JShDS va ijtimoiy soliq boʻyicha hisobotni qanday toʻldirish kerak

Tavsiyada:

– JShDS va ijtimoiy soliq boʻyicha hisobotni toʻldirish tartibi va toʻldirishga doir misol;
– bosh ofis va filial uchun hisobotni toʻldirishga doir misollar.

JShDS va ijtimoiy soliq boʻyicha hisobotni toʻldirish va taqdim etish uchun elektron raqamli imzoingiz (ERI) yordamida my.soliq.uz saytidagi soliq toʻlovchining shaxsiy kabinetiga kiring va 11101_18 kodi ostidagi hisobot shaklini tanlang.

JShDS va ijtimoiy soliq boʻyicha hisobotning tarkibiga quyidagilar kiradi:

• JShDS va ijtimoiy soliq hisob-kitobi;
• 1-ilova. «Ijtimoiy soliq hisoblanmaydigan toʻlov turlari»;
• 2-ilova. «Jismoniy shaxslarning soliq solishdan ozod etilgan daromadlari yoyilmasi»;
• 3-ilova. «Mol-mulkni ijaraga beruvchi jismoniy shaxslar uchun belgilangan ijara toʻlovining eng kam miqdori ma’lumotnoma-hisob-kitobi»;
• 4-ilova. «Har bir jismoniy shaxs kesimida hisoblangan mehnatga haq toʻlash tarzidagi daromadlar va jismoniy shaxslardan olinadigan daromad soligʻi toʻgʻrisida ma’lumot»;
• 5-ilova. «Har bir jismoniy shaxs kesimida hisoblangan mulkiy (dividend va foizlardan tashqari), moddiy naf tarzidagi va boshqa daromadlar hamda jismoniy shaxslardan olinadigan daromad soligʻi toʻgʻrisida ma’lumot»;
• 6-ilova. «Bajarilgan qurilish ishlari uchun ish haqini hisoblash toʻgʻrisidagi ma’lumotnoma»;
• 7-ilova. «Har bir jismoniy shaxs kesimida  jismoniy shaxslardan  kasanachilik faoliyati boʻyicha olinadigan daromadlar va daromad soligʻi toʻgʻrisidagi ma’lumotlar».

JShDS va ijtimoiy soliq hisob-kitobini qanday toʻldirish kerak 

Hisobotni yil boshidan oʻsib boruvchi yakun bilan soʻmda toʻldiring.

Birinchi navbatda hisob-kitob turi, yil va davrni koʻrsatgan holda hisobotning kirish qismini toʻldirish lozim. Shuningdek, hisobot davridagi xodimlarning oʻrtacha sonini, shu jumladan korxonangiz asosiy ish joyi hisoblanmaydigan xodimlarning sonini koʻrsating. Ushbu ma’lumotlar koʻrsatilmaganda, tizim sizga Hisob-kitobning jadval qismiga ma’lumotlar kiritilishiga yoʻl bermaydi.

011-satrda soliq davri boshidan boshlab mehnatga haq toʻlash tarzidagi daromadlarni akt ettiring. 011-satrning qiymati Hisob-kitobga 4-ilovaning 11-ustuniga mos kelishi kerak.

0110-satrda hisobot oyi uchun mehnatga haq toʻlash tarzidagi daromadni koʻrsating. 0110-satrning qiymati Hisob-kitobga 4-ilovaning 12-ustuniga mos kelishi kerak.

0111-satrda Oʻzbekiston hududida ishlash uchun xorijiy kadrlar bilan ta’minlashga doir xizmatlar koʻrsatish shartnomalari boʻyicha Oʻzbekiston norezidenti boʻlgan yuridik shaxsga toʻlanadigan xorijiy xodimlarning daromadlarini koʻrsating.

012-satrda mehnatga haq toʻlash bilan bogʻliq boʻlmagan daromadlarni aks ettiring  (dividendlar va foizlardan tashqari) . Ushbu satrning qiymati 5-ilovaning 5-ustuniga teng boʻlishi kerak.

