Янги ҳисобварақ-фактура

ДСҚ ва Молия вазирлигининг қарори (21.01.2019 йилда 3126-сон билан рўйхатдан ўтказилган) билан янги солиқ ҳисоботи шакллари тасдиқланди. ҚҚС бўйича ҳисобот шакллари орасида янги ҳисобварақ-фактура шакли ҳам тасдиқланди.

Қарор билан ҳисобварақ-фактуранинг 2 та шакли тасдиқланди:

1 – умумий, 8 та устундан иборат;

2 – бензин, дизель ёқилғиси ва газни охирги истеъмолчига сотиш чоғида тўланадиган акциз солиғини тўловчилар учун, 11 та устундан иборат.

Қолган акциз солиғини тўловчилар солиқ суммасини ажратиб кўрсатмаган ҳолда ҳисобварақ-фактуранинг умумий шаклини тўлдирадилар. 5-«Етказиб бериш қиймати» устунида акциз солиғи ҳисобга олинган, ҚҚС ҳисобга олинмаган, 8-«ҚҚС ҳисобга олинган етказиб бериш қиймати» устунида эса – акциз солиғи ва ҚҚС ҳисобга олинган ҳолда сотилган товарлар (кўрсатилган хизматлар)нинг жами сони (ҳажми) қийматини кўрсатишлари шарт.

Иккала шаклда етказиб берувчи ва харидорнинг мажбурий реквизитлари ўзгартирилди. Қуйидаги реквизитлар чиқариб ташланди:

• телефон рақами;
• банк – ҳисоб-китоб счётининг рақами, банк номи ва шаҳар;
• ИФУТ бўйича коди;
• ишончнома бўйича – рақами, берилган санаси ва олувчининг Ф.И.О.

Қуйидаги реквизитлар қўшилди:

• ҚҚС тўловчини рўйхатга олиш коди.

Бу – солиқ органлари томонидан ҚҚС тўловчига бериладиган 12 та рақамдан иборат код. У берилганлиги тўғрисидаги гувоҳнома солиқ тўловчига унинг шахсий кабинети орқали юборилади.

Янги ҳисобварақ-фактура шакллари 2019 йил 22 январдан бошлаб қўлланилади.