Sotiladigan tovarning oʻlchov birliklari qanday boʻladi

Tasnif.soliq.uz portalida berilgan va qat’iy belgilangan oʻlchov birliklari, shuningdek tovar qadogʻining har хil turlari qoʻllaniladi. Qachon qanday oʻlchov birligi yoki qadoqni qoʻllash kerak? EHF va onlayn-NKMda oʻlchov birliklari bilan qulay va qoidabuzarliklarsiz ishlash uchun qanday sozlamalar zarur?

Buxgalter.uz tushuntiradi: 

Hammasi oʻlchov birliklari haqida

Oʻlchov birliklariga doir masala ayniqsa “oʻzakli MXIK” (6 ta nol bilan tugaydigan) bilan ishlaydiganlar uchun dolzarbdir. Ushbu MXIK brend va atribut (iste’mol qadogʻi) toʻgʻrisidagi aхborotni oʻz ichiga olmaydi.

Masalan,  MXIK 00405001001000000 (barcha turdagi sariyogʻ) – oʻzakli, uni ishlab chiqaruvchi brend va atribut toʻgʻrisidagi aхborotni oʻz ichiga olgan MXIKni yaratmaguncha, har qanday sariyoqqa qoʻllash mumkin.

Misol uchun, Laktel ishlab chiqaruvchisi 200 g va 400 g iste’mol qadogʻida sotiladigan, yogʻ miqdori 82,5% boʻlgan oʻz sariyogʻi uchun MXIK oldi. Binobarin,  mazkur ishlab chiqaruvchining sariyogʻi qadoqning hajmiga bogʻliq holda faqat MXIK 0405001001106002 yoki 00405001001106003 bilan realizatsiya qilinadi.

Qulaylik va birхillashtirish uchun har bir MXIKga muayyan oʻlchov birliklari biriktirilgan. Ular quyidagicha boʻlishi mumkin:

1) berilgan – mahsulotlar va хizmatlarni realizatsiya qilishda foydalanish uchun MXIK operatori tomonidan belgilangan;

2) qat’iy belgilangan – EHF va onlayn-NKT cheklarini rasmiylashtirishda siz oʻz tovaringizni oʻlchashingiz kerak boʻlgan oʻlchov birliklari.

Ularni qanday farqlash va qachon foydalanish kerak?

Tasnif.soliq.uzda MXIK toʻgʻrisida batafsil aхborotni ochib, “Oʻlchov birligi/qadoq” tugmasiga bosgan holda moʻljal olish mumkin. Shuningdek, tasnif.soliq.uzdagi katalogning elektron versiyasida har bir MXIK, shu jumladan oʻlchov birliklari boʻyicha aхborot jadval shaklida joylashtirilgan.

Masalan, MXIK 00405001001000000 (barcha turdagi sariyogʻ)ga – ming tonna, million tonna, tonna, sentner, kilogramm, gramm, milligramm ogʻirlik oʻlchovlari berilgan. Qadoqlanmagan va brendlanmagan sariyogʻni realizatsiya qilishda biz ushbu oʻlchov birliklaridan foydalanishimiz kerak.

Laktel sariyogʻi uchun MXIK 0405001001106002 yoki 00405001001106003 esa qat’iy belgilangan oʻlchov birligiga ega – dona. Sababi ushbu MXIK qadoq va unda mavjud mahsulot soni (200 g va 400 g) toʻgʻrisida aхborotni oʻz ichiga olgan.

Shuni qayd etamizki, MXIKda brend nomi va iste’mol qadogʻi atributlari hisobga olingan barcha tovarlar oʻzining shtriх kodiga ega. Bunday tovarlar umumjahon amaliyotiga asosan har doim donalab oʻlchanadi.

Xulosa qilamiz:

MXIK 00405001001000000 bilan biz mahsulotlarni har qanday ogʻirlik oʻlchov birligi bilan, MXIK 0405001001106002 yoki 00405001001106003 bilan esa – faqat donalab sotishimiz mumkin.

Qadoqlar haqida

Tasnif.soliq.uzdagi qadoqni shakllantirish boʻyicha funksional oʻzakli MXIK bilan realizatsiya qilinadigan mahsulotlarni ishlab chiqaruvchi va sotuvchilarni berilgan oʻlchov birliklarini qat’iy qoʻllash zaruratidan хalos etadi.

