Xolis платформаси орқали ишловчиларга касса аппарати керакми

1 январдан бошлаб ЯТТ ва ўзини ўзи банд қилганлар учун – айланмадан 1 фоиз миқдорида янги солиқ режими кучга кирди. Чакана савдо субъектларига эса тўлов ташкилотларининг рақамли платформаларида шакллантирилган махсус QR-код орқали тўловларни қабул қилиш мажбурияти юклатилди. Биринчи ва ҳозирча ягона шундай платформа Paynet томонидан ишлаб чиқилган.

Шу билан бирга, ушбу янгиликлар билан боғлиқ кўплаб амалий масалалар – касса аппаратлари, корпоратив карталардан тўловларни қабул қилиш, товарларни ҳисобга олиш, маркировкалаш ва бошқалар бўйича ҳозирча ноаниқлигича қолмоқда.

«Paynet» АЖ коммуникациялар бўйича раҳбари Зумрад АРАПЖОНОВА бизнинг илтимосимизга кўра, қайси масалалар бўйича қарор аллақачон маълумлиги ва қайси механизм ҳали ҳам такомиллаштирилаётганини тушунтирди:

 

– Барча ЯТТлар ва ўзини ўзи банд қилганлар 1 январгача «Xolis» иловасида рўйхатдан ўтишлари керакми?

– Xolis – бу ПҚ-247 сонли қарор ижросини таъминлаш мақсадида яратилган рақамли платформа. Шу билан бирга, қарорда барча ЯТТлар ва ўзини ўзи банд қилган шахслар 1 январга қадар айнан Xolis иловасида рўйхатдан ўтишлари шартлиги тўғрисидаги норма мавжуд эмас.

Ҳақиқий мажбурият – янги режимга ўтиш (айланмадан 1 млрд сўмгача 1 фоиз) ва тўлов ташкилотларининг рақамли платформаларида яратилган электрон тўловларни қабул қилиш учун махсус QR-кодга эга бўлиш.

Бугунги кунда фақат битта шундай платформа – «Paynet»нинг Xolis платформаси фаолият юритмоқда. Бу – йиллик айланмаси 1 млрд сўмдан ошмайдиган кичик бизнес учун тўлақонли воситадир.

– Мижозлардан пулни қандай қабул қилиш керак? Касса аппарати энди керак эмасми?

– Xolis виртуал онлайн касса вазифасини бажаради. Бу – бепул, кирувчи транзаксиялар 0 фоиз, абонент тўлови мавжуд эмас.

Тўлов қуйидагича амалга оширилади: платформа ЯТТ ёки ўзини ўзи банд қилган шахс учун шахсий QR-кодни яратади. Тадбиркор уни мижозга телефон экранида кўрсатиши ёки чоп этиб, савдо ёки хизмат кўрсатиш жойига жойлаштириши мумкин.

Мижоз ушбу кодни ўзининг банк ёки тўлов иловаси орқали сканерлайди, харид суммасини кўрсатади ва пул ўтказади. Маблағлар бир зумда Xolis платформасидаги ЯТТнинг электрон ҳамёнига келиб тушади. Тизим автоматик тарзда чек шакллантиради ва айланмадан олинадиган солиқнинг 1 фоизини ушлаб қолиб, бюджетга юборади. Солиқ ҳисоботлари ҳам чекларингиз асосида автоматик тарзда шакллантирилади.

Бунда Xolis платформасидаги электрон ҳамён ЯТТнинг ҳисоб-китоб рақамига тенглаштирилган. Сиз банк картангизга маблағларни ечиб олишингиз, нақд пул ечиб олишингиз, контрагентларга товарлар ва хизматлар учун банкдаги ҳисоб рақамига тўлашингиз, Paynet тизимида бошқа ҳамёнларга пул ўтказишингиз мумкин.

– Ушбу транзаксиялар бўйича хизмат қанча комиссия ушлаб қолади?

– Электрон ҳамёнга кирувчи транзаксиялар харидор ва сотувчи учун бепул, комиссия 0 фоизни ташкил қилади.

Paynet электрон ҳамёнлари ўртасидаги ўтказмалар – 0 фоиз комиссия.

Paynet ҳамёнидан Uzcard ёки Humo картасига маблағ ўтказиш – 0,9 фоиз комиссия.

Paynet агентлигида нақд пул ечиб олиш –  банк терминали билан бир хил бўлган 1 фоиз комиссия.

–  Нақд тўловлар билан қандай ишлаш ва чекларни қандай шакллантириш мумкин?

–  QR-код орқали тўлов амалга оширилганда чек автоматик тарзда шаклланади.

Агар мижоз нақд пул билан тўласа, сиз иловада тўлов суммасини кўрсатасиз ва «Қабул қилиш» тугмасини босасиз. Илова мижозга SMS ёки мессенжерга юбориш мумкин бўлган электрон фискал чекни шакллантиради. Бунда тадбиркорнинг ҳамёнида ушбу транзакция бўйича солиқни (1 фоиз) автоматик равишда ҳисобдан чиқариш учун етарли бўлган суммалар бўлиши керак. Шундай қилиб, сиз нақд пул айланмангизни қонунийлаштирасиз ва чекларни шакллантириш талабини бажарасиз.

– Мижоз харидни юридик шахснинг корпоратив картаси билан тўламоқчи бўлса, ҳисоб-китобларни қандай амалга ошириш керак?

–  Бугунги кунда платформа биринчи навбатда жисмоний шахслар учун QR-код орқали тўловларни қабул қилишга йўналтирилган.

P2B секторида ишловчи ва ҳисобварақ-фактураларни тақдим этувчи ЯТТлар, уларнинг мижозлари – юридик шахслар нақд пулсиз ҳисобварақларга тўловни амалга оширади.

Юридик шахснинг QR-коди орқали тўлов механизми ҳали мавжуд эмас. Уни яқин вақт ичида амалга оширишни режалаштирмоқдамиз.

– Товар ҳисобини қандай юритиш керак? Сотишда товарнинг ҳар бир номини уларнинг МХИК коди билан киритиш керакми?

– Янги қоидаларга кўра якка тартибдаги тадбиркорлар фаолият турига (масалан, битта код билан «чакана савдо») боғланган йириклаштирилган гуруҳли МХИКдан фойдаланадилар. Платформа ушбу кодни ЯТТ фаолият тури бўйича чекка автоматик равишда қўяди.

Бухгалтерия ҳисобингиз учун батафсил омбор ҳисобини («донабай») ўзингизга қулай тарзда (дафтар, Excel ёки 1С да) юритасиз. Солиқ ва илова учун фақат умумий айланма муҳим, тафсилотларга ҳожат йўқ.

– Агар МХИК умумий бўлса, мажбурий маркировкаланган товарларни (масалан, маиший техникани) қандай сотиш мумкин?

– Ҳозирда ушбу функционал Солиқ қўмитаси билан биргаликда ишлаб чиқилмоқда ва тез орада тақдим этилади.

– Платформа орқали товар/хизматни қайтариш қандай амалга оширилади?

– Қайтариш (бекор қилиш) функцияси рақамли платформада назорат-касса техникасига ўхшаш тарзда амалга оширилади. Аниқ тартиб-таомилни (ҳисоботда қандай акс эттириш ва ушлаб қолинган солиқ билан нима содир бўлишини) – тайёр бўлишига қараб аниқ ёзамиз.