ЖШДС ва ижтимоий солиқ бўйича ҳисоботни қандай тўлдириш керак

Тавсияда:

– ЖШДС ва ижтимоий солиқ бўйича ҳисоботни тўлдириш тартиби ва тўлдиришга доир мисол;
– бош офис ва филиал учун ҳисоботни тўлдиришга доир мисоллар.

ЖШДС ва ижтимоий солиқ бўйича ҳисоботни тўлдириш ва тақдим этиш учун электрон рақамли имзоингиз (ЭРИ) ёрдамида my.soliq.uz сайтидаги солиқ тўловчининг шахсий кабинетига киринг ва 11101_18 коди остидаги ҳисобот шаклини танланг.

ЖШДС ва ижтимоий солиқ бўйича ҳисоботнинг таркибига қуйидагилар киради:

• ЖШДС ва ижтимоий солиқ ҳисоб-китоби;
• 1-илова. «Ижтимоий солиқ ҳисобланмайдиган тўлов турлари»;
• 2-илова. «Жисмоний шахсларнинг солиқ солишдан озод этилган даромадлари ёйилмаси»;
• 3-илова. «Мол-мулкни ижарага берувчи жисмоний шахслар учун белгиланган ижара тўловининг энг кам миқдори маълумотнома-ҳисоб-китоби»;
• 4-илова. «Ҳар бир жисмоний шахс кесимида ҳисобланган меҳнатга ҳақ тўлаш тарзидаги даромадлар ва жисмоний шахслардан олинадиган даромад солиғи тўғрисида маълумот»;
• 5-илова. «Ҳар бир жисмоний шахс кесимида ҳисобланган мулкий (дивиденд ва фоизлардан ташқари), моддий наф тарзидаги ва бошқа даромадлар ҳамда жисмоний шахслардан олинадиган даромад солиғи тўғрисида маълумот»;
• 6-илова. «Бажарилган қурилиш ишлари учун иш ҳақини ҳисоблаш тўғрисидаги маълумотнома»;
• 7-илова. «Ҳар бир жисмоний шахс кесимида  жисмоний шахслардан  касаначилик фаолияти бўйича олинадиган даромадлар ва даромад солиғи тўғрисидаги маълумотлар».

ЖШДС ва ижтимоий солиқ ҳисоб-китобини қандай тўлдириш керак 

Ҳисоботни йил бошидан ўсиб борувчи якун билан сўмда тўлдиринг.

Биринчи навбатда ҳисоб-китоб тури, йил ва даврни кўрсатган ҳолда ҳисоботнинг кириш қисмини тўлдириш лозим. Шунингдек, ҳисобот давридаги ходимларнинг ўртача сонини, шу жумладан корхонангиз асосий иш жойи ҳисобланмайдиган ходимларнинг сонини кўрсатинг. Ушбу маълумотлар кўрсатилмаганда, тизим сизга Ҳисоб-китобнинг жадвал қисмига маълумотлар киритилишига йўл бермайди.

011-сатрда солиқ даври бошидан бошлаб меҳнатга ҳақ тўлаш тарзидаги даромадларни акт эттиринг. 011-сатрнинг қиймати Ҳисоб-китобга 4-илованинг 11-устунига мос келиши керак.

0110-сатрда ҳисобот ойи учун меҳнатга ҳақ тўлаш тарзидаги даромадни кўрсатинг. 0110-сатрнинг қиймати Ҳисоб-китобга 4-илованинг 12-устунига мос келиши керак.

0111-сатрда Ўзбекистон ҳудудида ишлаш учун хорижий кадрлар билан таъминлашга доир хизматлар кўрсатиш шартномалари бўйича Ўзбекистон норезиденти бўлган юридик шахсга тўланадиган хорижий ходимларнинг даромадларини кўрсатинг.

012-сатрда меҳнатга ҳақ тўлаш билан боғлиқ бўлмаган даромадларни акс эттиринг  (дивидендлар ва фоизлардан ташқари) . Ушбу сатрнинг қиймати 5-илованинг 5-устунига тенг бўлиши керак.

