Ўзбекистон Республикаси Президентининг 11.03.2025 й. ПҚ-100-сон "Уй-жой ҳамда бино-иншоотларни иссиқлик энергияси билан таъминлаш соҳасини тубдан ислоҳ қилиш ҳамда биноларнинг энергия самарадорлигини ошириш чора-тадбирлари тўғрисида"ги Қарори

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

11.03.2025 й.

N ПҚ-100

УЙ-ЖОЙ ҲАМДА БИНО-ИНШООТЛАРНИ

ИССИҚЛИК ЭНЕРГИЯСИ БИЛАН ТАЪМИНЛАШ

СОҲАСИНИ ТУБДАН ИСЛОҲ ҚИЛИШ ҲАМДА

БИНОЛАРНИНГ ЭНЕРГИЯ САМАРАДОРЛИГИНИ

ОШИРИШ ЧОРА-ТАДБИРЛАРИ ТЎҒРИСИДА

Қайта тикланувчи энергия манбалари қурилмалари ва ресурс тежамкор ускуналардан фойдаланган ҳолда аҳоли хонадонлари, ижтимоий соҳа объектлари ва тадбиркорлик субъектларини иссиқлик энергияси билан барқарор таъминлаш, иссиқлик таъминоти соҳасини ислоҳ қилиш, инновацион технологиялардан фойдаланган ҳолда биноларда энергия йўқотишларни камайтириш бўйича "Атроф-муҳитни асраш ва "яшил иқтисодиёт" йилида амалга ошириладиган асосий вазифаларни белгилаш мақсадида ҚАРОР ҚИЛАМАН:

I. АСОСИЙ ЙЎНАЛИШЛАР ВА МАҚСАДЛАР

1. Уй-жой ва бино-иншоотларни иссиқлик энергияси билан барқарор таъминлаш ҳамда биноларнинг энергия самарадорлигини оширишнинг келгуси 5 йилдаги асосий йўналишлари этиб қуйидагилар белгилансин:

(а) соҳада ягона давлат сиёсатини юритиш, илғор хорижий тажрибалар асосида стратегик таклифларни ишлаб чиқиш, иссиқлик таъминоти корхоналари фаолиятини бошқарувчи ва мувофиқлаштирувчи ташкилот ташкил этиш ҳамда қуйидаги тадбирларни амалга ошириш:

(i) марказлашган иссиқлик тизимларидаги эскирган 103 та қозонхона ва 1,6 минг километр иссиқлик тармоғини, шу жумладан, 2025-2026 йилларда 18 та қозонхона ва 258 километр иссиқлик тармоғини янгилаш;

(ii) давлат-хусусий шериклик асосида 9 та (шундан 2 та лойиҳа 2025-2026 йилларда бошланади), халқаро молия институтлари иштирокида 13 та шаҳар ва туманда модернизация лойиҳаларини амалга ошириш (шундан 5 та шаҳар ва туманда 2025-2026 йилларда бошланади);

(iii) марказлашган иссиқлик таъминоти қамровини 37 фоиздан 58 фоизгача етказиш, тизимдаги йўқотишларни 38 фоиздан 20 фоизгача қисқартириш;

(iv) кўп квартирали уй-жойлар ва ижтимоий соҳа муассасаларига 8 681 та индивидуал иссиқлик пунктини ўрнатиш (2025 йилда 480 та), марказлашган иссиқлик таъминотини ёпиқ тизимга ўтказиш дастурини ишлаб чиқиш ва амалга ошириш;

(б) марказлашган иссиқлик таъминотига уланмаган тўрт ва ундан юқори қаватли кўп квартирали уй-жойларнинг иситиш тизимида локал қозонхоналар қуриш ва бошқа муқобил технологияларни жорий этиш ҳисобига бир хонадоннинг газга бўлган талабини камида 20 фоизга камайтириш;

(в) якка тартибдаги ва кўп квартирали уй-жойлар, ижтимоий соҳа ҳамда давлат муассасалари, саноат ва хусусий сектор бино-иншоотларининг энергия самарадорлигини ошириш мақсадида тажриба-синов лойиҳаларини бошлаш;

(г) ижтимоий соҳа, саноат ва хусусий секторлар бино-иншоотларини янгидан қуриш ҳамда реконструкция қилишни лойиҳалаштириш бўйича техник шартларда қайта тикланувчи энергия манбалари қурилмалари ва муқобил иссиқлик тизимлари ускуналарини ўрнатиш талабини киритиш;

(д) табиий газ истеъмоли юқори бўлган аҳоли хонадонлари ва ижтимоий соҳа ҳамда давлат муассасаларида энергия самарадор ва замонавий ускуналар (газ горелкали қурилмалар) ўрнатишни рағбатлантириш;

(е) хусусий сектор иштирокида иссиқлик таъминоти ва бошқа соҳаларда энергосервис хизматларини кўрсатиш ҳамда энергия тежамкорликни оширишда янги бозорни шакллантириш, ихтисослашган энергия хизматлари компаниялари бозори (ЭСКО) механизмлари ва инновацион молия воситалари орқали энергия самарадорликни ошириш лойиҳаларини мувофиқлаштирувчи ташкилот тузиш.

2. Иқтисодиёт ва молия вазирлиги, Қурилиш ва уй-жой коммунал хўжалиги вазирлиги, Давлат активларини бошқариш агентлигининг қуйидаги таклифларига розилик берилсин:

(а) Қурилиш ва уй-жой коммунал хўжалиги вазирлиги ҳузурида "Иссиқликтаъминоти" акциядорлик жамиятини (кейинги ўринларда - Жамият) ташкил этиш, Қурилиш ва уй-жой коммунал хўжалиги вазирлигига иссиқлик таъминоти соҳасида ягона давлат сиёсатини юритишни юклаш;

(б) иссиқлик таъминоти тизимларида икки турдаги энергия ишлаб чиқаришни назарда тутувчи когенерация технологияларини жорий этиш лойиҳаларини Қурилиш ва уй-жой коммунал хўжалиги вазирлиги ва Энергетика вазирлиги томонидан биргаликда ишлаб чиқиш ҳамда амалга ошириш;

(в) Жамият устав капиталини 23 та хўжалик жамиятлари ва корхоналар устав капитали ҳисобига шакллантириш ҳамда ушбу хўжалик жамиятлари ва корхоналарни масъулияти чекланган жамиятлар сифатида қайта ташкил этиш;

(г) Иқтисодиёт ва молия вазирлигига Жамиятнинг устав капиталидаги давлат акция пакетлари бўйича акциядор ҳуқуқини амалга оширишни юклаш.