012-satrda koʻrsatilgan daromadlardan korxonangiz bilan mehnat munosabatlarida boʻlmagan jismoniy shaxsning yozma arizasi asosida JShDS ushlab qolinmagan, moddiy naf koʻrinishidagi daromadlarni ajrating 
va 0121-satrda koʻrsating.

013-satrda jismoniy shaxslarning kasanachilik faoliyatidan olayotgan daromadlarini koʻrsating. 013-satrning qiymati Hisob-kitobga 7-ilovaning 5-ustuni qiymatiga mos kelishi kerak.

1-ilovaning 010-satri qiymatini dastur avtomatik tarzda 020-«Ijtimoiy soliq hisoblanmaydigan toʻlov turlari» satriga koʻchirib oʻtkazadi. 

2-ilovaning 010-satri qiymatini dastur avtomatik tarzda 030-«Jismoniy shaxslarning soliq solishdan ozod etilgan daromadlari» satriga koʻchirib oʻtkazadi.

040-«Soliq bazasi» satrini dastur avtomatik tarzda hisoblab chiqadi.

050-satrda JShDS, ijtimoiy soliq va ShJBPHga badallar stavkalarini koʻrsating.

Soliq stavkalari kiritilgandan soʻng dastur soliq bazasini (040-satr) stavkaga (050-satr) koʻpaytirish orqali JShDS va ijtimoiy soliq summasini hisoblab chiqadi va 060-satrda aks ettiradi.

Faqat ShJBPHga badallar summasini oʻzingiz hisoblab kiriting.

061-satrni, agar siz 25 nafar va undan ortiq xodimlar boʻlgan alohida boʻlinmalarga va (yoki) filiallarga ega boʻlsangiz, toʻldiring. Bunda alohida boʻlinma va (yoki) filiallar ijtimoiy soliq summasini (5 va 6-ustunlarda), yuridik shaxsning rahbari esa – alohida boʻlinma va (yoki) filiallarga tegishli boʻlgan JShDS summasini ayirib tashlaydi (7-ustun).

070-satrning 7-ustunida shartnomada koʻrsatilgan narxdan kelib chiqqan holda, mol-mulkni ijaraga berishdan olingan daromaddan hisoblangan soliq summasini koʻrsating.  

Shuningdek, jismoniy shaxsdan mol-mulk ijaraga olingan holatlarda 3-ilovani ham toʻldiring. Agarda mahalliy hokimiyat organlari tomonidan belgilangan oshiruvchi koeffitsiyentni hisobga olgan holda ijara uchun belgilangan eng kam miqdor ijara shartnomasida koʻrsatilgan miqdordan yuqori boʻlsa, 3-ilovaning 070-satrida qoʻshimcha hisoblangan JShDS summasi aks ettiriladi. 3-ilovaning 070-satri qiymati avtomatik tarzda Hisob-kitobning 071-«Joriy davr uchun jismoniy shaxslarning daromad soligʻidan qoʻshimcha hisoblangan soliq» satriga koʻchiriladi.

080-satrda ShJBPHga ixtiyoriy badallarning summasi aks ettiriladi.

090-satrda dastur avtomatik tarzda hisobot davrida toʻlanishi lozim boʻlgan JShDS, ijtimoiy soliq va ShJBPHga badallarning umumiy summasini hisoblab chiqaradi.

Agar sizda ijtimoiy soliq solinmaydigan toʻlovlar mavjud boʻlsa, 1-ilovani quyidagilarga muvofiq toʻldiring:

• Soliq kodeksiga ;
• boshqa me’yoriy-huquqiy hujjatlarga.

2023 yildan 1-ilovaning 0401–0410-satrlarida ijtimoiy soliqning pasaytirilgan stavkalari qoʻllaniladigan daromadlar aks ettiriladi. Buning uchun roʻyxatdan imtiyoz uchun asosni tanlab, imtiyozli daromad summasini va pasaytirilgan stavka boʻyicha ijtimoiy soliq summasini koʻrsating. 0401–0410-satrlar qiymatlari avtomatik tarzda ilovaning 040-satrida qoʻshiladi va ularning summasi Hisob-kitobning 060-satri 6-ustunida aks ettiriladi.

