Субвоситачилик шартномаси бўйича сотувлар онлайн-НКТ чекларида қандай расмийлаштирилади

Чакана савдони кенгайтириш учун компания сотувчиларни излаб топиб, улар билан субвоситачилик шартномалари асосида ишлашни ташкил этувчи ташкилот билан шартнома тузишни режалаштирмоқда. Мазкур субвоситачилар сотишдан олинган тушум автоматик тарзда комитентнинг ҚҚС (айланмадан олинадиган солиқ) ҳисоб-китобида акс эттирилиши учун онлайн-НКТни қандай созлашлари лозимлиги ҳақида “Норма” ва buxgalter.uz илтимосига биноан “Yangi texnologiyalar” ИАМнинг бўлими бошлиғи Шерзод ТЕШЕБАЕВ гапириб берди:

 

– Бундай шартномалар бўйича сотувларни бошлашдан олдин комитент, воситачи ва субвоситачи албатта муайян созламаларни амалга оширишлари керак.

1. Комитент учун ҳаракатлар режаси:

1) My.soliq.uzда шахсий кабинетга киринг;

2) хизматлар рўйхатида “Ташкилот воситачиларининг рўйхатини шакллантириш”ни танланг;

3) “Воситачини яратиш” иловасини танланг ва “Қўшиш” тугмасига босинг;

4) очилган ойнада тегишли майдонларга қуйидагиларни киритинг:

– воситачининг – юридик шахснинг СТИРи ёки якка тартибдаги тадбиркорнинг ЖШШИРи;

– ташкилот-воситачининг номи (СТИР, ЖШШИР кўрсатилганидан кейин автоматик тарзда тўлдирилади);

– воситачилик шартномасининг рақами;

– воситачининг МФОси;

– воситачининг ҳисобрақами;

– шартнома тузилган сана;

– шартноманинг амал қилиш муддати бошланадиган сана;

– шартноманинг амал қилиш муддати тугайдиган сана.

“Комитент (СТИР / ЖШШИР)” устунини тўлдирилмаган ҳолда қолдиринг.

5) “Қўшиш”га босинг.

 

2. Воситачи учун ҳаракатлар режаси:

1) My.soliq.uzда шахсий кабинетга киринг;

2) хизматлар рўйхатида “Ташкилот воситачиларининг рўйхатини шакллантириш” опциясини танланг;

3) “Воситачини яратиш” иловасини танланг ва “Қўшиш” тугмасига босинг;

4) очилган ойнада тегишли майдонларга қуйидагиларни киритинг:

– субвоситачининг – юридик шахснинг СТИРи ёки якка тартибдаги тадбиркорнинг ЖШШИРи;

– ташкилот-субвоситачининг номи (СТИР, ЖШШИР кўрсатилганидан кейин автоматик тарзда тўлдирилади);

– воситачилик шартномасининг рақами;

– субвоситачининг МФОси;

– субвоситачининг ҳисобрақами;

– шартнома тузилган сана;

– шартноманинг амал қилиш муддати бошланадиган сана;

– шартноманинг амал қилиш муддати тугайдиган сана.

“Комитент” устунида  комитентнинг СТИРи ёки ЖШШИРини кўрсатинг;

5) “Қўшиш”га босинг.

 

3. Субвоситачи учун ҳаракатлар режаси:

Субвоситачилик шартномалари бўйича реализация қилинаётган товарлар (хизматлар) бўйича онлайн-НКТ хотирасига киритилган товарлар ва хизматлар тўғрисидаги маълумотга комитентнинг СТИРи ёки ЖШШИРини киритинг. Шундан сўнг онлайн-НКТ чекида воситачилик шартномаси бўйича реализация қилинган товарнинг номи остида ушбу маълумотлар кўрсатилади.

 

Агар мазкур созламаларни амалга оширмаган ҳолда ишлашни бошлаган бўлсангиз

Субкомиссия шартномаси томонлари юқорида кўрсатилган ҳаракатларни амалга оширганларидан сўнг, товарни сотишдан олинган суммалар автоматик тарзда комитентнинг солиқ ҳисоботларида акс эттирилади. Воситачи ва субвоситачида солиқ базаси эса шартномага мувофиқ тақдим этиладиган воситачилик ҳақи учун ҳисобварақ-фактуралар асосида шакллантирилади.

Агарда созламаларсиз ишлашни бошлаган бўлсангиз ёки қайсидир босқичда хато ёки ноаниқликка йўл қўйган бўлсангиз, бундай сотувлар бўйича чекларда субвоситачиларда комитентнинг СТИРи кўрсатилмайди ва сотишдан олинган барча сумма автоматик тарзда субвоситачиларнинг солиқ ҳисоботидан ўтади.

Вазиятни тузатиш учун томонлар айтиб ўтилган созламаларни амалга оширишлари, илгари йўл қўйилган хатоларни бартараф этишлари ва хато мавжуд бўлган чекларга тузатиш киритишлари лозим.

Олег ГАЕВОЙ тайёрлади