Ўзбекистон Республикаси Вазирлар Маҳкамасининг 21.12.2004 й. 596-сон "Ўзбекистон Республикасининг Хусусий секторни ривожлантириш бўйича Ислом корпорациясига аъзолиги тўғрисида"ги Қарори
ЎЗБЕКИСТОН РЕСПУБЛИКАСИ
ВАЗИРЛАР МАҲКАМАСИНИНГ
ҚАРОРИ
21.12.2004 й.
N 596
ЎЗБЕКИСТОН РЕСПУБЛИКАСИНИНГ ХУСУСИЙ
СЕКТОРНИ РИВОЖЛАНТИРИШ БЎЙИЧА ИСЛОМ
КОРПОРАЦИЯСИГА АЪЗОЛИГИ ТЎҒРИСИДА
Халқаро молия институтлари билан ҳамкорликни кенгайтириш мақсадида ҳамда Ўзбекистон Республикасининг Ислом тараққиёт банкига аъзолигини ҳисобга олиб Вазирлар Маҳкамаси ҚАРОР ҚИЛАДИ:
1. Ўзбекистоннинг Хусусий секторни ривожлантириш бўйича Ислом корпорациясига қабул қилиниши тўғрисидаги қарор Хусусий секторни ривожлантириш бўйича Ислом корпорацияси (ХСРИК) раҳбарияти томонидан маъқулланганлиги маълумот учун қабул қилинсин.
2. Хусусий секторни ривожлантириш бўйича Ислом корпорациясини таъсис этиш тўғрисида 1999 йил 3 ноябрдаги Битим моддалари қабул қилинсин.
Ўзбекистон Республикаси Хусусий секторни ривожлантириш бўйича Ислом корпорациясини таъсис этиш тўғрисидаги Битимни қабул қилганлиги Ўзбекистон Республикаси Ҳукумати номидан Хусусий секторни ривожлантириш бўйича Ислом корпорациясига маълум қилинсин.
3. Ўзбекистон Республикаси Ташқи иқтисодий фаолият миллий банкига:
ХСРИК ўз авуарларини сақлаши мумкин бўлган депозитарий;
Хусусий секторни ривожлантириш бўйича Ислом корпорациясини таъсис этиш тўғрисида 1999 йил 3 ноябрдаги Битим билан боғлиқ масалалар юзасидан ХСРИК билан алоқаларни амалга ошириш функциялари юклансин.
4. Хусусий секторни ривожлантириш бўйича Ислом корпорацияси устав капиталига Ўзбекистон Республикаси бадалларини тўлаш жадвали иловага мувофиқ тасдиқлансин.
5. Ўзбекистон Республикаси Ташқи иқтисодий фаолият миллий банки белгиланган тартибда:
ўз маблағлари ҳисобига ҳар бирининг номинал қиймати 10 000 АҚШ доллари бўлган 5 та акцияга ёзилишни;
иловага асосан тасдиқланган тўлов жадвалига мувофиқ бадаллар тўланишини таъминласин.
6. Ўзбекистон Республикаси Ташқи иқтисодий фаолият миллий банки бошқаруви раиси - Ислом тараққиёт банки бошқарувчисининг Ўзбекистон Республикаси томонидан ўринбосари З. С. Мирхўжаев Хусусий секторни ривожлантириш бўйича Ислом корпорацияси Бош Ассамблеясида Ўзбекистон Республикаси номидан фаолият юритишга вакил қилинсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Э. М. Ғаниев зиммасига юклансин.
Вазирлар Маҳкамасининг Раиси И. Каримов
2004 йил 21 декабрдаги
596-сон қарорига
ИЛОВА
Хусусий секторни ривожлантириш бўйича Ислом корпорацияси
устав капиталига Ўзбекистон Республикаси бадалларини тўлаш
ЖАДВАЛИ
Тўлаш йиллари |
Тўлаш суммаси (АҚШ долларида)* |
2004 |
10 000 |
2005 |
10 000 |
2006 |
10 000 |
2007 |
10 000 |
2008 |
10 000 |
|
|
*) Изоҳ. 1 та акциянинг қиймати 10 000 АҚШ доллари. Тўловлар АҚШ долларида амалга оширилади.
"Ўзбекистон Республикаси қонун ҳужжатлари тўплами", 2004 йил, 51-сон, 517-модда.