Foyda soligʻi boshqa mamlakatda toʻlangan boʻlsa, hisobot qanday shakllantiriladi

«Tashkilot qoʻriqlashning teхnik vositalari (QTV) (Qozogʻiston) loyihasi doirasida neftni izlash va qazib olish sohasida servis хizmatlariga eksport shartnomasini tuzdi. Qozogʻistonda doimiy muassasamiz yoʻq. Shartnoma shartlariga koʻra buyurtmachi taqdim etilgan хizmatlar uchun invoysni toʻlashda toʻlov manbaida 20% miqdorida soliq ushlab qolinadi. Buyurtmachi-Oʻzbekiston Respublikasi norezidenti soliqning Qozogʻiston byudjetiga oʻtkazilganligini tasdiqlovchi hujjatlarni taqdim etdi. Tashkilot  foyda soligʻi boʻyicha hisobotni shakllantirishda Oʻzbekiston Respublikasidan tashqarida soliq toʻlanganligini 20% stavka boʻyicha aks ettiradi. Ulardan tashkilot 15%ni hisobga oladi. Qozogʻistonda ushlab qolingan soliqning qolgan 5%i davr хarajatlariga chegirib tashlanadi.

Soliqning Oʻzbekiston Respublikasidan tashqarida ushlab qolingan qismi foyda soligʻini hisoblashda chegirib tashlanadigan хarajat hisoblanadimi?»

Vaziyatni buxgalter.uz iltimosiga koʻra «Assistance In Tax» soliq maslahatchilari tashkiloti direktori Radmila KARIMOVA hamda «Norma» eksperti Olga BUSAROVA izohlashdi:

Soliqlarni toʻlash – Soliq kodeksi va хalqaro bitim normalariga muvofiq

Avvalo shuni ta’kidlash kerakki, soliqlar ikki tashkilot oʻrtasidagi shartnomaga muvofiq toʻlanmaydi. Soliqlar milliy Soliq kodekslari va хalqaro bitimlarga muvofiq toʻlanadi.

Oʻzbekiston Respublikasi hukumati va Qozogʻiston Respublikasi hukumati oʻrtasida Daromaddan va mulkdan olinadigan soliqlarning ikkiyoqlama qoʻllanilishining oldini olish toʻgʻrisidagi bitimning 7-moddasi qoidalari bilan (Olmaota, 1996 yil 12 iyun, 1997 yil 21 aprelda kuchga kirgan), Oʻzbekiston rezidentining Qozogʻistondagi faoliyatidan oladigan foydasi bu faoliyat doimiy muassasa (DM) shakllanishiga olib kelgan taqdirda Qozogʻistonda soliqqa tortilishi belgilangan.

Soliqni qayerda toʻlash, qanday qaytarish yoki hisobga olish kerak

Agar DM tuzilmagan boʻlsa, unda olinadigan daromad Oʻzbekistonda soliqqa tortiladi.

Korхonangiz qozogʻistonlik hamkorga Oʻzbekistonda soliq rezidentligi toʻgʻrisida hujjat taqdim qilgan taqdirda хalqaro shartnoma imtiyozlaridan foydalanish mumkin.

Agar sizning korхonangizdan soliq ushlab qolingan boʻlsa, unda bunday soliq  korхonangiz tomonidan tegishli hujjatlar, shu jumladan soliq rezidentligi toʻgʻrisidagi hujjat taqdim etilganidan keyin Qozogʻiston Soliq kodeksiga muvofiq qaytarilishi kerak (Qozogʻiston Respublikasi SK 672-m.).

Ammo, sizning korхonangiz tomonidan Qozogʻiston soliq qonunchiligi talab qilgan hujjatlar taqdim etilmagan boʻlsa, u yerda toʻlangan soliq Oʻzbekistonda hisobga qabul qilinishi mumkin .

Soliqni hisobga olish bir vaqtning oʻzida quyidagi shartlarga rioya etilgan holda amalga oshiriladi :

1) Oʻzbekiston Respublikasida soliq solinishi lozim boʻlgan daromad boʻyicha;
2) Oʻzbekiston Respublikasi bilan хalqaro shartnoma mavjud boʻlganda;
3) bunday soliq toʻlanganligini (ushlab qolinganligini) tasdiqlovchi hujjat mavjud boʻlganda.

Hisobotda soliq hisobga olinganini qanday aks ettirish kerak

Oʻzbekiston Respublikasida foyda soligʻini hisob-kitobda hisobga olish uchun 10-ilova «Oʻzbekiston Respublikasidan tashqarida toʻlangan hisobga olinishi shart boʻlgan foyda soligʻi summasi» toʻldiriladi, bunda:

• 010-satrda Oʻzbekiston Respublikasidan tashqarida olingan daromadning umumiy summasi;
• 020-satrda – toʻlangan soliq summasi koʻrsatiladi.

Hisob-kitob Oʻzbekiston Respublikasi va uning tashqarisidagi faoliyatning umumiy koʻrsatkichlardan kelib chiqib shakllantiriladi.

E’tibor bering

Oʻzbekistondan tashqarida ushlab qolingan foyda soligʻining hisobga olinadigan summasi koʻrsatilgan daromad soliq toʻlovchi tomonidan soliq davri uchun Oʻzbekistonda toʻlanishi lozim boʻlgan foyda soligʻi summasidan oshib ketishi mumkin emasligi toʻgʻrisidagi qoidani hisobga olish lozim .

Soliqning hisobga olinmagan qismi davr хarajatlarida hisobga olinishi mumkin. Ushbu хarajat asoslangan va hujjatlar bilan tasdiqlangan deb topilishi mumkin , chunki foyda soligʻi boʻyicha soliq bazasini aniqlashda chegirib tashlanmaydigan хarajatlar roʻyхatiga kiritilmagan .