3. Масъулияти чекланган жамиятлар сифатида қайта ташкил этиладиган, устав капитали "Иссиқликтаъминоти" АЖ уставига ўтказиладиган хўжалик жамиятлари ва корхоналар рўйхати ҳамда уларни қайта ташкил этиш тартиби 1-иловага мувофиқ тасдиқлансин.

II. АСОСИЙ ЧОРА-ТАДБИРЛАР ҲАМДА

ИШЛАБ ЧИҚИЛАДИГАН ДАСТУРЛАР

4. Кўп квартирали уй-жойлар, ижтимоий соҳа ҳамда давлат муассасаларини 2025-2030 йилларда марказлашган иссиқлик таъминоти билан қамраб олиш даражасини ошириш мақсадида қуйидагилар:

(а) Ижтимоий ва ишлаб чиқариш инфратузилмасини ривожлантириш дастурлари доирасида амалга ошириладиган лойиҳаларнинг йиғма параметрлари 2-иловага мувофиқ;

(б) Давлат-хусусий шериклик асосида амалга ошириладиган истиқболли инвестиция лойиҳалари рўйхати 3-иловага мувофиқ. Бунда жорий йилда Нукус ва Бухоро шаҳарлари иссиқлик таъминоти тизимларида бир вақтнинг ўзида икки турдаги энергия ишлаб чиқаришни назарда тутувчи когенерация технологияларини жорий этиш бўйича лойиҳаларни бошлаш чораларини кўриш;

(в) Халқаро молия институтлари иштирокида амалга ошириладиган янги истиқболли лойиҳалар рўйхати 4-иловага мувофиқ тасдиқлансин.

5. Иқтисодиёт ва молия вазирлиги, Қурилиш ва уй-жой коммунал хўжалиги вазирлиги, Мактабгача ва мактаб таълими вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари, Марказий банк, Ўзбекистон маҳаллалари уюшмаси қуйидаги тажриба-синов лойиҳаларини бошласин:

(а) Чиноз ва Олтиариқ туманларида бюджет маблағлари ҳисобидан қайта тикланувчи энергия манбалари қурилмалари (иссиқлик насослари, қуёш панеллари) ҳамда ресурс тежамкор ускуналардан фойдаланган ҳолда тўрт қаватли уй-жойларни иссиқлик энергияси билан барқарор таъминлаш, ушбу уйларнинг энергия самарадорлигини ошириш учун уларнинг иссиқлик изоляцияси бўйича лойиҳалар;

(б) "Яшил" имтиёзли кредитлар ҳисобидан ҳар бир вилоятда 100 тадан якка тартибдаги уй-жойларда энергия йўқотишларни камайтириш учун уларнинг ташқи ва том қисмининг иссиқлик изоляцияси, энергия тежамкор ойна ва эшик ромларини ўрнатиш, қайта тикланувчи энергия манбалари қурилмалари (қуёш панеллари ва гелиоколлекторлар) ҳамда энергия тежовчи ускуналарни ўрнатиш лойиҳалари;

(в) Бухоро вилоятидаги ижтимоий соҳа муассасаларининг қониқарсиз ва таъмирталаб биноларида энергия йўқотишларни камайтириш учун уларнинг ташқи ва том қисмини иссиқлик сақловчи материаллар билан қоплаш, энергия тежамкор ойна ва эшик ромларини ўрнатиш, қайта тикланувчи энергия манбалари қурилмалари (қуёш панеллари ва шу кабилар), муқобил иссиқлик тизимлари (гелиоколлекторлар, иссиқлик насослари, фанкойл тизими ва шу кабилар) ҳамда энергия тежовчи ускуналарни ўрнатиш лойиҳалари;

(г) Бухоро вилояти тажрибаси асосида ҳар бир ҳудудда тўрттадан ижтимоий соҳа ва давлат муассасаси объектларида (мактабгача таълим, мактаб, тиббиёт, давлат идораси) энергия самарадор лойиҳалар;

(д) республикада жойлашган барча давлат мактабгача таълим муассасаларини тўлиқ гелиоколлекторлар билан жиҳозлаш лойиҳалари. Бунда Вазирлар Маҳкамаси ушбу тажриба-синов лойиҳалари бир ой муддатда бошланишини ташкил этсин.

6. Қурилиш ва уй-жой коммунал хўжалиги вазирлиги Иқтисодиёт ва молия вазирлиги билан биргаликда жорий йил 1 июлга қадар кўп квартирали уй-жойларнинг фасад ва том қисмини иссиқлик сақловчи материаллар билан қоплаш, кириш йўлакларида энергия тежамкор ойна ромлари ўрнатилишини назарда тутувчи 2026-2030 йилларда кўп квартирали уй-жойларнинг энергия самарадорлигини оширишга қаратилган давлат дастурини ишлаб чиқиб Вазирлар Маҳкамасига киритсин.

7. Иқтисодиёт ва молия вазирлиги бир ой муддатда "Ўзбекистон бинолари учун тоза энергия" (СEBU) лойиҳаси доирасида ижтимоий соҳа муассасаларида энергия самарадорликни ошириш, уларда қайта тикланувчи энергия манбалари қурилмалари, муқобил иссиқлик тизимлари ҳамда энергия тежовчи ускуналарни ўрнатиш лойиҳаларининг амалга оширилишини жадаллаштириш юзасидан Жаҳон банки билан музокараларни бошласин.

