Ochiq muloqot – 2025: Prezident Farmonida qanday choralar belgilandi

preview

19 avgustda Prezident bilan V ochiq muloqotda belgilangan vazifalarni amalga oshirish chora-tadbirlari toʻgʻrisidagi Farmon imzolandi.

Uchrashuvning dastlabki yakunlari QQS boʻyicha «amnistiya» va 2026 yildan boshlab tadbirkorlarni yer soligʻi, mol-mulk soligʻi, ijtimoiy soliq va JShDS boʻyicha hisobotlar tuzish majburiyatidan ozod qilish taklifi bilan qiziqtirdi. Endi ushbu chora-tadbirlar Farmonda qanday ifodalanganini koʻramiz:

Muhim yangiliklarni oʻtkazib yubormaslik uchun Telegram kanalimizga obuna boʻling.

 

Farmondan eng katta qiziqish uygʻotgan parchalarni e’lon qilamiz:

 

1. Turizm, joylashtirish vositalari

  • Tashqi savdo operatsiyalari boʻyicha muddati oʻtgan debitor qarzdorlik uchun ustav kapitalida davlat ulushi boʻlmagan xoʻjalik yurituvchi sub’yektlarga jarimalar qoʻllash va undirishga 2027 yil 1 yanvarga qadar moratoriy joriy etiladi. Bunda moratoriy davrida muddati oʻtgan debitor qarzdorlik bartaraf etilganda qoʻllanilgan jarimalar bekor qilinadi

*Tahr. izohi: biz buni shunday tushundikki, moratoriy davrida jarimalar baribir hisoblanadi, lekin 2027 yil 1 yanvargacha undirilmaydi.

  • 2026 yildan boshlab quyidagilarni nazarda tutuvchi Turizmni rivojlantirish dasturi joriy etiladi:

– 2026–2028 yillarda joylashtirish vositalarini tashkil qilish uchun kamida 5 ming gektar yer uchastkalarini elektron onlayn auksionga chiqarish;

 – yer uchastkalarining auksionda shakllangan narxidan kelib chiqib, quriladigan mehmonxona UF (UK)ning 50 foizidan oshmagan qismigacha davlat ulushi bilan kirish yuzasidan sheriklik bitimlari tuzish mexanizmi;

– davlat ulushini 10 yil davomida bozor qiymatida mulk ishtirokchisi yoki boshqa salohiyatli investorlarga realizatsiya qilish imkoniyati;

– 2026–2028 yillarda tijorat banklari tomonidan barcha toifadagi tadbirkorlik sub’yektlariga mehmonxona qurish uchun 7 yil muddatgacha imtiyozli kreditlar: viloyat markazlari, Toshkent va Nukus shaharlari, turizm ixtisoslashgan tuman (shahar)larda qurilayotgan mehmonxonalar uchun – 30 mlrd soʻmgacha; boshqa hududlarda – 10 mlrd soʻmgacha;

– har yili sayyohlarning eng koʻp e’tiborini qozongan va nufuzli xalqaro platformalarda ijobiy e’tirof etilgan joylashtirish vositalarini aniqlash va taqdirlash boʻyicha mukofot jamgʻarmasi 1 million AQSh dollariga teng tanlov.

  • 2026 yil 1 yanvardan boshlab:

– respublika tuman va shaharlarida (viloyatlar markazlari, Toshkent va Nukus shaharlari, Vazirlar Mahkamasi tomonidan tasdiqlanadigan roʻyxatga kiritilgan turizm salohiyati yuqori boʻlgan tuman (shahar)lar va turistik zonalar bundan mustasno) joylashgan joylashtirish vositalari uchun turistik (mehmonxona) yigʻimini hisoblash va toʻlash tartibi bekor qilinadi;

– oilaviy mehmon uyi sifatida tan olish uchun bir vaqtning oʻzida vaqtincha yashash va (yoki) ovqatlanish boʻyicha xizmatlar koʻrsatish mumkin boʻlgan tashrif buyuruvchilar (turistlar) soni boʻyicha belgilangan chegara miqdori 2 baravar oshiriladi.

  • 2026 yil 1 yanvardan boshlab tadbirkorlik sub’yektlarining yangi mehmonxonani qurish va jihozlash uchun ketgan xarajatlarining bir qismini davlat byudjetidan qoplab berish tizimi mehmonxonani qoʻshimcha bino va inshootlar qurish orqali kengaytirish, mavjud bino va inshootlarning ixtisoslashishini mehmonxona faoliyatiga oʻzgartirishga ham tatbiq etiladi.
  • 2026 yildan boshlab davlat koʻchmas mulkidan foydalanganlik uchun ijara toʻlovining eng kam miqdori mazkur hududda shakllangan ijara toʻlovining minimal bozor narxidan kelib chiqib aniqlanadi. Davlat koʻchmas mulkini ijaraga berish muddati 3 yildan 5 yilgacha oshiriladi.