012-сатрда кўрсатилган даромадлардан корхонангиз билан меҳнат муносабатларида бўлмаган жисмоний шахснинг ёзма аризаси асосида ЖШДС ушлаб қолинмаган, моддий наф кўринишидаги даромадларни ажратинг 
ва 0121-сатрда кўрсатинг.

013-сатрда жисмоний шахсларнинг касаначилик фаолиятидан олаётган даромадларини кўрсатинг. 013-сатрнинг қиймати Ҳисоб-китобга 7-илованинг 5-устуни қийматига мос келиши керак.

1-илованинг 010-сатри қийматини дастур автоматик тарзда 020-«Ижтимоий солиқ ҳисобланмайдиган тўлов турлари» сатрига кўчириб ўтказади. 

2-илованинг 010-сатри қийматини дастур автоматик тарзда 030-«Жисмоний шахсларнинг солиқ солишдан озод этилган даромадлари» сатрига кўчириб ўтказади.

040-«Солиқ базаси» сатрини дастур автоматик тарзда ҳисоблаб чиқади.

050-сатрда ЖШДС, ижтимоий солиқ ва ШЖБПҲга бадаллар ставкаларини кўрсатинг.

Солиқ ставкалари киритилгандан сўнг дастур солиқ базасини (040-сатр) ставкага (050-сатр) кўпайтириш орқали ЖШДС ва ижтимоий солиқ суммасини ҳисоблаб чиқади ва 060-сатрда акс эттиради.

Фақат ШЖБПҲга бадаллар суммасини ўзингиз ҳисоблаб киритинг.

061-сатрни, агар сиз 25 нафар ва ундан ортиқ ходимлар бўлган алоҳида бўлинмаларга ва (ёки) филиалларга эга бўлсангиз, тўлдиринг. Бунда алоҳида бўлинма ва (ёки) филиаллар ижтимоий солиқ суммасини (5 ва 6-устунларда), юридик шахснинг раҳбари эса – алоҳида бўлинма ва (ёки) филиалларга тегишли бўлган ЖШДС суммасини айириб ташлайди (7-устун).

070-сатрнинг 7-устунида шартномада кўрсатилган нархдан келиб чиққан ҳолда, мол-мулкни ижарага беришдан олинган даромаддан ҳисобланган солиқ суммасини кўрсатинг.  

Шунингдек, жисмоний шахсдан мол-мулк ижарага олинган ҳолатларда 3-иловани ҳам тўлдиринг. Агарда маҳаллий ҳокимият органлари томонидан белгиланган оширувчи коэффициентни ҳисобга олган ҳолда ижара учун белгиланган энг кам миқдор ижара шартномасида кўрсатилган миқдордан юқори бўлса, 3-илованинг 070-сатрида қўшимча ҳисобланган ЖШДС суммаси акс эттирилади. 3-илованинг 070-сатри қиймати автоматик тарзда Ҳисоб-китобнинг 071-«Жорий давр учун жисмоний шахсларнинг даромад солиғидан қўшимча ҳисобланган солиқ» сатрига кўчирилади.

080-сатрда ШЖБПҲга ихтиёрий бадалларнинг суммаси акс эттирилади.

090-сатрда дастур автоматик тарзда ҳисобот даврида тўланиши лозим бўлган ЖШДС, ижтимоий солиқ ва ШЖБПҲга бадалларнинг умумий суммасини ҳисоблаб чиқаради.

Агар сизда ижтимоий солиқ солинмайдиган тўловлар мавжуд бўлса, 1-иловани қуйидагиларга мувофиқ тўлдиринг:

• Солиқ кодексига ;
• бошқа меъёрий-ҳуқуқий ҳужжатларга.

2023 йилдан 1-илованинг 0401–0410-сатрларида ижтимоий солиқнинг пасайтирилган ставкалари қўлланиладиган даромадлар акс эттирилади. Бунинг учун рўйхатдан имтиёз учун асосни танлаб, имтиёзли даромад суммасини ва пасайтирилган ставка бўйича ижтимоий солиқ суммасини кўрсатинг. 0401–0410-сатрлар қийматлари автоматик тарзда илованинг 040-сатрида қўшилади ва уларнинг суммаси Ҳисоб-китобнинг 060-сатри 6-устунида акс эттирилади.

