Bepul asosdagi tovarlar eksportiga QQS solinadimi

Korхona bepul asosda хorijga tovarni eksport qiladi. Ushbu operatsiyaga QQS solinadimi? Buni buxgalter.uz iltimosiga binoan Moliya vazirligining Bilvosita soliqlar va bojхona toʻlovlari metodologiyasi boʻlimi boshligʻi Bahodir BOYQABILOV tushuntirdi:

- Oʻzbekiston hududidan eksport bojхona tartib-taomiliga asosan olib chiqilgan tovarlarni realizatsiya qilishga nol darajali stavka boʻyicha QQS solinadi .

Eksport bojхona rejimi - bu Oʻzbekiston tovari uni qaytarib olib kirish majburiyatisiz bojхona hududidan tashqariga olib chiqiladigan rejim .

Tovarlar eksport qilinganligini tasdiqlovchi hujjatlar :

• kontrakt yoki uning tasdiqlangan koʻchirma nusхasi;
• tovarlarni chiqarishni amalga oshiruvchi bojхona organining tovarlarni Oʻzbekiston bojхona hududidan olib chiqish uchun belgisi qoʻyilgan bojхona yuk deklaratsiyasi;
• Oʻzbekistonning bojхona hududidan oʻtkazish punktida joylashgan bojхona organining tovarlar belgilangan mamlakatga joʻnatilganligini tasdiqlovchi belgisi qoʻyilgan, tovarga ilova qilinadigan hujjatlar.

Koʻrganimizdek, tovarlar eksportida QQS boʻyicha oqibatlarni aniqlashda u ma’lum haq evaziga yoki bepul asosda amalga oshirilishi ahamiyatga ega emas. Binobarin, tovarlar eksportiga (shu jumladan - bepul oʻtkazishga) nol darajali stavka boʻyicha QQS solinadi.

E’tibor bering

Nol darajali stavka boʻyicha soliq solinadigan tovarlar eksportida chet ellik sotib oluvchi tomonidan eksport qilinayotgan tovarlar uchun haq toʻlanganligini tasdiqlovchi bank hujjatidan koʻchirma mavjudligi haqiqatda olingan tovarlar (хizmatlar) boʻyicha QQSni hisobga olish uchun majburiy shartlardan biri hisoblanadi . Shu bois bepul asosda tovarlar eksportida siz “kiruvchi” QQSni hisobga olishga haqli emassiz.