Ҳисоботларни кечиктириб топширганлик учун қандай жавобгарлик бор ва ундан қандай қутулиш мумкин

Солиқ ҳисоботларини топшириш муддатларини бузганлик учун маъмурий жавобгарлик белгиланган. Аммо ҳар қандай кечикиш ҳам санкцияларга олиб келавермайди.

Ҳисоботларни кечиктириб топширганлик учун қандай жарималар белгиланган ва қайси ҳолларда улардан қутулиш мумкинлигини buxgalter.uz шарҳидан билиб олинг: 

 

Санкциялар

Солиқ ҳисоботларини ўз вақтида тақдим этмаганлик учун солиқ тўловчи юридик шахснинг мансабдор шахси ёки солиқ тўловчи жисмоний шахс маъмурий жавобгарликка тортилади .

 

Солиқ ҳисоботини кечиктириб топширишнинг яна бир нохуш оқибати –  солиқ тўловчининг ҳисоб рақамини блоклаш ҳисобланади.

Агар ҳисоботларни топширишнинг белгиланган муддатидан 10 кун ўтган бўлса, солиқ органи қарздорнинг банк ҳисобварақлари бўйича операцияларни тўхтатиб қўйиш ҳақида қарор қабул қилиши мумкин . Қарор ижро этиш учун банкка юборилади. Шу билан бир вақтда солиқ тўловчининг шахсий кабинетига сабаби кўрсатилган ҳолда ҳисобварақлар бўйича операцияларни тўхтатиб қўйиш тўғрисида хабарнома келиб тушади .

Ҳисоб рақами 10 кундан кўп бўлмаган муддатга блокланади. Ундан узоқроқ муддатга – фақат суд қарорига кўра солиқ органининг илтимосномаси асосида амалга оширилди .

Операцияларни тўхтатиб қўйиш қуйидагиларга нисбатан қўлланилмайди :

• солиқларни тўлаш;
• иш ҳақи, алимент, муаллифлик шартномалари бўйича ҳақ тўлаш, ҳаёт ва соғлиққа етказилган зарарни қоплаш;
• махсус ҳисоб рақамлари.

Блоклашни бекор қилиш учун ҳисоботни топшириш лозим. Бунда ҳисобварақлар ҳисобот топширилганидан сўнг 2 кундан кечиктирмасдан очилади .

 

Юридик шахс ҳисоботни ўз вақтида топширмаганлиги учун ким жарима тўлайди

Солиқ органлари ташкилот раҳбарини ҳисоботларни ўз вақтида топширмаганлиги учун жавобгарликка тортади. Эслатиб ўтамиз, айнан юридик шахс раҳбари "Бухгалтерия ҳисоби тўғрисида"ги Қонунга мувофиқ солиқ ҳисоботи ва бошқа молиявий ҳужжатларнинг тайёрланишини, шунингдек ҳисоб-китобларнинг ўз вақтида амалга оширилишини таъминлаши шарт .

Юридик шахс раҳбари маъмурий жаримани қуйидаги йўллар билан тўлаши мумкин:

1) шахсий маблағларидан – банк ёки SoliqUz мобил иловаси орқали;

2) корхонанинг ҳисоб-китоб рақамидан. Раҳбар юридик шахснинг ҳисобварағидан маълум суммани тўлаш ва кейинчалик уни ўз иш ҳақидан ушлаб қолиш тўғрисида фармойиш (буйруқ) чиқаради. Бунда ҳар бир тўловда барча ушлаб қолишларнинг умумий суммаси ҳақиқатда ҳисобланган иш ҳақининг 50 фоизидан ошмаслиги лозим ;

3) раҳбарнинг фармойишига кўра корхонанинг ҳисоб-китоб рақамидан – иш ҳақидан ушлаб қолинмасдан, бироқ ушбу суммани жисмоний шахслар даромад солиғини ҳисоблашда унинг жами даромадига киритган ҳолда .

Агар ҳисоботни кечиктиришга бухгалтернинг бепарволиги сабаб бўлган бўлса (узрли сабаб бўлмаса), уни меҳнат қонунчилиги ва ташкилотнинг ички ҳужжатлари асосида интизомий жавобгарликка тортиш мумкин.

 

Маъмурий жазо қўллаш муддатлари 

Маъмурий жазо ҳуқуқбузарлик содир этилган кундан бошлаб бир йил ичида қўлланилиши мумкин .

 

Қандай ҳолларда жарима қўлланилмаслиги мумкин

МЖтК 271-моддасининг 11-бандида маъмурий ҳуқуқбузарлик тўғрисидаги ишни қўзғатиш мумкин бўлмаган, агар қўзғатилган бўлса, тугатилиши лозим бўлган ҳолатлар белгиланган. Бу қуйидаги ҳолларда бўлиши мумкин:

1. Қоидабузарлик биринчи марта содир этилган бўлса.
2. Қоидабузарлик аниқланган кундан бошлаб 30 кун ичида бартараф этилган бўлса.
3. Етказилган моддий зарар тўлиқ қопланган бўлса.

Демак, ҳисобот ўз вақтида топширилмаган тақдирда, агар қоидабузарлик биринчи марта содир этилган бўлса ва ҳисобот солиқ органи ёки бухгалтернинг ўзи топширилмаганлиги фактини аниқлаган пайтдан бошлаб 30 кун ичида тақдим этилган бўлса, жаримадан қутулиш мумкин.

Солиқ ҳисоботлари электрон шаклда тақдим этилгани сабабли, ўз вақтида топширилмаган ҳисоботлар тизимда дарҳол – реал вақт режимида аниқланади.

Жарима қўллашдан аввал электрон ҳисобот тизими мансабдор шахснинг илгари худди шундай ҳуқуқбузарлик учун жавобгарликка тортилган-тортилмаганлигини текширади. Агар илгари жавобгарликка тортилган бўлса, худди шундай маъмурий ҳуқуқбузарлик жазо ижроси тугаган кундан бошлаб 1 йил ичида ёки ундан кейин содир этилганми йўқми, текширилади. Агар маъмурий жазога тортилган шахс жазони ижро этиш тугаган кундан бошлаб бир йил ичида янги маъмурий ҳуқуқбузарлик содир этмаган бўлса, у маъмурий жазога тортилмаган ҳисобланади .

Солиқ органлари ходимларининг ҳаракатлари устидан юқори турувчи солиқ органига ёки судга шикоят қилиш мумкин.