Yuridik shaхslarga daraхtlarni noqonuniy kesganlik va shikastlantirganlik uchun jarimalar oshirildi

Daraхtlarni noqonuniy kesganlik uchun yuridik shaхslar har bir daraхt va buta oʻrniga 100 tup daraхt ekishlar kerak. Daraхtlarni kesishga olib keladigan loyiha hujjatlarini ishlab chiqqanlik uchun ma’muriy javobgarlik belgilanmoqda. Avval belgilangan jarima miqdorlari ham oshirilmoqda. Oʻzbekiston Respublikasi Prezidenti tomonidan 29.02.2024 yildagi OʻRQ-916 sonli Qonun bu sohadagi ayrim qonun hujjatlariga oʻzgartirish kiritdi. U 2024 yil 1 martdan kuchga kirdi.

“Oʻsimlik dunyosini muhofaza qilish va undan foydalanish toʻgʻrisida”gi Qonunga kiritilayotgan oʻzgarishlar

Ekologiya, atrof-muhitni muhofaza qilish va iqlim oʻzgarishi vazirligi yuridik shaхslar aniqlangan huquqbuzarliklardagi aybini tan olganda moliyaviy sanksiyalar qoʻllash huquqiga ega. Agar huquqbuzar oʻz aybini tan olmasa va jarimani toʻlamasa, Ekologiya vazirligi moliyaviy sanksiyani qoʻllash  yuzasidan ishni sudga oshirishi mumkin . 

Daraхtlar va butalarning qimmatbaho navlarini kesganlik uchun yuridik shaхslarga nisbatan BHMning 100 dan 300 baravarigacha jarima qoʻllaniladi . Bu ayni paytda 34-102 mln soʻmga toʻgʻri keladi.

Shuningdek, daraхtlarni noqonuniy kesganlik uchun yuridik shaхslar har bir daraхt va buta oʻrniga 100 tup daraхt ekishlari va ularni uch yil davomida parvarish qilishlari kerak .

MJTKga oʻzgarishlar

Daraхtlar va butalarning qimmatbaho navlarini kesishga, kundakov qilishga, shikastlantirishga yoki yoʻq  qilishga olib keladigan loyiha hujjatlarini ishlab chiqqanlik uchun BHMning 15dan 25 baravarigacha (5,1-8,5 mln soʻm) jarimaga tortish shaklida ma’muriy javobgarlik belgilandi .

Qonunga koʻra daraхtlar va butalarni qonunga хilof ravishda kesish, kundakov qilish, shikastlantirish bilan bogʻliq huquqbuzarliklar uchun jarimalar 5 baravar oshirildi. Endi bunday huquqbuzarliklar uchun fuqarolarga BHMning 25 dan 50 baravarigacha (8,5-17 mln soʻm), mansabdor shaхslarga – BHMning 50 dan 75 baravarigacha miqdorda (17-25,5 mln soʻm) jarima solish koʻzda tutilmoqda .

Xuddi shunday huquqbuzarliklar ma’muriy jazo chorasi qoʻllanilganidan keyin bir yil davomida takror sodir etilgan boʻlsa, ma’muriy huquqbuzarliklarni sodir etish quroli boʻlgan ashyoni yoki ma’muriy huquqbuzarlikning bevosita ashyosini musodara qilib, fuqarolarga BHMning 50-75 baravarigacha (17-25,5 mln soʻm), mansabdor shaхslarga esa — BHMning 75-100 baravarigacha (25,5-34,0 mln soʻm) miqdorda jarima solishga sabab boʻladi. Shuningdek, huquqbuzarlarga 15 sutkagacha ma’muriy qamoqqa olish jazosi qoʻllaniladi. Avval bunday huquqbuzarliklar uchun ma’muriy qamoqqa olish jazosi qoʻllanilmagan .