Fevral oyida ekspertlarning materiallari siz uchun foydali boʻladi:
Yangi Alkogol mahsulotlarining ulgurji savdosi boʻyicha faoliyatni litsenziyalash tartibi, shuningdek, litsenziya talablari va shartlarini buzganlik uchun qoʻllanadigan choralar va sanksiyalar toʻgʻrisidagi nizom tasdiqlandi (20.05.2020 yildagi 301-son VMQ).
Mazkur hujjatga asosan alkogol mahsulotlarining ulgurji savdosi bilan shugʻullanishga faqat BHMning 1 000 baravaridan kam boʻlmagan miqdorda ustav fondiga ega yuridik shaхslar haqli. Alkogol mahsulotlarini saqlash, qabul qilish va tarqatish boʻyicha normalarga rioya qilishdan tashqari, ulgurji savdo bilan shugʻullanuvchi:
- etil spirti, alkogol va tamaki mahsulotlarini ishlab chiqarish va ularning aylanmasi hajmini hisobga olish avtomatlashtirilgan aхborot tizimi ishtirokchisi boʻlishi;
- DSQning aхborot tizimiga integratsiyalashgan elektron hisobvaraq-fakturadan foydalanishi kerak.
Hujjatlarni koʻrib chiqish uchun yigʻim BHMning 5 baravarini, litsenziya toʻlovi – yiliga BHMning 200 baravarini tashkil etadi.
Mahalliy pivo mahsulotlari, koʻpiklanadigan va tabiiy vinolarning ulgurji savdosi uchun litsenziya olish shart emas.
Tuman (shahar) hokimliklari tomonidan "Sharobsavdo" ulgurji bazalariga ilgari berilgan litsenziyalar 3 oy muddatda qayta rasmiylashtirilishi shart.
Qaror Qonun hujjatlari ma’lumotlari milliy bazasida e’lon qilingan va 20.05.2020 yildan kuchga kirdi.
Lola ABDUAZIMOVA
