz mustaqil belgilashingiz va tashkilotning hisob siyosatida mustahkamlab qoʻyishingiz mumkin. Misol uchun, ushbu xarajatlarni ushbu ob’yektlar maydoniga mutanosib ravishda taqsimlash mumkin.