III. МОЛИЯВИЙ РЕСУРСЛАР

8. Иқтисодиёт ва молия вазири (Ж. А. Қўчқоров) 2025 йилда:

(а) мазкур қарорга 4-иловада кўрсатилган лойиҳаларни бошлаш учун халқаро молия институтларидан 68 миллион АҚШ доллари жалб қилсин;

(б) Ижтимоий ва ишлаб чиқариш инфратузилмасини ривожлантириш дастури доирасида 320 миллиард сўм ажратсин;

(в) Давлат бюджетидан иссиқлик таъминоти тизимини ёпиқ тизимга ўтказиш чора-тадбирлари учун 50 миллиард сўм, мазкур қарорга 4-иловада кўрсатилган янги истиқболли лойиҳаларнинг техник-иқтисодий асосларини ишлаб чиқиш учун 10 миллиард сўм қўшимча маблағ ажратсин. Бунда Иқтисодиёт ва молия вазирлигига мазкур қарордан келиб чиқадиган қўшимча харажатлар, шу жумладан, тажриба-синов лойиҳалари учун 2025 йил Давлат бюджетининг қўшимча даромадлари ҳисобидан маблағлар ажратишга рухсат берилади.

9. Белгилансинки, 2026-2030 йилларда:

(а) иссиқлик қозонхоналари ва иссиқлик тизимларини замонавий технологиялар асосида модернизация ва реконструкция қилиш лойиҳалари учун халқаро молия институтларидан 257 миллион АҚШ доллари жалб қилинади;

(б) ижтимоий ва ишлаб чиқариш инфратузилмасини ривожлантириш дастури доирасида 1,6 триллион сўм ажратилади;

(в) Жаҳон банкининг Халқаро тараққиёт жамғармасидан жалб қилинган 143 миллион АҚШ доллари қарз маблағлари ўзлаштирилади;

(г) Инвестициялар, саноат ва савдо вазирлиги, Иқтисодиёт ва молия вазирлиги тегишли вазирлик ва идоралар билан биргаликда мазкур қарорда кўзда тутилган чора-тадбирларни мустаҳкам ва барқарор молиялаштириш мақсадида халқаро молия институтларидан мақбул шартлардаги кредитлар, грантлар ва техник ёрдамларни жалб қилади.

10. Энергетика вазирлиги Иқтисодиёт ва молия вазирлиги, Қурилиш ва уй-жой коммунал хўжалиги вазирлиги, "Ўзсувтаъминот" АЖ билан биргаликда иссиқлик таъминоти корхоналарининг 5-иловага мувофиқ 2025 йил 1 январь ҳолатига мавжуд қарздорликларини кечиктириш, ҳисобланган пеня ва жарималарни ҳисобдан чиқариш чораларини кўрсин.

IV. ТАРТИБ ВА ҚОИДАЛАР

11. Белгилансинки, 2025 йил 1 июндан бошлаб:

(а) молиялаштириш манбаларидан қатъи назар (бюджет, халқаро молия институтлари, давлат-хусусий шериклик, хусусий ва бошқа манбалар) қурилишда техник шартлар олиниши талаб қилинадиган бино-иншоотларни қуриш ҳамда реконструкция қилишни лойиҳалаштиришда ушбу объектларнинг лойиҳа ҳужжатларида биноларнинг ўз эҳтиёжлари учун қайта тикланувчи энергия манбалари қурилмалари (қуёш панеллари ва шу кабилар) ва муқобил иссиқлик тизимлари (гелиоколлекторлар, иссиқлик насослари ва шу кабилар) ҳамда энергия тежовчи ускуналарни мажбурий ўрнатиш талаби киритилади;

(б) Қурилиш ва уй-жой коммунал хўжалиги вазирлиги ҳамда Қурилиш ва уй-жой коммунал хўжалиги соҳасида назорат қилиш инспекцияси ушбу объектлардан фойдаланишга рухсатнома беришда кўрсатилган ускуналарнинг ўрнатилганини ҳамда уларнинг ташқи ва том қисми иссиқлик сақловчи материаллар билан қопланишини назорат қилади;

(в) марказлашган иссиқлик таъминоти тизимларини қуриш ҳамда мавжудларини модернизация ва реконструкция қилиш бўйича барча лойиҳаларда ёпиқ иссиқлик таъминоти тизимини жорий этиш назарда тутилади;

(г) Жамият таркибидаги ҳамда давлат-хусусий шериклик асосида фаолият кўрсатувчи корхоналарнинг иссиқлик таъминоти хизматлари учун нархлар (тарифлар) Идоралараро тариф комиссияси томонидан тартибга солинади;

(д) кўп квартирали уй-жойлар ва биноларнинг ички иссиқлик ва иссиқ сув тарқатувчи тизимларининг қурилиши, иншоотлар ва тармоқларда ҳисоблагичларнинг тўлиқ ўрнатилиши мажбурий ҳисобланади;

(е) иссиқлик таъминоти корхоналари тасарруфидаги қозонхоналарни Жамиятнинг розилигисиз бўш турган объект сифатида белгилаб, электрон савдоларга чиқариш тақиқланади;

(ж) Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимлари 6-иловада кўрсатилган вазифалар ижросига шахсан масъул этиб белгиланади ҳамда уларга марказлашган ва локал иситиш тизимини йўлга қўйишда қозонхоналар ва тармоқларни қуриш ва жойлаштириш учун талаб этиладиган ер майдонларини ҳудудий иссиқлик таъминоти корхоналарига ажратишга рухсат берилади;

(з) ҳар йили ижтимоий ва ишлаб чиқариш инфратузилмасини ривожлантириш дастурида иссиқлик таъминоти соҳасига ажратиладиган маблағларнинг камида 10 фоизи энергия тежовчи ускуналарни ўрнатишга йўналтирилади;