Agar siz jismoniy shaxslarga, shu jumladan norezidentlarga JShDS solinmaydigan daromadlarni toʻlasangiz, 
2-ilovani quyidagilarga muvofiq toʻldiring:

• Soliq kodeksiga ;

• boshqa me’yoriy-huquqiy hujjatlarga.

Agar siz jismoniy shaxslardan quyidagilarni ijaraga olgan boʻlsangiz, 3-ilovani toʻldiring:

• binolarni – turar joy yoki noturar joylarni;
• transport vositalarini – yengil yoki yuk avtomobilini, avtobus yoki mikroavtobusni.

2025 yilning yanvar oyi uchun hisobotdan boshlab 3-ilovada koʻchmas mulk va transport vositalari boʻyicha ijara toʻlovining eng kam miqdori turli satrlarda aks ettiriladi:

• transport vositalari boʻyicha – 020-satrning 10 va 11-ustunlarida;
• turar joy va noturar joy koʻchmas mulklari boʻyicha – 030-satrning 4–9-ustunlarida.

Ijaradan olingan daromadlarni toʻlab berilganda Hisob-kitobni toʻldirishga oid misolni batafsil bu yerda qarang.

4-ilovani toʻldirish uchun fayl-shablonni yuklab oling va daromad oluvchi har bir jismoniy shaxs (rezident/norezident) boʻyicha toʻldiring.

Unda quyidagilarni aks ettiring: 

• mehnatga haq toʻlash tarzida hisoblangan daromadlarni;

• ShJBPHga badallar chegirib tashlanmagan holda hisoblangan JShDSni.

5-ilovani toʻldirish uchun shablon-faylni yuklab oling va, agar siz jismoniy shaxslarga quyidagi daromadlarni hisoblagan boʻlsangiz, daromad oluvchi har bir jismoniy shaxs boʻyicha toʻldiring:

• mulkiy daromadlar, dividendlar va foizlar bundan mustasno ;
• moddiy naf tarzidagi daromadlar ;
• boshqa daromadlar .

Agar siz jismoniy shaxsning arizasiga binoan moddiy naf tarzidagi daromaddan soliq ushlab qolmagan boʻlsangiz,
9-ustunda «0»ni koʻrsating .

Agar siz qurilish ishlarini bajarsangiz, 6-ilovaning fayl-shablonini yuklab oling va uni toʻldiring. Bunda siz xodimlarni shartnomasiz yollaysizmi yoki yoʻqmi – ahamiyatsiz .

Ilovada quyidagilarni koʻrsating:

• agar bosh pudratchi boʻlsangiz, quyidagi ma’lumotlarni:

 – loyiha-smeta hujjatlariga asosan har bir qurilish ob’yekti boʻyicha;
– oʻz kuchingiz va subpudratchi yordamida bajarilgan barcha ishlarning haqiqiy koʻrsatkichlarini;

• agar subpudratchi boʻlsangiz, faqat haqiqatda bajarilgan ishlar hajmi va sarflangan mehnat haqi fondi boʻyicha ma’lumotlarni keltiring.

Hisob-kitobni toʻldirishga doir misolni bu yerda qarang.

7-ilovani fayl-shablonda uyda ishlarni bajaradigan har bir kasanachi xodim boʻyicha toʻldiring. Ilovada har bir xodim boʻyicha soliq solinadigan va solinmaydigan daromadlarni ajratish imkoniyati mavjud.

Toʻldirilgan fayl-shablonni 4, 5, 6 va 7-ilovalar bilan hisobotga biriktiring.

Barcha hisobot shakllari toʻldirilgandan soʻng nima qilish kerak

JShDS va ijtimoiy soliq boʻyicha barcha hisobot shakllari toʻldirilganidan soʻng siz:

• hisobotni saqlab qoʻyishingiz va keyinroq yuborishingiz;
• hisobotni zudlik bilan yuborishingiz mumkin boʻladi.

«Jurnal» boʻlimida hisobotning holatini tekshiring: u soliq organlari tomonidan qabul qilinganmi yoki xatolar mavjudligi tufayli rad etilganmi.