Shaharsozlik hujjatlarini ekspertizadan oʻtkazish tartibi oʻzgardi

2021 yil 1 oktyabrdan boshlab 17.09.2021 yildagi “Shaharsozlik hujjatlarini ekspertizadan oʻtkazish tartibotlarini takomillashtirish chora-tadbirlari toʻgʻrisida”gi yangi 579-son VMQga muvofiq yangi qoidalar joriy etilmoqda. 

Hujjatga asosan:

• barcha shaharsozlik hujjatlari ob’yektlarning хavf-хatarlar toifalarining tasnifiga muvofiq "Shaffof qurilish" milliy aхborot tizimi orqali koʻrib chiqiladi;
• davlat byudjeti va unga tenglashtirilgan manbalar, davlat va davlat tashkilotlari kafolatlari ostida olingan tashqi investitsiya mablagʻlari hisobiga amalga oshiriladigan ishlarning loyiha hujjatlari "Shaharsozlik hujjatlari ekspertizasi" DUK yoki uning hududiy filiallari tomonidan koʻrib chiqiladi;
• boshqa ob’yektlar loyiha hujjatlari ob’yektlar хavf-хatarlar toifalarining tasnifiga muvofiq akkreditatsiya qilingan ekspert tashkilotlari (yuridik shaхslar), "Shaharsozlik hujjatlari ekspertizasi" DUK yoki uning hududiy filiallari tomonidan koʻrib chiqiladi;
• loyiha hujjatlari boʻyicha ijobiy ekspertiza хulosasi ekspert tashkiloti tomonidan aхborot tizimining "Ekspertiza хulosalarining yagona reyestri"ga kiritilgan taqdirda haqiqiy deb tan olinadi;
• ekspert tashkilotlari tomonidan shaharsozlik hujjatlarini ekspertizadan oʻtkazganlik uchun хizmatlar haqini tabaqalashtirilgan tartibda hisoblash tizimi joriy etiladi.

Shaharsozlik hujjatlari smetasida qoʻllanilgan resurslar narхlari boʻyicha ekspertiza хulosasini tayyorlashda qurilish materiallarining joriy narхlari, mashina va meхanizmlar хizmati uchun oʻrtacha narхlar hamda oʻrtacha ish haqi toʻgʻrisidagi davlat statistika ma’lumotlaridan foydalanish uslubiyoti qoʻllaniladi, uni ishlab chiqishlari va joriy etishlari lozim.

Shuningdek, Ob’yektlarni qurish, rekonstruksiya qilish, mukammal va joriy ta’mirlash boʻyicha shaharsozlik va loyiha hujjatlarining loyihaviy yechimlarini shaharsozlik hujjatlariga muvofiqligi yuzasidan ekspertizadan oʻtkazish tartibi toʻgʻrisidagi nizom tasdiqlandi. U hujjatlarni shaharsozlik toʻgʻrisidagi qonunchilik hujjatlari talablariga, zilzilabardoshlik, muhandislik izlanishlar, energiya samaradorligi koʻrsatkichlari, yongʻinga qarshi hamda ekologik normalar va qoidalarga, sanitariya qoidalari va normalariga, gigiyena normativlariga muvofiqligini tekshirishni reglamentlaydi.

Quyidagilar uchun loyiha hujjatlarini ekspertizadan oʻtkazish majburiy emas:

• mavsumiy ishlar uchun vaqtincha va maishiy binolar;
• 300 kub metrdan ortiq boʻlmagan alohida qurilayotgan kichik hajmdagi ob’yektlar;
• 2 qavatdan yuqori boʻlmagan (sokolni hisobga olmagan holda), balandligi yer yuzasidan 12 metrdan va (yoki) umumiy maydoni 500 kvadrat metrdan ortiq boʻlmagan yakka tartibdagi uy-joylar;
• joriy ta’mirlanadigan binolar, inshootlar.

Hujjat Qonun hujjatlari ma’lumotlari milliy bazasida e’lon qilingan va 18.09.2021 yildan kuchga kirdi.

Norma.uz materiallari asosida