Ноябрь ойидаги бухгалтер учун фойдали ахборот:
2024 йил 1 августда экспортчи компаниялар вакиллари билан учрашувда Солиқ қўмитаси раиси Шерзод Кудбиев Soliq мобил иловасида «Soliq biznes» хизматининг ишга туширилганини маълум қилди. Бу хизмат юридик шахсларнинг шахсий кабинетининг мобил версиясида пайдо бўлди.
Buxgalter.uz бу қандай ишлашини аниқлаштирди:
Муҳим янгиликларни ўтказиб юбормаслик учун бизнинг Телеграм-каналимизга обуна бўлинг.
SoliqUz мобил иловасининг янгиланган версиясини юклаб олинг. 2.0.0 версияси аллақачон Google Play платформасида мавжуд. Нашр тайёрланаётган пайтда янгиланишни юклаб олиш имкони бўлди, аммо авторизациядан ўтиш ҳали имконсиз эди. Текширув кодини икки марта сўраганидан кейин ҳам, у келмади.
Хизматдан фойдаланиш учун раҳбар (директор) ва бош бухгалтер Face ID авторизациясидан ўтишлари керак. Ҳисоб маълумотларида ҳозирги вақтда бу лавозимларни эгаллаб турган шахслар кўрсатилган бўлиши муҳим. Зарур бўлса, ўзгартиришлар киритинг.
Шунингдек, раҳбар «Soliq biznes» ёрдамида бизнес-жараёнларни кузатиш ҳуқуқини таъсисчиларга, бизнес ҳамкорларга ва бошқа манфаатдор шахсларга бериши мумкин. Бунинг учун раҳбар уларнинг ҳар бири учун кузатувчи режимини фаоллаштириши етарли.
«Soliq biznes»нинг барча имкониятларини 3 та блокка бўлиш мумкин.
I блок
Биринчи саҳифада кўрсатилади:
- юридик шахснинг номи;
- СТИР;
- барқарорлик рейтинги кўрсаткичи;
- солиқ мажбуриятларининг бажарилиши ёки бажарилмаслиги ҳолати.
II блок
Бу қисмда корхонанинг хўжалик фаолияти билан боғлиқ асосий маълумотлар акс эттирилган:
- тўловчиларни бошқариш учун ахборот тизимидан;
- «маҳаллабай» ва "корхонабай" тизимларидан.
Бу ерда шахсий солиқ инспекторининг алоқа маълумотлари билан визитка-хабарномаларни ҳам топиш мумкин. Бир солиқ инспектори бир фаолият соҳасидаги (масалан, қишлоқ хўжалиги, саноат ва ҳ.к.) бир нечта ташкилотларга масъул бўлади. Инспектор тадбиркорлик субъектига солиқ мажбуриятларини бажаришда кўмаклашиши шарт.
Солиқ тўловчиларни бошқариш учун ахборот тизимида давлат солиқ хизмати маълумотлар базасида мавжуд бўлган барча маълумотлар тўпланган. Инспекторлар учун унда ўз "мижозлари" фаолиятини назорат қилиш ва таҳлил қилиш имконини берувчи автоматлаштирилган тизим яратилган.
Барча маълумотлар қуйидаги тоифалар бўйича гуруҳланган:
- товар айланмаси;
- солиқ ҳисоботини тақдим этиш;
- солиқ турлари бўйича маълумотлар;
- қарздорлик;
- ортиқча тўловлар;
- текширувдан олдинги таҳлил натижалари ва ҳ.к.
Бу кўрсаткичлар тадбиркорларнинг барқарорлик рейтинги мезонларига ўхшаш.
Бугунги кунда тизимларда:
- «корхонабай»да 182 минг ҚҚС тўловчиларига 902 та солиқ инспектори бириктирилган;
- «маҳаллабай»да 9 445 та маҳаллада - 4 349 та солиқ инспектори бор.
Мy3.soliq.uz даги шахсий кабинетда ҳар бир солиқ тўловчининг "Асосий" бўлимида бириктирилган солиқ инспектори ҳақида тўлиқ маълумот (Ф.И.Ш., лавозими, телефон рақами) жойлаштирилган:
- «Солиқ бошқармасидаги менинг инспекторим».
- «Маҳалладаги менинг инспекторим».
Солиқ тўловчиларнинг фаолияти автоматик равишда таҳлил қилинади:
- «корхонабай» тизимида - 42 та йўналиш бўйича;
- «маҳаллабай» тизимида - 25 та йўналиш бўйича.
Бу бўлимда солиқ ҳисоботи, ҳисобланган солиқлар ва йиғимлар, банк ҳисоб рақамлари, ЭҲФ, электрон ишончномалар ва шартномаларнинг ҳолати кўринади.
Банк ҳисоб рақами тўхтатилган ҳолда, унинг тўхтатилиш сабаби кўрсатилади. Масалан, - солиқ ҳисоботини ўз вақтида тақдим этмаслик, камерал солиқ текшируви натижалари бўйича солиқ органларининг жавобсиз қолдирилган талаблари, солиқ тўловчининг ўзи кўрсатган манзилда йўқлиги ва ҳ.к.
III блок
Бунда солиқ органлари томонидан солиқ тўловчининг шахсий кабинетига юборилган барча талаблар ва бошқа хабарномалар гуруҳланган. Бу ердан солиқ тўловчи солиқ органларига мурожаат юбориши мумкин.
Манбага қаранг.
Иловани Олег ГАЕВОЙ синаб кўрди
