Сиз фойдаланаётган онлайн-НКТ белгиланган талабларга мувофиқ келмаса, нима қилиш керак

Онлайн-НКТ ишлаб чиқарувчилари ва ТХКМларни улар 1 июлгача ишлаб чиқариладиган ва хизмат кўрсатиладиган техникани қўйилган талабларга тўлиқ мос келтиришга мажбур эканлиги ҳақида огоҳлантирилди. Кўрсатмани бажармаганларни аввал касса техникасини рўйхатга олишда чеклайди, кейин эса умуман давлат реестридан чиқариб ташлайди.

Касса техникаси фойдаланувчилари бу вазиятда қандай иш кўришини buxgalter.uz сўровига кўра онлайн-НКМ хизмат кўрсатиш соҳасидаги эксперт, «RIG» МЧЖ директори Рустам ЯҚУБОВ тушунтирди:

– Биз Солиқ қўмитасидан хат олдик, унда онлайн-НКТ ишлаб чиқарувчилари ва Техник хизмат кўрсатиш марказларини жорий йилнинг 1 июлигача қуйидагиларни амалга ошириш мажбурлиги ҳақида огоҳлантиришган:

– тадбиркорлик субъектларининг tasnif.soliq.uz базасида мавжуд бўлгандан фарқли МХИК кодларини яратиш ва ишлатиш имкониятини чеклаш;

– онлайн-НКТ ва виртуал касса фойдаланувчиларига тўловлар қабул қилишда карта турини (корпоратив ёки шахсий) танлаш имкониятини яратиш ва бу маълумотнинг чекларда акс этишини ҳамда уни фискал маълумотлар операторига юборишни таъминлаш;

– фойдаланувчи қўлланмасида ва чекда маълумотларнинг асосан давлат тилида акс этишини таъминлаш.

Белгиланган муддатларда камчиликлар бартараф этилмаган тақдирда солиқ органлари аввал тегишли онлайн-НКМларни рўйхатга олишга вақтинча чеклов киритади, кейин эса давлат реестридан чиқариб ташлаш чораларини кўради.

Албатта, бизнес ТХКМлар ўз муаммоларини ҳал қилишини кутиб, ўзига зарар етказиб бекор туриб қола олмайди. Агар давлат реестрида сиз фойдаланаётган касса аппарати моделига хизмат кўрсатадиган ТХКМлар қолмаган бўлса ва у юқорида айтилган талабларга жавоб бермаса, уни бошқа маркага ёки моделга алмаштиришга тўғри келади.

Бу НКТни қайта рўйхатдан ўтказишни талаб қилади. Бунинг учун хизмат олмоқчи бўлган янги ТХКМга бевосита мурожаат қилинг ва улар билан шартнома тузинг. Бунда фискал модулни ўз зиммангизда сақламоқчи бўлсангиз ёки уни алмаштиришни истасангиз, қандай ҳаракат қилишни биз қуйидаги тавсияда тушунтирдик:

• Онлайн-НКМ ва виртуал кассани қачон ва қандай қайта рўйхатдан ўтказиш керак.

Янги касса ва янги ТХКМни қандай танлаш керак

Ўзбекистондаги тадбиркорлар қуйидагиларга киритилган назорат-касса техникасидан фойдаланишлари мумкин :

• Онлайн-НКМларнинг давлат реестри;
• Виртуал кассаларнинг давлат реестри;
• Маркетплейсларнинг давлат реестри (унда қўллашга рухсат этилган маркетплейслар ва электрон тўлов тизимлари келтирилган).

Реестрларга фақат Ўзбекистон Республикаси ҳудудида қўллашга рухсат этилган онлайн-НКМ, виртуал касса ва фискал модулга қўйиладиган Техник талабларга мос келадиган онлайн-НКТлар киритилади. Равшанки, мазкур реестрлар июль-август ойларида муайян ўзгаришларга учрайди.

Шунинг учун нафақат реестрларга, балки тартибга солувчи хатида келтирилган онлайн-НКТга қўйиладиган талабларга ҳам эътибор беринг.