Иш ҳақи қандай тўланиши керак

Тавсияда:

– иш ҳақи тўланадиган валюта;
– иш ҳақини тўлаш муддатлари;
– иш ҳақи ва бошқа тўловлар кечиктирилганлиги учун фоизлар (компенсация) тўлов;
– бўнакнинг тўланиши;
– иш ҳақини бериш кунларини белгилаш;
– ойлик иш ҳақининг шакллари;
– иш ҳақининг берилиши;
– иш ҳақининг пластик карталарга ўтказилиши:
      ходимларга банк карталарини очиш;
      иш ҳақининг банк карталарига ўтказиладиган қисми;
      иш ҳақининг банк картасига ўтказилишини расмийлаштириш;
– берилмаган иш ҳақини депонентга ўтказиш;
– ҳисоб-китоб варақасини тузиш.

Иш ҳақини қандай валютада тўлаш керак

Иш ҳақи миллий валюта – сўмда тўланади, қонунчиликда назарда тутилган ҳоллар бундан мустасно . Иш ҳақини қарз мажбуриятлари, тилхатлар, купонлар тарзида тўлаш тақиқланади.

Иш ҳақини чет эл валютасида тўлаш Ўзбекистон ҳудудида рухсат берилган ҳисоб-китоблар рўйхатига кирмайди  . Бунда Президентнинг қарорига мувофиқ Ўзбекистондаги корхоналарга, давлат муассасаларига ва илмий-таълим ташкилотларига чет элдан жалб этилган хорижий мутахассислар иш ҳақини ўзининг хоҳишига кўра миллий валютада ёки хориждаги ҳисобварақларига ўтказган ҳолда чет эл валютасида олишлари мумкин .

Мисол учун, иш ҳақи чет эл валютасида қуйидагиларга хориждаги ҳисобварақларига маблағларни ўтказиш йўли билан тўланиши мумкин:

• «LG CNS Uzbekistan» ҚКга ишга жалб этилган хорижий жисмоний шахсларга ;

• Ислом Каримов номидаги Тошкент давлат техника университети ҳузуридаги Ўзбекистон-Япония ёшлар инновация марказининг чет эллик ходимларига .