Ногиронлиги бўлган шахслар учун туризм инфратузилмасини барпо этишнинг манфаатли томонлари

ҚҲТБТда Президентнинг “Ўзбекистон Республикасида тўсиқсиз туризм инфратузилмасини ривожлантириш ва уни рағбатлантириш чора-тадбирлари тўғрисида”ги қарори лойиҳаси жойлаштирилди. Ҳужжат имконияти чекланган шахслар учун инфратузилмани ривожлантирувчи туроператорлар ва турагентлар, жойлаштириш воситалари ҳамда ташувчилар учун субсидия ва имтиёзларни назарда тутади. Батафсил - buxgalter.uz шарҳида.

2022 йил 1 апрель ҳолатига Ўзбекистонда 790 мингдан зиёд ногиронлиги бўлган фуқаролар яшайди. Улар учун туризм инфратузилмаси такомиллаштирилади:

• Самарқанд, Бухоро, Хоразм ва Қашқадарё вилоятларида - 2023 йилда;
• Фарғона, Наманган, Андижон ва Жиззах вилоятларида - 2024 йилда;
• Қорақалпоғистон Республикаси, Навоий, Сурхондарё ва Сирдарё вилоятларида - 2025 йилда;
• Тошкент шаҳри ва Тошкент вилоятида - 2026 йилда.

Тадбиркорлар учун

2023 йил 1 мартдан 2026 йил 1 мартга қадар қуйидагилар давлат томонидан қопланади:

• меҳмонхонанинг камида 3 та хонаси ўриндиқли аравачадан фойдаланадиган, шунингдек, эшитиш ва кўриш бўйича ногиронлиги бўлган шахслар учун дисплейлар ҳамда овозли қурилмалар билан жиҳозлаш ва сақлаш бўйича харажатлар:

       - 5 юлдузли тоифадаги меҳмонхонанинг ҳар бир хонаси учун 3 млн сўм;

       - 4 юлдузли тоифадаги меҳмонхонанинг ҳар бир хонаси учун 2 млн сўм;

       - 3 юлдузли тоифадаги меҳмонхонанинг ҳар бир хонаси учун 1,5 млн сўм;

       - тоифасиз меҳмонхонанинг ҳар бир хонаси учун 1 млн сўм;

• ўриндиқли аравачалар учун бассейнларни қулай тарзда жиҳозлаш харажатларининг бир қисми - лекин 10 млн сўмдан ортиқ бўлмаган миқдорда;
• ресторан ва кафелар учун овозли меню харид қилиш ва таъминлаш бўйича харажатлар - ҳар бир овозли меню учун 1 млн сўм миқдорида;
• транспорт хизматларини кўрсатувчи тадбиркорлик субъектларининг қулай тарзда жиҳозлаш харажатларини қоплаш:

       - М₁ тоифадаги автомобилларни кўтаргич билан таъминлаш учун 10 млн сўм, лифтлар билан таъминлаш 15 млн сўм;

       - М₂ ва М₃ тоифадаги автомобилларни кўтаргич билан таъминлаш учун 15 млн сўм, лифтлар билан таъминлаш 20 млн сўм; 

       - М₁, М₂ ва М₃ тоифадаги автомобилларда ҳар бир ўриндиқ учун 3 млн сўм.

Ўзбекистон фуқаролари учун ички саёҳатни ташкил этувчи (гуруҳ учун камида 5 нафар ногиронлиги бўлган шахс) Ўзбекистон резиденти бўлган туроператорлар, бундай саёҳат бўйича фойда солиғи тўлашдан озод этилади. 

Ногиронлиги бўлган туристлар учун

2022 йил 1 сентябрдан бошлаб “Ўзбекистон бўйлаб саёҳат қил!” дастури доирасида болаликдан ногиронлиги бўлган шахслар ҳамда I ва II гуруҳ ногиронлиги бўлган шахсларга саёҳат давомида ҳамроҳлик қилувчи фуқароларга қуйидаги миқдорларда чегирмаларни бериш жорий қилинади:

• транспорт воситалари чипталарини харид қилиш ва фойдаланишда:

       - авиа чипта қийматининг 50%и;

       - темир йўл чиптаси қийматининг 40%и;

       - автобус чиптаси қийматининг 30%и;

• маданий мерос объектлари, музейлар ва театрларга ташриф  буюрганда:

       - чипта қийматининг 50%и.

Чипталарни харид қилиш ва улардан фойдаланиш учун чегирмалар ногиронлиги бўлган шахсларнинг пенсия гувоҳномаси ёки тиббий-меҳнат эксперт комиссиясининг маълумотномаси мавжуд бўлганда тақдим этилади.

Лойиҳа ҚҲТБТда 26 июнга қадар муҳокама қилинади. Муҳокамада иштирок этиш учун ҳавола бўйича ўтинг.

Саида ЖОНИЗОҚОВА тайёрлади