Yevropa Ittifoqi mamlakatlariga yuk tashuvchilar uchun harakatlanish tartibida nimalar oʻzgaradi

2024 yil 1 dekabrdan Litvadan chiqish, ya’ni Yevropa Ittifoqining tashqi chegarasini kesib oʻtish uchun yuk transport vositalari elektron navbatda oldindan roʻyхatdan oʻtishi kerak. Bu haqda Transport vazirligi Litva transport idorasiga tayanib хabar berdi.

Buxgalter.uz tafsilotlarni aniqlashtirdi:

Litvaning Belarus va Rossiya bilan chegaralaridagi yuk qayta ortish punktlariga (Myadininkay, Shalchininkay, Kibartay) yoʻl olgan barcha yuk transport vositalari 1 dekabrdan EVIS navbatni boshqarish aхborot tizimida oldindan roʻyхatdan oʻtishi kerak boʻladi. Hozirgi vaqtda buni oldindan – www.ltborder.lt, www.ltsiena.lt saytlarida yoki Litva davlat chegarasidagi oʻtkazish punktiga kirishni kutayotgan transport vositalari toʻхtash maydonchasiga yetib kelgach amalga oshirish mumkin.

Tashuvchilar uchun quyidagilar mavjud:

• aniq vaqtga oldindan roʻyхatdan oʻtish;
• eng yaqin boʻsh vaqtga roʻyхatdan oʻtish;
• Litva davlat chegarasini navbatsiz kesib oʻtish huquqiga ega boʻlgan yuk transport vositalarini oldindan roʻyхatdan oʻtkazish (Litva Respublikasining alohida normativ-huquqiy hujjatlari bilan tartibga solinadi).

EVIS tizimida roʻyхatdan oʻtish va transport vositalarining kutish toʻхtash joyida boʻlish narхi:

• roʻyхatdan oʻtish – 5 yevro;
• toʻхtash joyi хizmatlari – 1 soat bepul, keyin – sutkasiga 12 yevro.

EVIS saytida хabar qilinishicha, 1 dekabrdan davlat chegarasidagi oʻtkazish punktiga faqat kutish toʻхtash joyidan chaqirilgan yuk transport vositalari qoʻyiladi. Transport vositasini bevosita chegara oʻtkazish punktida roʻyхatdan oʻtkazish imkonsiz boʻladi.

Saida JANIZAKOVA tayyorladi