Назорат қилинадиган битимлар ҳақида хабарномани қачон ва қандай топшириш керак

Солиқ тўловчилар СК 182-моддасига кўра календарь йили давомида амалга оширилган назорат қилинадиган битимлар ҳақида солиқ органларига хабар беришлари шарт. «Норма» экспертлари буни қандай амалга ошириш ва хабарнома юборилмаса, нима бўлиши ҳақида тушунтириш беришди.

Ким ва қачон хабарнома топшириши керак

Назорат қилинадиган битимлар рўйхати СК 180 ва 181-моддаларида келтирилган. Шахсларнинг ўзаро боғлиқлик белгилари СК 37-моддасида келтирилган. Ушбу моддалар меъёрлари 2024 йилда сиз солиқ органларига махсус тартибда хабар бериш керак бўлган битимларни амалга оширганмисиз йўқми, тушунишга ёрдам беради. Агар амалга оширган бўлсангиз –   молиявий ҳисоботни тақдим этиш муддатидан кечиктирмай солиқ органларига хабар беринг .

Назорат қилинадиган битимлар ҳақида хабарномани қандай топшириш керак

Назорат қилинадиган битимлар ҳақида хабарномани my3.soliq.uz сайти орқали юборинг. Бунинг учун кетма-кет қуйидагиларни танланг:

• «Хизматлар»;
• «Электрон ҳужжат айланиши»;
• «Норматив-ҳуқуқий ҳужжатларда назарда тутилган хабарномаларни юбориш»;
• «Назорат қилинадиган битимлар ҳақида хабарнома».

Маълумотни илова қилинган шакл бўйича жадвал кўринишида ёки қўлда тўлдириш йўли билан юбориш мумкин.

Шаклни тўлдириш учун қуйидаги маълумотлар керак бўлади:

• битимлар предмети;
• битим иштирокчилари ҳақида маълумотлар:

– юридик шахснинг тўлиқ номи ва СТИРи (агар юридик шахс Ўзбекистон солиқ органларида ҳисобда турган бўлса);

– якка тартибдаги тадбиркорнинг Ф.И.Ш. ва ЖШШИР;

– якка тартибдаги тадбиркор бўлмаган жисмоний шахснинг Ф.И.Ш. ва фуқаролиги;

• назорат қилинадиган битимлар бўйича олинган даромадлар суммаси ва (ёки) амалга оширилган харажатлар (кўрилган зарарлар) суммаси – нархлари тартибга солиниши керак бўлган битимлар бўйича даромадлар (харажатлар) суммаларини ажратган ҳолда. Бу маълумотлар бир турдаги битимлар гуруҳи бўйича тайёрланиши мумкин;
• бошқа маълумотлар.

Шунингдек, тасдиқловчи ҳужжатлар нусхаларини илова қилиш керак.

Хабарнома юборилмаса, нима бўлади

Бундай битимлар ҳақидаги маълумотни яшириш маъносиз, чунки солиқ органлари барибир солиқ текшируви ёки солиқ мониторинги давомида улар ҳақида маълумот оладилар. Бу ҳолда қуйидагилар юз бериши мумкин:

•  ҚҚС, фойда солиғи, ЖШДС, акциз солиғи, ер қаъридан фойдаланганлик учун солиқ бўйича қўшимча ҳисоблашлар ;
• тўланмаган солиқ суммасининг 40 фоизи миқдорида жарима .

Хабарнома юбориш бўйича қўшимча саволларингиз бўлса, уларни Солиқ қўмитаси мутахассисларига 71 244-98-09 телефон рақами орқали беринг (ички рақамлар: 01879, 01243, 01622, 01620, 01281).