Получите быстрые ответы, проверенные экспертами:
Тадбиркорлар божхона билан низоларни судгача ҳал қилиш имкониятига эга бўлди. 28.07.2025 йилдаги 470-сон ВМҚ билан божхона соҳасидаги тадбиркорлик субъектларининг муаммоларини ўрганиш ва ҳал қилиш бўйича Апелляция кенгаши тўғрисидаги низом тасдиқланди. Buxgalter.uz шарҳини ўқинг:
Муҳим янгиликларни ўтказиб юбормаслик учун Телеграм каналимизга обуна бўлинг.
Апелляция кенгаши – бу таркибига божхона соҳасида тажрибага эга давлат органлари ва жамоатчилик вакиллари киритилган мустақил коллегиал орган. Унинг асосий вазифаси – тадбиркорларнинг божхона тартибга солиш соҳасида уларнинг ҳуқуқ ва манфаатлари бузилиши ҳақидаги мурожаатларини кўриб чиқиш. Кенгаш божлар миқдори, божхона қийматини аниқлаш, имтиёзлар қўллаш билан боғлиқ баҳсли масалаларни ҳал қилишда ёрдам беради, шунингдек муаммоларни умумлаштириб, аниқланган муаммоларни қандай бартараф этиш бўйича Божхона қўмитасига тавсиялар беради.
Божхонанинг асоссиз ҳаракатларига дуч келган тадбиркор Кенгашга ариза билан мурожаат қилиши мумкин. Мурожаатни кўриб чиқиш муддати – 15 иш кунидан ортмаслиги керак. Агар сўровлар қилиш, ҳужжатларни қўшимча ўрганиш зарурати бўлса, муддат 1 ойгача, истисно ҳолларда эса кўпи билан 2 ойгача узайтирилади.
Кенгаш давлат органлари ва ташкилотлардан маълумот сўраш ва мустақил экспертларни жалб қилишга ҳақли.
Эътибор беринг
Апелляция кенгашининг хулосалари тавсия характерига эга.
Божхона органлари уларни бажаришга мажбур эмас, лекин 3 иш куни ичида ёзма жавоб бериши керак – ё тавсиялар қабул қилингани ҳақида хабар бериши ёки рад этишини асослаши керак.
Апелляция кенгаши таркибига камида 15 киши киради. Кенгаш мажлисининг барча иштирокчилари якуний хулосани имзолайди. Агар фикрлар турлича бўлса, иштирокчи алоҳида ёзма фикр расмийлаштириши мумкин, у ҳам кўрилаётган иш ҳужжатларига қўшилади.
Кенгаш иши Божхона қўмитасининг бюджетдан ташқари маблағлари ва қонунчилик билан тақиқланмаган бошқа манбалар ҳисобидан молиялаштирилади.
Шундай қилиб, агар тадбиркор ўз ҳуқуқлари бузилган деб ҳисобласа, у аввал Апелляция кенгашига мурожаат қилиши мумкин. Кенгаш шикоятни кўриб чиқади, мутахассислар фикрини тинглайди ва тавсиялар беради, божхона органи эса уларни қабул қилиши ёки қилмаслиги мумкин. Агар тадбиркорни божхона органининг қарори барибир қониқтирмаса – у судга бориш ҳуқуқига эга ва Кенгашнинг хулосаси ҳимоядаги далилларидан бири бўлиши мумкин.
Buxgalter.uz тавсия этади
