Nodavlat maktablar tarmogʻini rivojlantirish uchun yangi imtiyozlar beriladi

Xususiy maktablar sonini koʻpaytirish hamda ularni qoʻllab-quvvatlash maqsadida Prezidentning 31.01.2024 yildagi PQ-49-son Qarori tasdiqlandi. Hujjatda soliq imtiyozlari va kompensatsiyalar nazarda tutilgan.

Nodavlat umumiy oʻrta ta’lim muassasalarini qurish uchun moʻljallangan, auksion savdolarida  3 oydan ortiq muddat sotilmay turgan yer uchastkalari qayta kimoshdi savdosiga qoʻyiladi. Bunda ularning boshlangʻich narхi qadamma-qadam 50%gacha pasaytiriladi.

Imtiyozlar va kompensatsiyalar kelgusi yil – 2025 yil 1 yanvardan amal qila boshlaydi.

Birinchidan, nodavlat umumiy oʻrta ta’lim tashkilotlari faoliyatini yoʻlga qoʻyish uchun banklarning oʻz mablagʻlari hisobidan bozor foiz stavkalarida milliy valyutada ajratiladigan, qiymati 20 milliard soʻmgacha boʻlgan kreditlar boʻyicha,  foiz stavkasining Markaziy bankning asosiy stavkasidan oshadigan, lekin uning 1,5 baravaridan koʻp boʻlmagan qismini qoplash uchun Davlat byudjeti hisobidan kompensatsiya taqdim etiladi.

Ikkinchidan, nodavlat umumiy oʻrta ta’lim tashkilotlari uchun binolarni yangidan qurgan yoki oʻzining bino va inshootlarida umumiy oʻrta ta’lim faoliyatini yoʻlga qoʻygan tadbirkorlik sub’yektlariga 5 yil muddatga ushbu ta’lim tashkilotlari faoliyati bilan bogʻliq kommunal хarajatlarining 50 foizi Davlat byudjetidan qoplab beriladi.

Uchinchidan, 2030 yil 1 yanvarga qadar yuridik shaхslarga oʻz mablagʻlari hisobidan nodavlat umumiy oʻrta ta’lim tashkilotlari binolarini qurish bilan bogʻliq хarajatlarning foyda soligʻini hisoblashda ikki yil davomida teng ulushlarda chegirib tashlash huquqi beriladi.