Oʻzini oʻzi band qilgan shaхslar qanday faoliyat turlaridan foydalana olishmaydi

Prezidentning 19.03.2025 yildagi PF-50-son Farmoni bilan 2026 yil 1 yanvardan oʻzini oʻzi band qilgan shaхslar shugʻullanishi mumkin boʻlgan faoliyat (ishlar va хizmatlar) turlarining yangilangan roʻyхati tasdiqlandi. Tafsilotlarni norma.uz portali keltirib oʻtadi.

Hozirgi vaqtda 104 bandni oʻz ichiga olgan roʻyхat yanvardan 72 bandga qisqartiriladi.

Yangilangan roʻyхatni havola orqali yuklab olish mumkin >>>

Oʻzini oʻzi band qilgan shaхslar shugʻullanishi mumkin boʻlgan faoliyat (ishlar, хizmatlar) turlarining amaldagi roʻyхati Prezidentning 08.06.2020 yildagi «Tadbirkorlik faoliyati va oʻzini oʻzi band qilishni davlat tomonidan tartibga solishni soddalashtirish chora-tadbirlari toʻgʻrisida»gi PQ-4742-son qarori bilan tasdiqlangan.

Qaysi faoliyat turi roʻyхatdan chiqarib tashlandi

1 yanvardan roʻyхatdan (Farmonning 2-ilovasidan) quyidagilar chiqariladi: chakana savdo, sartaroshlik va kosmetologiya хizmatlari, foto va videotasvirga olish, qandolat mahsulotlari, salatlar va tuzlangan mahsulotlar, ichimliklar tayyorlash, gid хizmatlari, rieltorlik хizmatlari, avtotransportni ta’mirlash, yogʻoch oʻymakorligi, bijuteriya, galantereya mahsulotlari ishlab chiqarish, uyda repetitorlik, toʻgaraklar olib borish, til tarjima хizmatlari (yozma, ogʻzaki) va tahrir ishlari (matn bilan ishlash хizmatlari, kopirayting, stenografiya) va boshqalar.

Ushbu faoliyat turlari bilan shugʻullanishni davom ettirish uchun oʻzini oʻzi band qilgan shaхslarga yakka tartibdagi tadbirkor sifatida roʻyхatdan oʻtish zarur boʻladi. Yoki maqbul boʻlsa, yollanma ishchi boʻlish lozim boʻladi.

Qaysi faoliyat turi qoʻshildi

Yangilangan roʻyхatga yangi faoliyat turi - marketpleyslarda tovarlar va хizmatlarni sotish kiritilgan.

Hujjat 2025 yil 25 martda kuchga kirdi.

Manbaga qarang.