(и) қурилиш ва модернизация қилиш лойиҳалари амалга ошириладиган барча ижтимоий соҳа муассасаларида мажбурий тартибда доимий иссиқ сув билан таъминланадиган тежамкор санитария-гигиена хоналари, қўл ювиш жойлари ҳамда спорт залларида душ қабул қилиш хоналари техник жиҳатдан фойдаланишга қулай тарзда ташкил қилинади;

(к) қуриш ва реконструкция қилиш бўйича лойиҳалар доирасида иссиқлик қозонхона қувватларини белгилашда ҳудуддаги барча кўп квартирали уй-жойлар, ижтимоий соҳа муассасалари ва маъмурий бинолар ҳамда саноат ва хусусий секторларнинг тўлиқ қамраб олиниши назарда тутилади;

(л) марказлашган иссиқлик таъминоти мавжуд ҳудудларда янги қурилаётган кўп квартирали уй-жойлар, маъмурий бинолар, ижтимоий соҳа муассасалари, саноат ва тадбиркорлик субъектлари бино ва иншоотларининг иссиқлик тармоқларига уланиши мажбурий ҳисобланади.

V. ҚАРОР ИЖРОСИНИ ТАШКИЛ ЭТИШ,

ТАЪМИНЛАШ ВА НАЗОРАТ

12. Иқтисодиёт ва молия вазири (Ж. А. Қўчқоров):

(а) икки ҳафта муддатда Давлат дастурлари ижро этилишини назорат қилиш ва мувофиқлаштириш бўйича республика штаби билан биргаликда 2025 йилда ижтимоий ва ишлаб чиқариш инфратузилмасини ривожлантириш дастурига киритилган ижтимоий соҳа муассасаларининг лойиҳа-смета ҳужжатларини мазкур қарор талабларига мувофиқлаштирсин;

(б) икки ой муддатда энергия самарадорлик лойиҳаларининг лойиҳа топшириқлари ва смета ҳужжатларини ишлаб чиқиш, энергия аудит ўтказиш ва техник назоратни амалга ошириш, лойиҳалар доирасида ўрнатилган қурилма ва технологияларга техник хизмат кўрсатишни назорат қилиш учун халқаро компания ва консультантлар жамоасини жалб этсин;

(в) ижтимоий соҳа муассасалари ҳамда кўп квартирали уй-жойларнинг энергия самарадорлигини ошириш лойиҳаларини барқарор ва кафолатланган молиялаштириш манбалари билан таъминлаш учун халқаро молия институтлари ва ташкилотларининг қўшимча грант ва кредитларини жалб қилиб борсин.

13. Уй-жой ҳамда бино-иншоотларни иссиқлик энергияси билан таъминлаш соҳасини тубдан ислоҳ қилиш ҳамда биноларнинг энергия самарадорлигини ошириш чора-тадбирлари режаси 7-иловага мувофиқ тасдиқлансин.

14. Марказлашган иссиқлик таъминоти соҳасини тубдан ислоҳ қилиш ҳамда биноларнинг энергия самарадорлигини ошириш ишларини жадаллаштириш бўйича республика мувофиқлаштирувчи ишчи гуруҳи таркиби 8-иловага мувофиқ тасдиқлансин ва унга қуйидаги вазифалар юклатилсин:

(а) иссиқлик таъминоти соҳасида энергия самарадор технологияларни жорий қилиш, қайта тикланадиган манбалардан кенг фойдаланишни йўлга қўйиш, хизматлар сифатини ошириш ва узлуксизлигини таъминлаш, ҳисоб-китоб тизимини тартибга солиш ва операцион самарадорликни ошириш орқали корхоналарнинг молиявий ҳолатини мустаҳкамлаш, илғор хорижий тажрибалар асосида иссиқлик энергиясини ишлаб чиқаришдан бошлаб якуний истеъмолчига етказиб беришгача самарали тизимни жорий этиш, тизимларда йўқотишларни камайтириш чораларини кўриш бўйича тизимли ишларни амалга ошириш;

(б) биноларда энергия йўқотишларни камайтиришга қаратилган энергия самарадорлик дастур ва лойиҳалари амалга оширилишини мувофиқлаштириш, энергия самарадор биноларни қуриш бўйича қоида ва тартибларни ишлаб чиқиш, доимий такомиллаштириш ҳамда уларга риоя қилинишини назорат қилиш;

(в) соҳада жозибадор инвестиция муҳитини яратиш, давлат-хусусий шериклик тамойилларини кенг жорий қилиш, хусусий инвестицияларни жалб қилиш йўналишларини белгилаш;

(г) қарор билан кўзда тутилган дастур ва лойиҳаларнинг белгиланган муддатларда сифатли бажарилишини назорат қилиш, қарор ижросини мувофиқлаштириш.

15. Ўзбекистон Республикаси Президентининг айрим қарорларига 9-иловага мувофиқ ўзгартириш ва қўшимчалар киритилсин.

16. Мазкур қарорнинг ижросини самарали ташкил қилишга масъул ва шахсий жавобгар этиб Бош вазир ўринбосарлари Ж. А. Қўчқоров ҳамда А. Ж. Раматов, қурилиш ва уй-жой коммунал хўжалиги вазири Ш. С. Хидоятов ва энергетика вазири Ж. Т. Мирзамаҳмудов белгилансин.

17. Қарор ижросини назорат қилиш Ўзбекистон Республикаси Бош вазири А.Н. Арипов зиммасига юклансин.

Ўзбекистон Республикаси Президенти                                   Ш. Мирзиёев

Ўзбекистон Республикаси

Президентининг

2025 йил 11 мартдаги

ПҚ-100-сон қарорига

1-ИЛОВА

"Иссиқликтаъминоти" АЖ уставига ўтказиладиган

хўжалик жамиятлари ва корхоналар рўйхати ҳамда

уларни қайта ташкил этиш тартиби

I. Активлари ва устав капитали "Иссиқликтаъминоти" АЖ

устав капиталини шакллантириш учун топшириладиган

хўжалик жамиятлари ва корхоналар рўйхати

         

Изоҳ:

*) "Қиргули иссиқлик манбаи" МЧЖ устав капиталидаги "Иссиқлик электр станциялари" АЖнинг Фарғона иссиқлик электр маркази филиалига тегишли 49 фоиз улуш давлат улушини камайтириш ҳисобига "Иссиқликтаъминоти" АЖ устав капиталини шакллантириш учун топширилади.

