Ижаранинг минимал ставкалари тиркамага татбиқ этиладими

Фирма жисмоний шахс билан фургон (енгил автомобилга будка сифатида тиркама қилинади) учун ижара шартномасини тузди. Техпаспортда у ярим тиркама сифатида кўрсатилган. Енгил автомобиль учун ижаранинг минимал ставкаси ойига 575 000 сўмни, юк автомобилига - 1 150 000 сўмни ташкил қилади. Фургон учун бир ой учун ижара ҳақини қандай ставка бўйича белгилаш зарур?

Buxgalter.uz илтимосига биноан саволга юрист  Икром АБДУЛҚОДИРОВ жавоб берди:

- 2021 йил учун мол-мулкни ижарага берувчи жисмоний шахслар учун белгиланган ижара тўловининг энг кам ставкалари бинолар ва автотранспортнинг айрим турларига татбиқ этилади . Айнан:

• енгил автомобиллар;
• микроавтобуслар, автобуслар ва юк автомобиллари.

Бундай мол-мулкни ижарага беришдан олинган даромадларга шартномада белгиланган ижара ҳақи суммасидан, бироқ мол-мулкни ижарага берувчи жисмоний шахслар учун белгиланган ижара тўловининг энг кам ставкаларидан келиб чиқиб ҳисоблаб чиқарилган суммадан паст бўлмаган суммадан келиб чиққан ҳолда солиқ солинади.

Енгил автомобиль - бу йўловчилар ва багажни ташишга мўлжалланган ҳамда ҳайдовчи ўрнини ҳисобга олмаганда 8 тадан кўп бўлмаган ўриндиққа эга бўлган автотранспорт воситаси. Автобус - йўловчиларни, багажни ташишга мўлжалланган ва ҳайдовчи ўрнини ҳисобламаганда 8 тадан ортиқ ўриндиққа эга бўлган автотранспорт воситаси .

Бинобарин, ярим тиркама - бу белгиланиши бўйича енгил автомобиль эмас, шунингдек автобус ҳам, микроавтобус ҳам эмас.

“Автомобиль транспорти тўғрисида”ги Қонунда юк автотранспорти воситалари жумласига юк автомобиллари, шатакчи автомобиллар, тиркамалар ва ярим тиркамалар киради . “Ярим тиркама” ва “юк автомобили” тушунчалари қонунда ажратилган, айнан ўхшаш эмас.

Хулоса: автомобиль транспортининг барча бошқа турлари, жумладан ярим тиркамалар бўйича ижара ҳақи ижара шартномасига биноан томонларнинг ўзаро келишувига кўра белгиланади.

Бундай мол-мулкни ижарага беришдан олинган даромадларга шартномада белгиланган ижара ҳақи суммасидан келиб чиққан ҳолда солиқ солинади.

Шартномада белгиланган ижара ҳақи суммаси қонунчилик билан белгиланган ижара ҳақининг минимал ставкаларидан паст бўлиши мумкин.