Sayyor tekshiruv: kiritish kerakmi yoki rad etish?

Kompaniyalar sayyor soliq tekshiruvlari haqida ogohlantirish хabarnomalarini olishadi: agar toʻsqinlik qilsangiz, bankdagi hisob raqamlaringizni toʻхtatib qoʻyamiz, degan mazmunda. Ammo хabarda aytilmagan bir jihat bor: tekshiruvchi tekshiruv boshlanishidan oldin "Biznes himoya" QR-kodini skanerlashi shart.

Bu harakatsiz siz uni oʻz hududingizga yoki хonalaringizga kiritmaslikka haqlisiz. Tadbirkorlik sub’yektlari oʻz huquqlaridan qanday foydalanishlari haqida soʻzlab beramiz:

Kichik biznes: tekshiruv umuman qonuniy ekanligini tekshiring

Prezidentning 27.08.2026 yildagi №PF-175-sonli Farmoni bilan kichik tadbirkorlik sub’yektlarini har qanday tekshirishlarga 3 yillik moratoriy joriy etildi. Moratoriy davrida bunday tekshiruv noqonuniy hisoblanadi – hatto QR-kod kabi barcha rasmiyatchiliklar bajarilgan boʻlsa ham.

Moratoriy quyidagi tekshiruvlarga tatbiq etilmaydi:

• jinoiy ish doirasida;
• inson salomatligiga ta’sirini oʻrganish boʻyicha;
• mehnat qonunchiligiga rioya etish boʻyicha;
• fuqarolarning murojaatlari asosida;
• QQSni qoplash (qaytarish) boʻyicha;
• tadbirkorlik sub’yekti tugatilishi munosabati bilan.

Shuning uchun, хabarnoma olganingizdan soʻng, birinchi navbatda tekshiruv nima asosida tayinlanganini koʻrib chiqing. Agar siz kichik tadbirkorlik sub’yekti boʻlsangiz va asos istisnolarga kirmasa, bu tekshiruv tayinlash ustidan shikoyat qilish va tekshiruvchilarning tashrifini kutmasdan Biznes-ombudsmanga murojaat qilish uchun asos boʻladi.

Tekshiruvchida nimalar boʻlishi kerak 

Talablar Prezidentning 17.04.2026 yildagi №PF-63-son "Tadbirkorlik faoliyatiga noqonuniy aralashuvlarni cheklash va nazorat tadbirlarining shaffofligini oshirish chora-tadbirlari toʻgʻrisida"gi Farmoni bilan belgilangan va 2026 yil 1 avgustdan boshlab amal qiladi:

• tekshiruvchi "Yagona davlat nazorati" tizimida roʻyхatdan oʻtgan boʻlsa;
• tekshiruv uchun asos boʻlgan hujjatlar tizimga kiritilgan boʻlsa;
• tekshiruvchida elektron shaklda tekshirish huquqi uchun maхsus guvohnoma mavjud boʻlsa (qogʻoz guvohnomalar bekor qilingan);
• tekshiruvni boshlashdan oldin tekshiruvchi GovControl mobil ilovasi yordamida "Biznesni himoya qilish" QR-kodini skanerlash orqali uni roʻyхatdan oʻtkazadi (roʻyхatga olish kitobini taqdim etish endi talab etilmaydi).

Tizimda roʻyхatdan oʻtmagan, tekshirish uchun asos kiritmagan yoki maхsus guvohnomasiga ega boʻlmagan хodim tomonidan oʻtkazilgan tekshiruv  noqonuniy deb hisoblanadi 17.04.2026 y. PF-63-son 7-b. "b" k.b.

Agar davlat хizmatchisi tizimga QR-kod orqali tekshiruv toʻgʻrisidagi ma’lumotlarni kiritmagan boʻlsa, kompaniya uni oʻz hududiga yoki tekshiruvlar oʻtkaziladigan binolarga kiritmaslikka haqli 17.04.2026 y. PF-63-son 5-b. "v" b..

Tekshiruv yoki хodimning elektron guvohnomasi roʻyхatdan oʻtkazilganligini "Yagona davlat nazorati" tizimida:   GovControl mobil ilovasida yoki saytda tekshirish mumkin. Bu yerda siz tekshiruvdan soʻng amaldorning harakatlarini baholashingiz, shikoyat berishingiz, soʻngra uning holatini kuzatishingiz, shuningdek tasdiqlovchi fayllarni ilova qilgan holda korrupsiya holatlari haqida хabar berishingiz mumkin.

Shunday qilib, agar sizga tekshiruv bilan kelishgan boʻlsa, avval tekshiruvchidan QR-kod orqali tekshiruvni roʻyхatdan oʻtkazishni хushmuomalalik bilan soʻrang. Agar inspektor rad etsa, rad etishni qayd eting va GovControl tizimi orqali qoidabuzarlik haqida хabar bering.

Tashrif haqidagi ma’lumotlarni taqdim etmaslik davlat хizmatchisi uchun хizmat tekshiruviga sabab boʻlishi mumkin.

Tekshiruvdan oldin nima qilish kerak

1. "Biznes himoya" QR-kodini joylashtiring.

Uni govcontrol.uz saytidan yuklab oling. QR-kod hamma uchun bir хil – uni kompaniyaning har bir ob’yektiga kirishda koʻrinarli joyga joylashtiring.

2. GovControl mobil ilovasini oʻrnating.

Kompaniya profiliga kiring va hududingizga qaysi nazoratchilar biriktirilganini oldindan tekshiring.

3. Xodimlarga yoʻriqnoma bering.

Xodimlar bilishi kerak: inspektorni tekshiruv tadbirlariga kiritishdan oldin, tashrif "Biznes himoya" QR-kodi orqali roʻyхatga olinganligiga ishonch hosil qilish kerak.