**) "Иссиқликтаъминоти" АЖ таркибига ўтказилмайди. Бунда:

"Тошкент иссиқлик маркази" МЧЖни бошқариш, ишлаб чиқариш узлуксизлигини таъминлаш ва технологик жараёнларни тартибга солиш, модернизация қилиш лойиҳаларини ишлаб чиқиш ва амалга ошириш, тарифларни шакллантириш, молиявий оқимларини бошқариш, ҳисоб-китоб тизимини тартибга солиш ҳамда корхонанинг молиявий ҳолатини мустаҳкамлаш вазифалари "Иссиқликтаъминоти" АЖга юклатилади;

"Иссиқлик электр станциялари" АЖ ушбу вазифаларнинг сифатли бажарилиши бўйича "Иссиқликтаъминоти" АЖга амалий ёрдам кўрсатади.

II. Хўжалик жамиятлари ва корхоналарни масъулияти

чекланган жамиятлар сифатида "Иссиқликтаъминоти"

АЖ таркибида қайта ташкил этишда мол-мулкларни

бериш, қабул қилиш ҳамда сотиш тартиби

1. "Иссиқликтаъминоти" АЖ ва унинг таркибига кирувчи ташкилотларнинг активларини бир ташкилотдан бошқа ташкилотга ўтказиш солиқ солиш мақсадида товарларни реализация қилиш бўйича айланма сифатида эътироф этилмайди ва иқтисодий жиҳатдан ўзини оқлайдиган бепул товар берилишига тенглаштирилади.

2. "Иссиқликтаъминоти" АЖ таркибида қайта ва янгидан ташкил этилаётган ташкилотларнинг устав фондига (устав капиталига) киритиладиган ёки бериладиган мол-мулклар баланс (қолдиқ) қийматида берилади.

3. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари Иқтисодиёт ва молия вазирлиги ҳузуридаги Кадастр агентлиги билан биргаликда 2025 йил июнга қадар "Иссиқликтаъминоти" АЖ тасарруфига бериладиган давлат кўчмас мулк объектларига бўлган ҳуқуқлар қонунчиликда белгиланган тартибда тўлиқ давлат рўйхатидан ўтказилишини таъминлайди.

4. Давлат рўйхатидан ўтказиш билан боғлиқ харажатлар Қорақалпоғистон Республикаси республика бюджети, вилоятлар ва Тошкент шаҳар маҳаллий бюджетлари ҳисобидан молиялаштирилади.

5. "Иссиқликтаъминоти" АЖ ва унинг таркибига кирувчи корхоналарга махсус мақсадли банк ҳисобварақларидан (20210...; 23202...; 22626...) фойдаланиш учун 2030 йил 31 декабрга қадар рухсат берилади.

6. "Иссиқликтаъминоти" АЖ ва унинг таркибига кирувчи корхоналарнинг моддий-техника базасини мустаҳкамлаш ҳамда ижтимоий ва ишлаб чиқариш инфратузилмасини ривожлантириш ва бошқа дастурлар доирасида "Иссиқликтаъминоти" АЖ ва унинг таркибидаги корхоналарга йўналтирилган маблағлар ҳисобига "Иссиқлик таъминоти" АЖдаги давлат ва унинг таркибидаги корхоналардаги "Иссиқликтаъминоти" АЖ улуши оширилади.

7. "Иссиқликтаъминоти" АЖ ва унинг таркибига кирувчи ташкилотларнинг асосий ҳисоб рақамларига кредитор қарздорликларни қоплаш мақсадида қўйилган тақиқ даврида ойлик иш ҳақи ҳамда унга тенглаштирилган тўловлар ва авария-таъмирлаш ишлари учун харажатларни амалга оширишга истисно тариқасида рухсат берилади.

8. "Иссиқликтаъминоти" АЖнинг тегишли хусусийлаштириш дастурларига асосан сотиш учун Давлат активларини бошқариш агентлигига ўтказилган (ўтказиладиган) ва ушбу қарор қабул қилинган санада сотилмаган активларини сотишдан тушган маблағлар (баҳолаш ва сотиш харажатлари қисми чегирилган ҳолда) "Иссиқликтаъминоти" АЖ га тегишли тизим ташкилотларининг кредитор қарздорлигини қоплашга мақсадли равишда йўналтирилади.

Ўзбекистон Республикаси

Президентининг

2025 йил 11 мартдаги

ПҚ-100-сон қарорига

2-ИЛОВА

Ижтимоий ва ишлаб чиқариш инфратузилмасини

ривожлантириш дастурлари доирасида

амалга ошириладиган лойиҳаларнинг

ЙИҒМА ПАРАМЕТРЛАРИ

        

Ўзбекистон Республикаси

Президентининг

2025 йил 11 мартдаги

ПҚ-100-сон қарорига

3-ИЛОВА

Давлат-хусусий шериклик асосида амалга ошириладиган

истиқболли инвестиция лойиҳалари

РЎЙХАТИ

Изоҳ:

Республика мувофиқлаштирувчи ишчи гуруҳига Қурилиш ва уй-жой коммунал хўжалиги вазирлиги ҳамда Иқтисодиёт ва молия вазирлиги таклифлари асосида лойиҳа параметрлари ва муддатларига ўзгартириш киритиш, шунингдек, истиқболсиз лойиҳаларни бошқа лойиҳага алмаштириш ваколати берилади.

Ўзбекистон Республикаси

Президентининг

2025 йил 11 мартдаги

ПҚ-100-сон қарорига

4-ИЛОВА

Халқаро молия институтлари иштирокида амалга

ошириладиган янги истиқболли лойиҳалар

РЎЙХАТИ

Изоҳ:

Республика мувофиқлаштирувчи ишчи гуруҳига Қурилиш ва уй-жой коммунал хўжалиги вазирлиги ҳамда Иқтисодиёт ва молия вазирлиги таклифлари асосида лойиҳа параметрлари ва муддатларига ўзгартириш киритиш, шунингдек, истиқболсиз лойиҳаларни бошқа лойиҳага алмаштириш ваколати берилади.

