Экспорт маҳсулоти ишлаб чиқарилаётганда мол-мулк солиғи ставкасини қўллаш тартиби тўғрисида тушунтириш (МВ ва ДСҚ томонидан тасдиқланган тушунтириш)

Экспорт маҳсулоти ишлаб чиқарилаётганда

мол-мулк солиғи ставкасини қўллаш

тартиби тўғрисида тушунтириш

Мол-мулк солиғи ҳисоб-китобларининг таҳлили шуни кўрсатадики, ўзи ишлаб чиқарган маҳсулотни экспорт қиладиган айрим корхоналар, Ўзбекистон Республикаси Молия вазирлиги ва Давлат солиқ қўмитасининг 2002 йил 22 январдаги 25 ва 2002-13-сон қарори билан тасдиқланган Юридик шахсларнинг мол-мулкидан олинадиган солиқни ҳисоблаб чиқариш ва бюджетга тўлаш тартиби тўғрисидаги йўриқноманинг 18-бандига ҳавола бериб, экспорт маҳсулотининг салмоғи 15 дан 25 фоизга қадар бўлганида мол-мулк солиғининг ставкасини 0,6 фоиз тарзида қўллаяптилар.

Вазирлар Маҳкамасининг 2001 йил 31 декабрдаги 490-сон қарорига (14-илова) мувофиқ, эркин алмаштириладиган валютага ўзи ишлаб чиқарган товарлар (ишлар, хизматлар) экспортининг улуши 15 дан 25 фоизга қадарни ташкил этадиган экспортчи корхоналар учун мол-мулк солиғининг ставкаси 30 фоизга камайтирилади. Ушбу қоида юқорида кўрсатилган Йўриқноманинг 10-бандида акс эттирилган.

Шу муносабат билан экспорт маҳсулотининг улуши 15 дан 25 фоизга қадар бўлганида мол-мулк солиғи 1,4 фоиз ставкаси бўйича, яъни 30%га пасайтирилган ставка бўйича тўланади.

Молия вазирининг

ўринбосари                                                   Т.ЖЎРАЕВ

Давлат солиқ қўмитаси

раисининг биринчи ўринбосари                   Э.ГАДОЕВ