ҚҚС тўловчиларни рўйхатдан ўтказишга ариза бериш бўйича белгиланган муддат узайтирилди

Солиқ кодексига декабрь ойида киритилган охирги ўзгартиришларни амалиётдан келтирилган мисоллар билан Молия вазирлигининг Билвосита солиқлар ва божхона тўловлари методологияси бўлими бошлиғи Баҳодир БОЙҚАБИЛОВ buxgalter.uz учун махсус тушунтириб берди:

– 2020 йилда СКда айланмадан олинадиган солиқни тўламайдиган солиқ тўловчиларнинг 8 та тоифаси назарда тутилган эди. Бу йилдан уларнинг рўйхати кенгайтирилди. Энди айланмадан олинадиган солиқ қуйидагиларга ҳам татбиқ этилмайди :

• алкоголь маҳсулотлари, шу жумладан пивони чакана сотиш бўйича турғун савдо шохобчалари;
• бозор ва савдо комплекслари.

Турғун чакана савдо шохобчаси – бу :

• жойлардаги давлат ҳокимияти органлари қарори билан ажратилган ер участкаларида жойлашган;
• «Давархитектқурилиш» қўмитаси органларида тасдиқланган лойиҳа-смета ҳужжатлари бўйича қурилган;
• санитария ва ёнғин хавфсизлиги нормалари ва талабларига жавоб берадиган;
• савдо залига, савдо асбоб-анжомларига ҳамда товарларни сақлаш, сортларга ажратиш ва қадоқлаш учун хоналарга эга бўлган, шунингдек НКМ билан жиҳозланган объект (бино, иншоот).

Бозор – белгиланган жойларда ва белгиланган қоидалар бўйича савдо фаолиятини амалга ошириш учун мўлжалланган, белгиланган тартибда ана шундай мақом олган доимий ёки вақтинчалик асосда фаолият кўрсатадиган мулкий комплекс.

Савдо комплекси – чакана савдо ва хизматлар кўрсатиш соҳасининг турғун объектлари жойлашган ягона ер участкасида қурилган бинога (иншоотга) ёхуд бинолар (иншоотлар) комплексига мулк ҳуқуқи билан ёки бошқа қонуний асосда эгалик қилувчи юридик шахс .

Мазкур тоифадаги солиқ тўловчилар қуйидагилардан қатъи назар, 2021 йил 1 январдан бошлаб ҚҚС ва тегишинча, фойда солиғини тўлашга ўтадилар:

• жами даромад ҳажми. Корхона алкоголли маҳсулотлар, шу жумладан пивони чакана сотган бўлса ёки бозор ёхуд савдо комплекси ҳисобланган тақдирда, у жами даромади миқдори 1 млрд сўмдан ошишини кутмасдан ҚҚС ва фойда солиғини тўлашга ўтиши лозим;
• умумий жами даромадда алкоголли маҳсулотларни (шу жумладан пивони) чакана сотишдан олинган даромад улуши.

ҚҚСни ҳисобга олиш

Корхона ҚҚС тўловчиси сифатида ҳисобга қўйилган санадаги балансидаги ТМЗ қолдиқлари қиймати ва узоқ муддатли активларнинг баланс қийматида ҳисобга олинган солиқ суммасини ҳисобга олишга ҳақли бўлади. Ҳисобга олинадиган солиқ суммаси қуйидагича аниқланади:

• ТМЗ қолдиқлари бўйича – сўнгги 12 ой ичида олинган товарларнинг ҳақиқий қиймати бўйича;
• узоқ муддатли активлар бўйича – мазкур объектларнинг шахс ҚҚС бўйича рўйхатдан ўтказиш ҳисобига қўйилган санадаги қайта баҳоланиши ҳисобга олинмаган, солиқнинг тегишли суммасини ўз ичига олган баланс (қолдиқ) қийматидан келиб чиққан ҳолда .