Ўзбекистон Республикаси

Президентининг

2025 йил 11 мартдаги

ПҚ-100-сон қарорига

5-ИЛОВА

Иссиқлик таъминоти корхоналарининг 2025 йил

1 январь ҳолатига мавжуд қарздорликларини кечиктириш

ва ҳисобланган пеня ва жарималарни ҳисобдан чиқариш

ТАРТИБИ

I. Тўлов муддати 5 йилга кечиктириладиган ва улар бўйича ҳисобланган пеня ва жарималар ҳисобдан чиқариладиган қарздорликлар

(млрд сўм)

Изоҳ:

*) Вазирлар Маҳкамасининг 2023 йил 28 апрелдаги 168-сон қарори билан иссиқлик таъминоти корхоналарига ажратилган 895 миллиард сўм бюджет ссудаларини қайтариш муддати шартномаларда кўрсатилган даврдан 3 йилга узайтирилади.

**) Қарздорликлар миқдорига солиштирма далолатномалар асосида аниқлик киритилиши мумкин.

II. Кечиктириладиган қарздорликлар миқдорига мос равишда "Ҳудудгазтаъминот" АЖ ва "Ҳудудий электр тармоқлари" АЖларнинг "Ўзгазтрейд" АЖ олдидаги, шунингдек, "Ўзсувтаъминот" АЖ тизим ташкилотларининг "Ҳудудий электр тармоқлари" АЖ олдидаги қарздорликларининг тўлов муддатлари кечиктирилади.

Ўзбекистон Республикаси

Президентининг

2025 йил 11 мартдаги

ПҚ-100-сон қарорига

6-ИЛОВА

Қорақалпоғистон Республикаси Вазирлар Кенгаши

Раиси, вилоятлар ва Тошкент шаҳри ҳокимларининг

иссиқлик таъминоти соҳасидаги қўшимча

ВАЗИФАЛАРИ

1. Ўз ҳудудидаги иссиқлик таъминоти тизимларининг доимий соз ҳолатда ишлашини назорат қилади, тизимларда вужудга келаётган авариявий ҳолатларни бартараф қилишда барча куч ва воситалар сафарбар қилинишини таъминлайди, кўп квартирали уй-жойлар ҳамда ижтимоий соҳа объектларининг куз-қиш мавсумида иссиқлик энергиясини қабул қилишга шайлигини таъминлашга жавобгар ҳисобланади.

2. Кўп квартирали уй-жойларнинг ички иситиш тизимларини тиклаш ёки янгилаш харажатларини қонунчилик билан тақиқланмаган манбалар, шу жумладан, маҳаллий бюджетнинг қўшимча манбалари ҳисобидан маблағлар билан таъминлаш масаласини ҳал қилади.

3. Ҳудудий иссиқлик таъминоти корхоналари моддий-техника базасини ва молиявий ҳолатини яхшилаш, шу жумладан, дебитор ва кредитор қарздорлигини қисқартиришга ҳамда истеъмолчиларга ҳисоблагичлар ўрнатиш параметрлари бажарилишига шахсан масъул ҳисобланади.

4. Ҳудудий иссиқлик таъминоти корхоналарининг иншоот ва объектларида энергия тежамкор ускуналарни ҳамда муқобил энергия манбаларини ўрнатиш орқали ишлаб чиқариш харажатлари камайтирилишини таъминлайди.

5. Ўз ҳудудидаги иссиқлик таъминоти соҳасидаги инвестиция лойиҳаларини комплекс тарзда ишлаб чиқишдан бошлаб ўз вақтида ишга туширишгача жавобгар ҳисобланади.

6. Халқаро молия институтлари ва хорижий молия ташкилотлари ҳисобидан амалга оширилаётган лойиҳаларни кўриб чиқиш ва маблағлар иқтисод қилинишини таъминлайди.

7. Ўз ҳудудидаги шаҳар ва туманларнинг иссиқлик таъминоти объектларини давлат-хусусий шериклик асосида бериш бўйича таклифларни "Иссиқликтаъминоти" АЖ билан биргаликда ишлаб чиқади ҳамда белгиланган тартибда киритади.

8. Амалга оширилган чораларнинг дастлабки, оралиқ ва якуний натижалари бўйича Қорақалпоғистон Республикаси Жўқорғи Кенгеси, Халқ депутатлари вилоятлар ва Тошкент шаҳри кенгашларига ҳар чоракда ҳисобот бериб боради.

Ўзбекистон Республикаси

Президентининг

2025 йил 11 мартдаги

ПҚ-100-сон қарорига

7-ИЛОВА

Уй-жой ҳамда бино-иншоотларни иссиқлик энергияси

билан таъминлаш соҳасини тубдан ислоҳ қилиш ҳамда

биноларнинг энергия самарадорлигини ошириш

ЧОРА-ТАДБИРЛАРИ РЕЖАСИ

            

Ўзбекистон Республикаси

Президентининг

2025 йил 11 мартдаги

ПҚ-100-сон қарорига

8-ИЛОВА

Марказлашган иссиқлик таъминоти соҳасини

тубдан ислоҳ қилиш ҳамда биноларнинг энергия

самарадорлигини ошириш ишларини жадаллаштириш

бўйича Республика мувофиқлаштирувчи ишчи гуруҳи

ТАРКИБИ

             

Изоҳ: Республика мувофиқлаштирувчи ишчи гуруҳ аъзолари бошқа ишга ўтган тақдирда, унинг таркибига ушбу лавозимларга янги тайинланган ёки зиммасига тегишли функцияларни бажариш юклатилган шахслар киритилади.

