Фойда солиғи ҳисоб-китобида жами даромадни акс эттириш тартиби
Тавсияда:
– жами даромад ҳаммаси:
товар (хизмат)ларни реализация қилишдан даромад;
кредит бўйича мукофотлар;
суғурта шартномалари бўйича даромадлар;
АВ ва бошқа мол-мулкнинг чиқиб кетиши;
оператив ижара;
текинга олинган мол-мулк (хизматлар);
инвентаризация натижалари бўйича ортиқчаликлар;
мажбуриятларни ҳисобдан чиқаришдан даромадлар;
талаб қилиш ҳуқуқини бошқа шахсга ўтказиш;
дивидендлар;
фоизлар;
ижобий курс фарқи;
молиявий ижара;
аҳолининг диний мақсадда фойдаланиши учун мўлжалланган товарларни реализация қилишдан олинган даромад;
чет эллик компания томонидан назорат қилинадиган тақсимланмаган даромад;
трансферт нарх натижасида йўқотилган даромад;
солиқ базасини бозор қийматидан келиб чиқиб тузатиш;
даромадга тузатиш киритиш;
алоҳида операция турлари бўйича даромадлар;
доимий муассасалар даромадлари;
бошқа даромадлар.
Жами даромадни Фойда солиғи ҳисоб-китобига 1-сон иловада акс эттиринг.
Жами даромад ҳаммаси
Жами даромадни аниқлаш учун:
1) ҳисобот (солиқ) даври давомида корхона Ўзбекистондаги ва унинг ташқарисидаги манбалардан олган барча даромадларни акс эттиринг (1-илованинг 020–180-сатрлари).
2) 1-илованинг 010-сатрида давр учун жами даромад автоматик тарзда акс эттирилади.
Жами даромадни ҚҚС ва акциз солиғини ҳисобга олмасдан пул, натура ва (ёки) бошқа шакллардаги барча тушумлардан келиб чиқиб аниқланг .
Даромадларни тан олиш учун асос бўлиб бирламчи ва бошқа ҳужжатлар, шу жумладан, электрон ҳужжатлар ҳамда солиқ ҳисоби ҳужжатлари ҳисобланади. Масалан:
- ҳисобварақ-фактура;
- бажарилган ишлар ёки кўрсатилган хизматлар ҳақидаги далолатнома;
- товар юклаб жўнатилганлиги ва хизматлар кўрсатилганлигини тасдиқловчи бошқа ҳужжатлар.
Агар даромадни аниқлаш ва тан олиш меъёрлари бухгалтерия ҳисоби талабларидан фарқ қилса, Солиқ кодекси меъёрларини қўлланг .
Масалан, корхона 75 млн сўмга тенг бир йиллик фоизсиз қарз олди. Қарз олинган санадаги қайта молиялаштириш ставкаси – 14 %. Солиқ солиш мақсадида корхона фоизсиз қарздан фойдаланишдан олинган 0,875 млн сўм (75 млн сўм х 14 % : 12 ой) миқдоридаги даромадни жами даромад таркибида ҳар ой аниқлайди . Бунда ушбу даромад бухгалтерия ҳисобида акс эттирилмайди.
Товар (хизмат)лар реализация қилишдан даромад
1-устуннинг 021-026-сатрларида даромадингиз бўлган фаолият турларини танланг.
3-устуннинг 021-026-сатрларида ҳар бир фаолият тури бўйича сотишдан тушадиган даромадни кўрсатинг.
021-026-сатрларда реализациядан олинган даромадни ҳар бир фаолият тури бўйича кўрсатинг. 020-сатрда товар (хизмат)ларни реализация қилишдан олинган умумий даромад
021-026-сатрлар йиғиндиси сифатида автоматик тарзда акс эттирилади.
Реализациядан олинган даромадга корхона томонидан қуйидагилар учун олиниши керак бўлган ёки олинган суммаларни киритинг:
- ўз маҳсулотларингизни сотишдан;
- юклаб жўнатилган товарлардан;
- бажарилган ишлар;
- кўрсатилган хизматлардан.
Даромадга, шунингдек реализация қилинган товар (хизмат)лар учун қарзни тўлаш ёки сўндириш ҳисобига келиб тушаётган мол-мулк қиймати ҳам киритилади.