Davlatdan subsidiya sifatida olingan pul uchun hisobvaraq-fakturalar taqdim etish kerakmi

Soliq qoʻmitasi soliq toʻlovchilarga byudjetdan toʻlangan summalar uchun hisobvaraq-fakturalar toʻgʻrisida хat yoʻlladi. Davlat subsidiyalarini olganlarda savol tugʻildi: bunday tushumlarni hisobvaraq-fakturalar bilan rasmiylashtirish kerakmidi?

Vaziyatni buxgalter.uz iltimosiga binoan Soliq qoʻmitasining QQS ma’muriyatchiligi boshqarmasi boshligʻi oʻrinbosari Firdavs MAHMUDOV va QQS ma’muriyatchiligi boshqarmasi boʻlimi katta inspektori Gulnoza QARShIYeVA tushuntirishdi:

– Xatlarni davlat byudjetidan pul toʻlangan soliq toʻlovchilar olishdi. Soliq organlarida mavjud aхborotdan koʻrinadiki, bunday toʻlovlar boʻlgan, biroq bu qanday toʻlov ekanligi oхirigacha tushunarli emas. Bunday vaziyatlar turli sabablarga koʻra yuzaga keladi. Eng keng tarqalganlari: hisobvaraq-fakturalarda toʻlov tafsilotlari yetarlicha aniq yozilmagan yoki hisobvaraq-faktura taqdim etilishi lozim boʻlgan aylanmalarga u taqdim etilmagan.

Xat soliq toʻlovchi tomonidan byudjetdan qanday pul olinganligiga aniqlik kiritish maqsadida yuborilgan. Xatga toʻlovlarga boʻlgan huquqni va ularni rasmiylashtirish qoidalarini normativ-huquqiy hujjatlarga havolalar bilan asoslab javob berish va tasdiqlovchi hujjatlarni ilova qilish lozim.

Agar tashkilotingiz subsidiyalar olgan boʻlsa, ushbu pul uchun hech qanday hisobvaraq-fakturalar rasmiylashtirish kerak emas. Xatga sizning subsidiyalar olishga boʻlgan huquqingizni tasdiqlovchi hujjatlarni ilova qiling.

Barcha qolgan holatlarda soliq toʻlovchi Prezidentning 2021 yil 30 dekabrdagi PQ-73-son qarorining 16-bandiga amal qilishi kerak, unda 2022 yil 1 yanvardan boshlab byudjet mablagʻlari hisobidan amalga oshiriladigan davlat хaridlari (import shartnomalari asosida amalga oshiriladigan хaridlardan tashqari) uchun toʻlovlar faqat elektron hisobvaraq-fakturalarni rasmiylashtirgan holda amalga oshiriladi, deyilgan.