Агар сиз жисмоний шахсларга, шу жумладан норезидентларга ЖШДС солинмайдиган даромадларни тўласангиз, 
2-иловани қуйидагиларга мувофиқ тўлдиринг:

• Солиқ кодексига ;

• бошқа меъёрий-ҳуқуқий ҳужжатларга.

Aгар сиз жисмоний шахслардан қуйидагиларни ижарага олган бўлсангиз, 3-иловани тўлдиринг:

• биноларни – турар жой ёки нотурар жойларни;
• транспорт воситаларини – енгил ёки юк автомобилини, автобус ёки микроавтобусни.

2025 йилнинг январь ойи учун ҳисоботдан бошлаб 3-иловада кўчмас мулк ва транспорт воситалари бўйича ижара тўловининг энг кам миқдори турли сатрларда акс эттирилади:

• транспорт воситалари бўйича – 020-сатрнинг 10 ва 11-устунларида;
• турар жой ва нотурар жой кўчмас мулклари бўйича – 030-сатрнинг 4–9-устунларида.

Ижарадан олинган даромадларни тўлаб берилганда Ҳисоб-китобни тўлдиришга оид мисолни батафсил бу ерда қаранг.

4-иловани тўлдириш учун файл-шаблонни юклаб олинг ва даромад олувчи ҳар бир жисмоний шахс (резидент/норезидент) бўйича тўлдиринг.

Унда қуйидагиларни акс эттиринг: 

• меҳнатга ҳақ тўлаш тарзида ҳисобланган даромадларни;

• ШЖБПҲга бадаллар чегириб ташланмаган ҳолда ҳисобланган ЖШДСни.

5-иловани тўлдириш учун шаблон-файлни юклаб олинг ва, агар сиз жисмоний шахсларга қуйидаги даромадларни ҳисоблаган бўлсангиз, даромад олувчи ҳар бир жисмоний шахс бўйича тўлдиринг:

• мулкий даромадлар, дивидендлар ва фоизлар бундан мустасно ;
• моддий наф тарзидаги даромадлар ;
• бошқа даромадлар .

Aгар сиз жисмоний шахснинг аризасига биноан моддий наф тарзидаги даромаддан солиқ ушлаб қолмаган бўлсангиз,
9-устунда «0»ни кўрсатинг .

Агар сиз қурилиш ишларини бажарсангиз, 6-илованинг файл-шаблонини юклаб олинг ва уни тўлдиринг. Бунда сиз ходимларни шартномасиз ёллайсизми ёки йўқми – аҳамиятсиз .

Иловада қуйидагиларни кўрсатинг:

• агар бош пудратчи бўлсангиз, қуйидаги маълумотларни:

 – лойиҳа-смета ҳужжатларига асосан ҳар бир қурилиш объекти бўйича;
– ўз кучингиз ва субпудратчи ёрдамида бажарилган барча ишларнинг ҳақиқий кўрсаткичларини;

• агар субпудратчи бўлсангиз, фақат ҳақиқатда бажарилган ишлар ҳажми ва сарфланган меҳнат ҳақи фонди бўйича маълумотларни келтиринг.

Ҳисоб-китобни тўлдиришга доир мисолни бу ерда қаранг.

7-иловани файл-шаблонда уйда ишларни бажарадиган ҳар бир касаначи ходим бўйича тўлдиринг. Иловада ҳар бир ходим бўйича солиқ солинадиган ва солинмайдиган даромадларни ажратиш имконияти мавжуд.

Тўлдирилган файл-шаблонни 4, 5, 6 ва 7-иловалар билан ҳисоботга бириктиринг.

Барча ҳисобот шакллари тўлдирилгандан сўнг нима қилиш керак

ЖШДС ва ижтимоий солиқ бўйича барча ҳисобот шакллари тўлдирилганидан сўнг сиз:

• ҳисоботни сақлаб қўйишингиз ва кейинроқ юборишингиз;
• ҳисоботни зудлик билан юборишингиз мумкин бўлади.

«Журнал» бўлимида ҳисоботнинг ҳолатини текширинг: у солиқ органлари томонидан қабул қилинганми ёки хатолар мавжудлиги туфайли рад этилганми.