Полезное для бухгалтера в ноябре:
Бошқа шаҳарда ўтказиладиган тендерда қандай иштирок этиш мумкин? Қурилиш материалларини қандай сотиб олиш мумкин? Кун кечиришга маблағи етмаётган жисмоний шахсларга банклар томонидан кўмак кўрсатиладими? Бу ва бошқа саволларга жавоблар – buxgalter.uz нинг тўплам материалида.
Жамолиддин ҚАЛАНДАРОВ, Қурилиш вазирлиги ахборот хизмати раҳбари:
– Карантин шароитида қурилиш материалларини қандай тартибда сотиб олиш мумкин?
– Барча ишлаб чиқарувчиларга ижтимоий тармоқлардаги ўз саҳифалари орқали мижозлари билан алоқа ўрнатиш ва қурилиш жойига маҳсулот етказиб бериш топширилган. Бу борада ишлар тўлиқ амалга оширилмоқда.
– Тошкентда яшайман. Навоий вилоятида ўтказиладиган тендер савдоларида иштирок этиш истагим бор. Карантин шароитида тендер ташкилотчисига таклифлар пакетини қандай етказиб беришим мумкин?
– «Ўзбекистон почтаси» АЖ хизматидан фойдаланинг. Бугунги кунда Қурилиш вазирлиги тизимида барча хизматлар рақамлаштирилаётганлигини таъкидлаб ўтаман. 1 июлдан лойиҳаларнинг тендер савдолари электрон шаклда ўтказилиши режалаштирилмоқда.
Севара ЎРИНБОЕВА, Адлия вазирлиги ахборот хизмати раҳбари:
– Хусусий тиббиёт муассасаси раҳбариман. Коронавирус инфекциясига текширув тестини ўтказиш бўйича пулли хизматлар кўрсатсак бўладими? Агар мумкин бўлса, ким билан боғланишимиз лозим?
– Республика махсус комиссиясининг қарорига мувофиқ нодавлат тиббиёт ташкилотларига 2020 йил 1 сентябрга қадар санитария-эпидемиология ҳолатини яхшилаш ҳудудий марказлари раҳбарлари билан тузилган шартнома асосида барча талабларга риоя этилган ҳолда, коронавирус инфекцияси лаборатория текширувлари бўйича пуллик тиббий хизматлар кўрсатишга рухсат берилади.
Тегишинча, санитария-эпидемиология ҳолатини яхшилаш ҳудудий марказларига мурожаат қилишингиз мумкин.
Акмал НАЗАРОВ, Марказий банк жамоатчилик ва коммуникация сиёсати муносабатлари департаменти директори:
– Карантин сабабли вақтинча уйдаман. Кун кечириш учун етарли маблағим йўқ. Молиявий қийинчиликдан чиқиш учун банк картасига онлайн микроқарз олишим мумкинми?
– Жисмоний шахслар (мунтазам иш ҳақи оладиган) тижорат банкларининг мобиль иловалари орқали банк карталари ёрдамида онлайн-микроқарзлар олиш имкониятига эгалар.
Бундай хизматлар 11 та тижорат банклари орқали тақдим этилмоқда. Банкларнинг расмий сайтлари, ижтимоий тармоқлардаги саҳифалари ва мобиль иловаларидан батафсил маълумот олиш мумкин.
АОКА материаллари асосида.
