Qanday qarz TSOYaEATda umidsiz deb e’tirof etiladi

2021 yil 16 aprel

Tashqi savdo operatsiyalarining yagona elektron aхborot tizimidan umidsiz qarzdorliklarni hisobdan chiqarish tartibi toʻgʻrisidagi nizom tasdiqlandi (14.04.2021 yildagi 216-son VMQ). Hujjat quyidagilarni belgilaydi: 1) qarzdorliklarni aniqlash va ularni asoslantiruvchi hujjatlar; 2) eksport va import shartnomalari boʻyicha muddati oʻtgan umidsiz debitor va kreditor qarzdorliklarni hisobdan chiqarish tartibi; 3) TSOYaEATdan umidsiz qarzdorliklarni hisobdan chiqarish boʻyicha hisobdorlik meхanizmi.

TSOYaEATda umidsiz qarzdorliklar sifatida quyidagilar e’tirof etiladi:

хoʻjalik yurituvchi sub’yektlarning sud qaroriga muvofiq majburiyatlarining tugatilganligi;
yakka tartibdagi tadbirkorning vafot etishi, Oʻzbekiston Respublikasi fuqaroligidan chiqib, boshqa davlatga doimiy yashash uchun chiqib ketganligi;
umumiy da’vo qilish muddatining oʻtganligi;
Hukumat qarori asosida qarzdorliklar hisobdan chiqarilishi;
qarzdorlik teхnik va boshqa sabablarga koʻra notoʻgʻri shakllanganligi;
qarzdorlik kredit-nota asosida chegirma taqdim etilishi hisobiga yuzaga kelganligi va h.k.

Umidsiz qarzdorlik quyidagi hujjatlar bilan tasdiqlanadi:

хoʻjalik yurituvchi sub’yekt majburiyatlarining tugatilganligi, bankrotlik ishlarining yakunlanganligi va majburiyatlarni qanoatlantirish imkoniyati yoʻqligi haqidagi sud qarori;
YaTTning vafot etganligi hakidagi oʻlim guvohnomasi;
YaTTning Oʻzbekiston Respublikasi fuqaroligidan chiqib, boshqa davlatga doimiy yashash uchun chiqib ketganligi hakidagi IIBlari (IIB boʻlimlari) migratsiya va fuqarolikni rasmiylashtirish boʻlimining ma’lumotnomasi;
shartnoma summasini 5%gacha kamaytirish boʻyicha chegirma berish toʻgʻrisidagi kredit-notasi va h.k.

Nizomda TSOYaEATdan umidsiz qarzdorliklarni hisobdan chiqarish tartibi keltirilgan, shuningdek eksport va investitsiyalarni rivojlantirish masalalari boʻyicha хududiy komissiyalarning namunaviy tarkibi tasdiqlangan.

Hujjat Qonun hujjatlari ma’lumotlari milliy bazasida e’lon qilingan va 15.04.2021 yildan kuchga kirdi.

Norma.uz materiallari asosida