Ўзбекистон Республикаси Марказий сайлов комиссиясининг 30.12.2009 й. "Ўзбекистон Республикаси Олий Мажлиси Қонунчилик палатасига депутатлар сайлови бўйича айрим сайлов округларида такрорий овоз беришни ўтказиш тўғрисида"ги Қарори

ЎЗБЕКИСТОН РЕСПУБЛИКАСИ

МАРКАЗИЙ САЙЛОВ КОМИССИЯСИНИНГ

ҚАРОРИ

30.12.2009 й.

ЎЗБЕКИСТОН РЕСПУБЛИКАСИ

ОЛИЙ МАЖЛИСИ ҚОНУНЧИЛИК

ПАЛАТАСИГА ДЕПУТАТЛАР САЙЛОВИ

БЎЙИЧА АЙРИМ САЙЛОВ ОКРУГЛАРИДА

ТАКРОРИЙ ОВОЗ БЕРИШНИ ЎТКАЗИШ

ТЎҒРИСИДА

Ўзбекистон Республикаси Олий Мажлиси Қонунчилик палатасига депутатлар сайлови 2009 йил 27 декабрда бўлиб ўтди. "Ўзбекистон Республикаси Олий Мажлисига сайлов тўғрисида"ги Ўзбекистон Республикасининг Қонунига тўла мувофиқ равишда очиқ ва ошкоралик шароитида ўтган сайловда 15 миллион 108 мингдан ортиқ ёки рўйхатга киритилган сайловчиларнинг 87,8 фоизи қатнашди.

Марказий сайлов комиссияси Олий Мажлис Қонунчилик палатасига депутатлар сайловини ўтказувчи округ сайлов комиссияларининг округ бўйича сайлов натижаларини аниқлаш ҳақидаги баённомаларини кўриб чиқиб, 39 та сайлов округи бўйича депутатликка номзодлардан биронтаси ҳам сайланиш учун зарур бўлган овозларни тўплай олмаганлигини аниқлади.

Округ сайлов комиссияларининг тегишли қарорларини кўриб чиқиб, "Ўзбекистон Республикаси Олий Мажлисига сайлов тўғрисида"ги Ўзбекистон Республикаси Қонунининг 45-моддаси, "Ўзбекистон Республикаси Марказий сайлов комиссияси тўғрисида"ги Ўзбекистон Республикаси Қонунининг 5-моддасига мувофиқ, Марказий сайлов комиссияси ҚАРОР ҚИЛАДИ:

1. Ўзбекистон Республикаси Олий Мажлиси Қонунчилик палатасига депутатлар сайловини ўтказувчи 39 та сайлов округида 1-иловага мувофиқ такрорий овоз бериш 2010 йил 10 январь - якшанба куни ўтказилсин.

Белгилаб қўйилсинки:

"Ўзбекистон Республикаси Олий Мажлисига сайлов тўғрисида"ги Ўзбекистон Республикаси Қонунининг 45-моддаси биринчи қисмига мувофиқ такрорий овоз бериш сайлов округи бўйича энг кўп овоз олган икки нафар номзод бўйича ўтказилади;

такрорий овоз бериш асосий сайловни ўтказиш учун ташкил этилган сайлов участкаларида илгари тузилган сайловчиларнинг рўйхатлари асосида ҳамда "Ўзбекистон Республикаси Олий Мажлисига сайлов тўғрисида"ги Ўзбекистон Республикасининг Қонуни талабларига мувофиқ ўтказилади.

2. Ўзбекистон Республикаси Олий Мажлиси Қонунчилик палатасига депутатлар сайлови бўйича айрим сайлов округларида такрорий овоз беришга тайёргарлик кўриш ва уни ўтказиш юзасидан тадбирлар дастури тасдиқлансин.

3. Олий Мажлис Қонунчилик палатасига депутатлар сайловини ўтказувчи тегишли округ ва участка сайлов комиссиялари такрорий овоз беришни Ўзбекистон Республикасининг Конституцияси, "Фуқаролар сайлов ҳуқуқларининг кафолатлари тўғрисида"ги, "Ўзбекистон Республикаси Олий Мажлисига сайлов тўғрисида"ги Ўзбекистон Республикасининг Қонунлари талабларига қатъий амал қилган ҳолда ўтказишни таъминласинлар.

4. Ўзбекистон Республикаси Олий Мажлиси Қонунчилик палатасига депутатлар сайлови бўйича такрорий овоз бериш учун бюллетенлар нашр этиш ва жойларга етказиб бериш билан боғлиқ ишлар Марказий сайлов комиссиясининг 2009 йил 13 ноябрдаги "Ўзбекистон Республикаси Олий Мажлиси Қонунчилик палатаси депутатлари сайловига доир сайлов бюллетени ва сайлов варақаси намуналарини тасдиқлаш тўғрисида"ги 439-сон қарорида белгиланган тартибда амалга оширилсин.

5. Мазкур Қарор матбуотда эълон қилинсин.

Ўзбекистон Республикаси

Марказий сайлов комиссияси Раиси                                 М. Абдусаломов

Ўзбекистон Республикаси

Марказий сайлов комиссиясининг

2009 йил 30 декабрдаги қарорига

1-ИЛОВА

Қорақалпоғистон Республикаси

1-Нукус сайлов округи

5-Хўжайли сайлов округи

Андижон вилояти

14-Марҳамат сайлов округи

Бухоро вилояти

27-Жилвон сайлов округи

Жиззах вилояти

30-Дўстлик сайлов округи

31-Зарбдор сайлов округи

Навоий вилояти

35-Қизилтепа сайлов округи

Наманган вилояти

44-Тўракўрғон сайлов округи

45-Уйчи сайлов округи

Самарқанд вилояти

62-Ургут сайлов округи

Сирдарё вилояти

66-Янгиер сайлов округи

67-Оқолтин сайлов округи

Сурхондарё вилояти

74-Денов сайлов округи

75-Сариосиё сайлов округи

Тошкент вилояти

78-Бекобод сайлов округи

80-Бўстонлиқ сайлов округи

85-Чиноз сайлов округи

89-Дўстобод сайлов округи

Фарғона вилояти

90-Бешариқ сайлов округи

92-Яйпан сайлов округи

94-Бағдод сайлов округи

96-Олтиариқ сайлов округи

97-Охунбобоев сайлов округи

98-Марғилон сайлов округи

99-Фарғона сайлов округи

101-Тошлоқ сайлов округи

102-Қува сайлов округи

103-Бувайда сайлов округи

Хоразм вилояти

107-Гурлан сайлов округи

108-Ҳазорасп сайлов округи

111-Шовот сайлов округи

Қашқадарё вилояти

113-Бешкент сайлов округи

116-Косон сайлов округи

118-Китоб сайлов округи

122-Ғузор сайлов округи

Тошкент шаҳри

125-Дархон сайлов округи

129-Дўмбиробод сайлов округи

131-Астробод сайлов округи

134-Қўйлиқ сайлов округи

“Халқ сўзи”, 2009 йил 31 декабрь