Ўзбекистон Республикаси

Президентининг

2025 йил 11 мартдаги

ПҚ-100-сон қарорига

9-ИЛОВА

Ўзбекистон Республикаси Президентининг

айрим қарорларига киритилаётган

ўзгартириш ва қўшимчалар

1. Ўзбекистон Республикаси Президентининг 2017 йил 20 апрелдаги "2018-2022 йилларда иссиқлик таъминоти тизимини ривожлантириш дастури тўғрисида"ги ПҚ-2912-сон қарори ўз кучини йўқотган деб ҳисоблансин.

2. Ўзбекистон Республикаси Президентининг 2019 йил 2 декабрдаги "Иссиқлик таъминоти тизимини такомиллаштириш ва иссиқлик таъминоти корхоналарини молиявий соғломлаштиришга оид қўшимча чора-тадбирлар тўғрисида"ги ПҚ-4542-сон қарорида:

а) 4-бандда:

иккинчи хатбоши "тўғрисидаги таклифлари қабул қилинсин" сўзлари билан тўлдирилсин;

учинчи ва тўртинчи хатбошилар чиқариб ташлансин;

бешинчи хатбоши учинчи хатбоши деб ҳисоблансин;

б) 8-банднинг "а" кичик банди ҳамда 5, 5а - 5н-иловалари ўз кучини йўқотган деб ҳисоблансин;

в) 9-банд ўз кучини йўқотган деб ҳисоблансин;

г) 2-илованинг 7 ва 11-позициялари чиқариб ташлансин.

3. Ўзбекистон Республикаси Президентининг 2023 йил 10 апрелдаги "Ижтимоий соҳа объектларининг иситиш тизимларини давлат-хусусий шериклик асосида модернизация қилиш тўғрисида"ги ПҚ-118-сон қарорида:

а) 2-бандда:

биринчи хатбоши қуйидаги таҳрирда баён этилсин:

"2. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари ҳамда тегишли ижтимоий соҳага масъул вазирлик ва идоралар 2023-2026 йилларда республика ҳудудларида фаолият юритаётган давлат ижтимоий соҳа объектларини экологик тоза ёқилғи турларига (электр энергияси, қуёш сув иситиш қурилмалари, қуёш панеллари ва шу кабилар) ва муқобил иссиқлик тизимларига (иссиқлик насослари ва шу кабилар) ўтказиш орқали куз-қиш мавсумида иссиқлик энергияси билан узлуксиз таъминлаш, қозонхоналарни модернизация қилиш ҳамда муассасаларнинг иссиқлик тизимини таъмирлаш ва белгиланган меъёрларда ишлашини таъминлашни давлат-хусусий шериклик асосида босқичма-босқич жорий этиш чораларини кўрсин. Бунда:";

тўртинчи хатбоши чиқариб ташлансин;

б) 5-банд қуйидаги таҳрирда баён этилсин:

"5. Қурилиш ва уй-жой коммунал хўжалиги вазирлиги (Ш. Хидоятов), Энергетика вазирлиги (Ж. Мирзамаҳмудов), Мактабгача ва мактаб таълими вазирлиги (Х. Умарова), Соғлиқни сақлаш вазирлиги (А. Худаяров), Маданият вазирлиги (О. Назарбеков), Спорт вазирлиги (А. Икрамов), Экология, атроф-муҳитни муҳофаза қилиш ва иқлим ўзгариши вазирлиги (А. Абдухакимов), Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари танлаб олинган хусусий шериклар билан бирга 2-иловада белгиланган ҳудудлар бўйича:

бир ой муддатда туман (шаҳар)лардаги давлат ижтимоий соҳа объектлари бўйича мавжуд иссиқлик таъминоти тизимларининг лойиҳа-смета ҳужжатларини ишлаб чиқиш чораларини кўрсин. Бунда хусусий шериклар томонидан лойиҳа-смета ҳужжатлари ишлаб чиқилиб, давлат шериклари томонидан тузилган ишчи гуруҳ муҳокамасига тақдим этилади ҳамда лойиҳа-смета ҳужжатларини ишлаб чиқиш ва давлат экспертизасидан ўтказиш харажатлари ҳудудларнинг маҳаллий бюджет маблағлари ҳисобидан модернизация маблағлари билан бирга молиялаштирилади;

хусусий шерикка ижтимоий соҳа муассасаларининг фойдаланилмаётган, бўш турган бино ва иншоотларини фойдаланиш учун вақтинчалик ижарага бериш ёки омборхона қурилиши учун ер участкасини (ер майдонига эгалик қилиш ҳуқуқи берилмаган ҳолда) ажратиш чораларини кўрсин. Бунда ер ва мулкни ижарага бериш қоидалари, ижара тўловларини амалга ошириш тартиби, ижарага берувчи ва ижарага олувчининг ҳуқуқ ва мажбуриятлари, ижарага берилган мол-мулкларнинг рўйхати ҳамда уларни назорат қилиш тартиби давлат-хусусий шериклик тўғрисидаги битимда белгиланади;

жорий йил 1 июлга қадар туман (шаҳар)ларда давлат-хусусий шериклик асосида ижтимоий соҳа объектларининг иссиқлик таъминоти тизимини модернизация қилиш ва бошқариш лойиҳаларининг (кейинги ўринларда - Лойиҳалар) концепцияларини тасдиқласин;

жорий йил 1 августдан лойиҳа-смета ҳужжатлари ишлаб чиқилган ва лойиҳа концепциялари тасдиқланган туман (шаҳар)лардаги ижтимоий соҳа объектларининг иссиқлик тизимларини давлат-хусусий шериклик асосида босқичма-босқич модернизация қилиш ишларини бошласин.

Давлат шериклари бир ҳафта муддатда қонунчиликда белгиланган тартибда лойиҳа-смета ҳужжатларини ўрганиб чиқиш бўйича тегишли мутахассисларни жалб қилган ҳолда ишчи гуруҳ таркибини тасдиқласин.

