Ўзбекистон Республикаси Олий хўжалик судининг кассация инстанцияси 19.12.2006 й. 10-0610/8749-сонли Қарори

ЎЗБЕКИСТОН РЕСПУБЛИКАСИ

ОЛИЙ ХЎЖАЛИК СУДИНИНГ

КАССАЦИЯ ИНСТАНЦИЯСИ

ҚАРОРИ

19.12.2006 й.

N 10-0610/8749

(КЎЧИРМА)

Солиқ соҳасидаги ҳуқуқбузарликлар учун жавобгарликни енгиллаштирадиган ёки бартараф этадиган қонун ҳужжатлари орқага қайтиш кучига эга

Шайхонтоҳур туман давлат солиқ инспекцияси хўжалик судига мурожаат этиб, "REAL VITA PHARMA" масъулияти чекланган жамиятига нисбатан 983762 сўм молиявий санкция қўллашни сўраган.

Биринчи инстанция судининг ҳал қилув қарори билан даъво рад этилган.

Иш апелляция тартибида кўрилмаган.

Даъвогар ўзининг кассация шикоятида ҳал қилув қарорини бекор қилиб, даъвони қаноатлантиришни сўраган.

Протестда ҳал қилув қарорини бекор қилиб, ишни янгидан кўриш учун юбориш сўралган.

Судлов ҳайъати, шикоят ва протест важларини муҳокама қилиб, ишдаги ҳужжатларни ўрганиб чиқиб, қуйидагиларга кўра ҳал қилув қарорини ўзгартиришни лозим топади.

Ишдаги ҳужжатларга кўра, Назорат қилувчи органлар фаолиятини мувофиқлаштирувчи Республика кенгаши Тошкент шаҳар ҳудудий комиссиясининг 2006 йил 12 июндаги рухсатномаси, Тошкент шаҳар давлат солиқ бошқармасининг 2006 йил 12 июндаги 169-сон буйруғига асосан жавобгар корхонага қарашли бўлган дорихонада қисқа муддатли текшириш ўтказилган.

Текшириш якуни бўйича тузилган 2006 йил 12 июндаги далолатномада дорихона кассасидаги нақд пул саноқдан ўтказилганда назорат-касса машинасига кирим қилинмаган 21810 сўм савдо пули мавжудлиги, шунингдек банкка топширилган нақд пул маълумотлари билан корхона ҳисоботлари солиштирилганда банк муассасасига 43762 сўм нақд пул топширилмаганлиги қайд этилган. Бунинг учун эса даъвогар жавобгарга нисбатан 983762 сўм молиявий санкция қўллашни сўраган.

Ўзбекистон Республикаси Солиқ кодекси 135-моддасининг 9-бандида назорат-касса машиналарини ишлатиш мажбурий бўлгани ҳолда уларни ишлатмасдан савдони амалга оширганлик ва хизматлар кўрсатганлик, шунингдек харидорга квитанция ёзиб бериш, талон ва унга тенглаштирилган бошқа чекларни бериш мажбурий бўлгани ҳолда бундай ҳужжатларни бермасдан товарларни реализация қилганлик ва хизматлар кўрсатганлик учун солиқ тўловчидан энг кам ойлик иш ҳақининг ўттиз бараваридан эллик бараваригача миқдорда жарима ундирилади.

Жавобгар томонидан 21810 сўмлик савдо пули назорат-касса машинасига кирим қилинмаганлиги текшириш далолатномаси, дорихона фармацевти Ю.Бобожонованинг тушунтириш хати, назорат-касса машинасидан олинган ҳисоботлар ва бошқа ҳужжатлар билан тўлиқ тасдиқланади. Шунинг учун судлов ҳайъати жавобгарга нисбатан энг кам ойлик иш ҳақининг ўттиз баравари - 282000 сўм молиявий санкция қўллашни лозим деб ҳисоблайди.

Жавобгарнинг корхонага банк томонидан касса лимити белгиланганлиги, назорат-касса машинасига кирим қилинмаган пул маблағи олдинги кунлардан қолдиқ бўлиб қолган савдо пули эканлиги тўғрисидаги важлари билан келишиб бўлмайди. Чунки, корхона фармацевти томонидан берилган тушунтириш хатида ушбу пул шу кунги савдо пули эканлиги қайд этилган. Бундан ташқари, корхона касса китобида олдинги иш кунидаги 958200 сўмлик савдо пулининг ҳаммаси банкка топширилганлиги қайд этилган.

Ўзбекистон Республикаси Солиқ кодекси 3-моддасининг иккинчи қисмига кўра солиқ соҳасидаги ҳуқуқбузарликлар учун жавобгарликни енгиллаштирадиган ёки бартараф этадиган қонун ҳужжатлари орқага қайтиш кучига эга. "Тадбиркорлик субъектларини ҳуқуқий ҳимоя қилиш тизими такомиллаштирилганлиги ҳамда уларнинг молиявий жавобгарлиги эркинлаштирилганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида"ги Ўзбекистон Республикасининг Қонунига кўра Солиқ кодексининг 135-моддаси янги таҳрирда баён қилинган ва ушбу моддадан нақд пул тушумини банк муассасасига топширмаслик ҳолати бўйича молиявий жарима чиқариб ташланган. Яъни, ушбу ҳуқуқбузарлик бўйича жавобгарлик чораси бартараф этилган. Шунинг учун даъвогарнинг жавобгарга нисбатан банк муассасасига 43762 сўм миқдорида молиявий санкция қўллаш ҳақидаги талаби рад этилиши, ҳал қилув қарорининг ушбу талаб бўйича қисми ўзгаришсиз қолдирилиши лозим.

“Ўзбекистон Республикаси Олий хўжалик суди Ахборотномаси”,

2007 й., 12-сон