 

2. Soliq toʻlovchilarni ragʻbatlantirish choralari

  • 2026 yil 1 yanvardan boshlab aylanmadan olinadigan soliq toʻlovidan ilk marta QQS toʻloviga oʻtgan xoʻjalik yurituvchi sub’yektlarga quyidagi ragʻbatlantirish choralari qoʻllaniladi:

 – 1 yil muddatga foyda soligʻini toʻlashdan ozod qilish;

– 1 yil davomida QQS toʻlovchisi sifatida soliq organlarida hisobga qoʻyish tartibini buzganlik uchun moliyaviy jarima qoʻllamaslik;

– 6 oy davomida buxgalteriya xizmatlari xarajatlarining har oyda MHEKMning 3,5 baravaridan oshmagan qismini toʻlayotgan soliq toʻlovlari hisobidan chegirib tashlash.

  • 2026 yil 1 yanvardan boshlab soliq majburiyatini bajarishning quyidagi proaktiv tartibi joriy etiladi:

– yuridik shaxslardan olinadigan mol-mulk soligʻi va yer soligʻi, jismoniy shaxslardan olinadigan daromad soligʻi va ijtimoiy soliq boʻyicha soliq hisobotlarini shakllantirish vazifasini soliq organlariga oʻtkazish, ushbu majburiyatni soliq toʻlovchilar uchun bekor qilish;

– soliq toʻlovchi soliq organlari tomonidan tayyorlangan soliq hisobotiga 5 ish kuni ichida zarur tuzatishlarni kiritish va tuzatish kiritilgan soliq hisobotini taqdim etish huquqiga ega.

  • Foyda soligʻi boʻyicha boʻnak toʻlovlarini toʻlashi lozim boʻlgan tadbirkorlik sub’yektlari daromadining chegaraviy miqdori 10 mlrd soʻmdan 20 mlrd soʻmga oshiriladi.
  • Xoʻjalik yurituvchi sub’yektlar oʻz mablagʻlari hisobidan ijtimoiy infratuzilma ob’yektlarini qurib, begʻaraz topshirganda, ushbu ob’yektlar uchun qilingan xarajatlar foyda soligʻi boʻyicha soliq bazasini kamaytiradi.
  • 2025 yil 1 noyabrdan boshlab umumiy ovqatlanish korxonalari va qishloq xoʻjaligi mahsulotlarini eksport qiluvchi korxonalar uchun belgilangan jismoniy shaxslardan qishloq xoʻjaligi mahsulotlari naqd pulga xarid qilinganda, ushbu tovarlar uchun elektron cheklar berish tartibi barcha xoʻjalik yurituvchi sub’yektlarga tatbiq etiladi.
  • Tadbirkorlik sub’yektlarining soliq auditi natijalari boʻyicha moliyaviy sanksiyalarni 6 oy ichida teng ulushlarda toʻlash huquqi sayyor soliq tekshiruvi natijalari boʻyicha moliyaviy sanksiyalarga ham tatbiq etiladi.
  • 2026 yil 1 yanvardan boshlab sayyor soliq tekshiruvini oʻtkazishda mobil videokameradan foydalanish majburiy hisoblanadi. Mobil videokameradan foydalanmasdan oʻtkazilgan tekshiruvlar noqonuniy hisoblanadi.
  • Soliq qoʻmitasiga 2 oy muddatda Vazirlar Mahkamasiga quyidagilarni nazarda tutuvchi qonun loyihasini kiritish topshirildi:

– soliq hisobotini (deklaratsiyasini) belgilangan muddatda taqdim etmaganlik uchun ma’muriy jarima miqdorini kichik tadbirkorlik sub’yektlarining mansabdor shaxslariga nisbatan BHMning 10 baravaridan 3 baravariga va fuqarolar uchun 3 baravaridan 1 baravariga tushirish;

– hisobot davrida bir nechta soliq turlari boʻyicha soliq hisobotlari taqdim etilmagan holatda, barcha taqdim etilmagan hisobotlar boʻyicha umumiy bitta jarima qoʻllash;

– oxirgi 3 oyda soliq hisobotlarini oʻz vaqtida taqdim etib kelgan xoʻjalik yurituvchi sub’yektlarga soliq hisobotini oʻz vaqtida taqdim etmaganlik uchun ma’muriy jarimani 5 kungacha qoʻllamaslik.

  • Soliq qoʻmitasiga Iqtisodiyot va moliya vazirligi bilan birgalikda 2026 yil 1 iyuldan boshlab soliqlar boʻyicha toʻlovlarni amalga oshirish, ortiqcha toʻlov va qarzdorlik summalarini yagona gʻaznachilik hisobvaragʻi orqali oʻzaro hisobga olish tizimini joriy qilish topshirildi.
  • Oliy sudga biznes-ombudsman bilan birgalikda 2025 yil yakuniga qadar tadbirkorlik sub’yektlariga iqtisodiy va ma’muriy sudlarga eksterritorial tartibda murojaat qilish imkoniyatini yaratish boʻyicha qonun loyihasini kiritish topshirildi.

 

 

 

Qonunchilikdagi yangiliklar. Normativ qonun hujjatlaridagi oʻzgarishlar. Qonunchilikdagi yangiliklar Qonunchilikdagi yangiliklar /oz/publish/doc/text210132_ochiq_muloqot_-_2025_prezident_farmonida_qanday_choralar_belgilandi