Ишчи гуруҳ томонидан лойиҳа-смета ҳужжатлари маъқулланиб, давлат экспертизасидан ўтказилгандан сўнг, модернизация ишлари бошланишига рухсат берилади ҳамда мазкур ишларнинг сифатли ва ўз вақтида бажарилиши бўйича хусусий шерик жавобгар ҳисобланади";

в) 6-бандда:

иккинчи хатбоши чиқариб ташлансин;

учинчи ва тўртинчи хатбошилар иккинчи ва учинчи хатбошилар деб ҳисоблансин;

иккинчи хатбоши қуйидаги таҳрирда баён этилсин:

"давлат шериги этиб - туман (шаҳар) ҳокимликлари ҳамда тегишли ижтимоий соҳага масъул вазирлик ва идоралар ҳудудий органлари белгилансин. Бунда туман(шаҳар)лардаги ижтимоий соҳа объектлари раҳбарлари (туман мактабгача ва мактаб таълим бўлими, туман тиббиёт бирлашмаси ва ҳ.к.) давлат шеригининг ҳуқуқ ва мажбуриятлари бажарилишига масъул этиб белгилансин";

г) 7-бандда:

"а" кичик банднинг иккинчи ва учинчи хатбошилари қуйидаги таҳрирда баён этилсин:

"давлат ижтимоий соҳа объектларининг иситиш тизимларини хатловдан ўтказиш ва давлат экспертизасидан ўтказишни таъминлаш;

лойиҳа-смета ҳужжатларини ишлаб чиқишда экологик тоза ёқилғи турлари (электр энергияси, қуёш сув иситиш қурилмалари, қуёш панеллари ва шу кабилар) ва муқобил иссиқлик тизимлари (иссиқлик насослари ва шу кабилар) орқали ишлайдиган энергия тежамкор қозонларни ўрнатиш ва объектлардаги ички иссиқлик тармоқларини модернизация қилишни назарда тутиш";

қуйидаги мазмундаги ўнинчи хатбоши билан тўлдирилсин:

"2025 йил 1 октябрга қадар ижтимоий соҳа объектларига етказиб берилган иссиқлик энергияси ҳисоби ва назоратининг онлайн тизимлари ҳамда иссиқлик энергияси ҳисоблагичлари ўрнатилиши бўйича зарур чоралар кўриш";

"б" кичик банднинг иккинчи - тўртинчи хатбошилари қуйидаги таҳрирда баён этилсин:

"санитария қоидалари, нормалари ва гигиена нормативларига мувофиқ ижтимоий соҳа объектларининг ички қисмларида давлат-хусусий шериклик тўғрисидаги битимнинг амал қилиш муддати давомида иссиқлик ҳароратини лозим даражада таъминлаш. Бунда 2025 йил 1 октябрга қадар ижтимоий соҳа объектларига етказиб берилган иссиқлик энергияси ҳисоби ва назоратининг онлайн тизимларини ҳамда етказиб берилган иссиқлик миқдорига аниқлик киритиш мақсадида иссиқлик энергияси ҳисоблагичларини ўз маблағлари ҳисобидан ўрнатиш;

иссиқлик энергияси йўқотишларини 30 фоизга камайтириш;

ижтимоий соҳа объектларига замонавий энергия тежамкор қозонларни ўрнатиш";

д) 8-банд қуйидаги таҳрирда баён этилсин:

"8. Иқтисодиёт ва молия вазирлиги уч ой муддатда давлат ижтимоий соҳа объектларининг иссиқлик таъминоти тизимини модернизация қилиш ва таъмирлаш ҳамда етказиб берилган иссиқлик таъминоти учун Давлат бюджетидан маблағлар ажратиш тартибини Вазирлар Маҳкамасига киритсин.

Мактабгача ва мактаб таълими вазирлиги, Соғлиқни сақлаш вазирлиги, Маданият вазирлиги ва Спорт вазирлиги доимий равишда ДХШ лойиҳалари доирасида етказиладиган иссиқлик энергияси учун нархларни (тарифларни) ҳудудий нархларни тартибга солувчи органлар томонидан ўрнатилган тартибда декларация қилиш учун тегишли ҳисоб-китобларни киритиб борсин";

е) 15-банднинг биринчи хатбошисидаги "Иқтисодиёт ва молия вазирлиги" сўзлари "Бош прокуратура" сўзлари билан алмаштирилсин;

ж) 16-банд қуйидаги таҳрирда баён этилсин:

"16. Тегишли соҳа вазирликлари давлат шериклари билан биргаликда Лойиҳалар бўйича тасдиқланган давлат-хусусий шериклик тўғрисидаги битимларда белгиланган самарадорлик кўрсаткичлари бажарилиши ва битим шартларига риоя этилиши юзасидан доимий мониторингни амалга ошириб борсин.

Бунда давлат шериклари мониторинг натижасида аниқланган камчиликлар учун битимни бекор қилишгача бўлган чораларни кўрсин";

з) 19-банд банд қуйидаги таҳрирда баён этилсин:

"19. Мазкур қарорнинг ижросини самарали ташкил қилишга масъул ва шахсий жавобгар этиб Қорақалпоғистон Республикаси Вазирлар Кенгаши Раиси ва вилоятлар ҳокимлари белгилансин.

Қарорнинг ижросини назорат қилиш Бош вазир ўринбосарлари А.Ж. Раматов ва Ж.А. Қўчқоров зиммаларига юклансин".

4. Ўзбекистон Республикаси Президентининг 2024 йил 24 декабрдаги "2025-2027 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида" ги ПҚ-454-сон қарори 5-бандининг саккизинчи хатбошиси қуйидаги таҳрирда баён этилсин:

"2025 йилда ишга тушириладиган таълим муассасалари объектларини, иссиқлик таъминоти объектларини ва бошқа (тиббий-ижтимоий, ичимлик сув таъминоти объектлари, автомобиль йўллари ва бошқа) объектларни 1 декабрга қадар фойдаланишга топшириш".

Қонун ҳужжатлари маълумотлари миллий базаси (www.lex.uz),

2025 йил 15 март