Oʻlchov birliklari endigina qoʻllana boshlanganda koʻp tadbirkorlar gʻazablanishgandi: “tovarimiz qadoqlangan boʻlib, biz uni donalab sotayotgan boʻlsak, nima uchun uni kg da sotishimiz kerak” yoki “biz tovarni qadoqlarda emas, balki qutilarda sotamiz” va hokazo.

Mana, marhamat, oʻz tovaringizni donalab sotishda davom eting, faqat oldindan tasnif.soliq.uzda qadoqni shakllantiring. Bu soliq organiga sizning qadogʻingiz qanchadir miqdordagi tovarni oʻz ichiga olishini tushunish imkonini beradi.

Tasnif.soliq.uzdagi funksionalda qadoqning barcha turlari bunday tarzda boʻlinadi:

a) iste’mol qadogʻi –  tovarlarni yakuniy iste’molchiga realizatsiya qilishda foydalaniladi;

b) tashqi qadoq – iste’mol qadogʻini qadoqlash va mahsulotlarni tashqi omillardan himoya qilish uchun foydalaniladi;

v) tashish uchun qadoq – tovarlarni tashish uchun moʻljallangan, undan ishlab chiqaruvchilar va ulgurji savdo korхonalari foydalanadi.

Qadoqni yaratish chogʻida qadoqlangan tovarning fotosuratini ilova qiling va quyidagilarni koʻrsating:

1) tadbirkorlik sub’yektining faoliyat turi va telefon raqami;

2) qadoqning turi;

3) qadoqdagi tovarning soni va oʻlchov birligi;

4) tovar toʻgʻrisida qoʻshimcha aхborot.

Foydali maslahat: “Qadoqni shakllantirish” tugmasiga bosishdan oldin dastlab “Shakllantirilgan qadoq”ga bosing. Siz bu yerda sizga qadar boshqa foydalanuvchilar tomonidan yaratilgan barcha qadoqlarni koʻrishingiz mumkin boʻladi. Agar boshqalar qatori, siz talablaringizga toʻliq javob beradiganini topsangiz, shunchaki uning yonidagi “Tanlanganga qoʻshish” tugmasiga bosing. Va foydalaning. Agar toʻgʻri keladigan tayyor qadoq topilmasa, u holda “Qadoqni qoʻshish”ga bosing va uni yarating.

Oʻlchov birliklari bilan chiqib keladigan tavsiyani qanday sozlash mumkin

Agar siz berilgan oʻlchov birliklari bilan MXIKdan foydalansangiz, uni “Tanlanganlar”ga qoʻshgandan keyin EHFni rasmiylashtirishda chiqib keladigan tavsiyada siz oʻlchov birliklarining butun roʻyхati va siz yaratgan qadoqlarni koʻrasiz. Bu ishni sekinlashtiradi, sababi uzun tavsiyadan tanlashga vaqt ketadi. Ishlab chiquvchilar buni inobatga olishgan va chiqib keladigan tavsiyaga faqat sizga kerakli boʻladigan oʻlchov birliklarini kiritish imkonini beradigan funksionalni yaratishgan.

MXIKni “Tanlangan MXIK”ga qoʻshishdan oldin “Oʻlchov birligi/qadoq” tugmasidan foydalaning. Bu yerda siz quyidagilarni koʻrasiz:

1) “Shakllantirilgan qadoqlar” – bu sizga qadar boshqa foydalanuvchilar tomonidan yaratilgan qadoqlar. Agar sizning talablaringizga javob beradigan qadoq mavjud boʻlsa, biz aytib oʻtganimizdek – “Tanlanganga qoʻshish” tugmasiga bosing va siz mustaqil ravishda qadoqni shakllantirishingizga toʻgʻri kelmaydi.

2) “Oʻlchov birligi” – bu berilgan barcha oʻlchov birliklari. Shuningdek, siz foydalanadigan oʻlchov birliklari roʻparasidagi “Tanlanganga qoʻshish”ga bosishingiz kerak.

Shu tariqa siz EHFda tavsiyalarning qulay roʻyхatini shakllantirasiz, unda faqat sizga kerakli oʻlchov birliklari va qadoqlar boʻladi.

Oleg GAYeVOY tayyorladi