Ўзбекистон Республикаси Олий хўжалик суди Раёсатининг 27.04.2006 й. Р N 32-сон Қарори

ЎЗБЕКИСТОН РЕСПУБЛИКАСИ

ОЛИЙ ХЎЖАЛИК СУДИ РАЁСАТИ

ҚАРОРИ

27.04.2006 й.

N Р 32

(Кўчирма)

Сирдарё вилоят прокуратураси Сардоба туман ҳокимлиги манфаатида хўжалик судига даъво аризаси билан мурожаат қилиб, туман ҳокимлиги билан "Ёқуббой ота" фермер хўжалиги ўртасида тузилган ер участкасини узоқ муддатга ижарага бериш шартномасини бекор қилишни ва фермер хўжалигини тугатишни сўраган.

Сирдарё вилоят хўжалик судининг 2005 йил 17 январдаги ҳал қилув қарори билан даъво қаноатлантирилиб, Гулистон туман ҳокимлиги ва "Ёқуббой ота" фермер хўжалиги ўртасида 2004 йил 12 мартда тузилган ер участкасини узоқ муддатли ижарага бериш шартномаси бекор қилинган ҳамда фермер хўжалиги тугатилган.

Шу вилоят хўжалик суди апелляция инстанциясининг 2005 йил 26 февралдаги қарори билан ҳал қилув қарори ўзгаришсиз қолдирилган.

Иш кассация инстанциясида кўрилмаган.

Олий хўжалик суди раисининг биринчи ўринбосари томонидан келтирилган протестда иш бўйича қабул қилинган суд қарорларинг бекор қилиб, ишни янгидан кўриш учун биринчи инстаниия судига юбориш масаласи қўйилган.

Раёсат судьянинг маърузасини тинглаб, жавобгар вакилининг тушунтиришини, Бош прокурор ўринбосарининг протестни қувватлаши ҳақидаги фикрини эшитиб, қуйидаги асосларга кўра протестни қаноатлантириш лозим деб ҳисоблайди.

Даъво аризасига кўра, фермер хўжалигининг чигит экилган даласида ғўза тўлиқ униб чиқмаганлиги, умуман агротехник қоидаларга риоя қилинмаганлиги ва экинзорлар қаровсиз ҳолда қолдирилганлиги оқибатида ернинг экологик ҳолати ёмонлашиб, ғўза кўчатлари қуриб қолган. Натижада фермер хўжалиги 2004 йил ҳосили учун режани 28 фоизга бажариб, 43 тонна ўрнига жами 11,8 тонна пахта хом ашёси топширган.

Биринчи инстанция суди ишнинг объектив ҳолатларини аниқлаш чораларини кўрмаган, фермер хўжалиги томонидан унга нисбатан билдирилган даъво талабларига аниқлик киритиш учун тақдим этилиши назарда тутилган режани бажарилмаганлиги сабаблари ҳақидаги далолатномаларни инобатга олмаган, уларни муҳокама қилмаган ва ҳуқуқий баҳо бермаган.

Апелляция инстанцияси судининг қарорида фермер хўжалиги ўз эътирозларига асос сифатида тақдим этган далолатномалари туман қишлоқ ва сув хўжалиги бўлими томонидан тасдиқланмаганлиги, рўйхатга олинмаганлиги ва бу далолатномалар биринчи инстанция судига тақдим этилмаганлиги, даъво талаблари ишда мавжуд бўлган ҳужжатларга асосан қаноатлантирилганлиги баён қилинган.

Биринчи инстанция суди томонидан ҳал қилув қарорини расмийлаштиришда процессуал қонун бузилишларига ва хатоликларга йўл қўйилиб, унинг кириш, баён қилиш, асослантирувчи ва хулоса қисмларида "Сардоба туман" сўзлари ўрнига "Гулистон туман", "Сардоба туман прокурорининг ёрдамчиси А.Жайнаров" сўзлари ўрнига "Гулистон туман прокурорининг ёрдамчиси Б.Абдураҳмонов" сўзлари, "Сардоба туман ҳокими ўринбосари И.Тожиев" сўзлари ўрнига "Сардоба туман ҳокими ўринбосари Р.Қаршибоев" сўзлари, "43 тонна" сўзи ўрнига "14 тонна", "11,7 тонна" сўзи ўрнига "8 тонна" сўзи, "14,6 гектар" сўзи ўрнига "17 гектар" сўзлари ёзиб кетилган.

Суднинг 2005 йил 24 январдаги ажрими билан ҳал қилув қарорининг ёзувидаги хатоликларга тузатишлар киритилган, бироқ худди шу низо бўйича 2005 йил 17 январь санаси билан Сардоба туманида қабул қилинган иккинчи ҳал қилув қарори расмийлаштирилган ва унинг нусхаси 2005 йил 24 январда маълумот ва ижро қилиш учун тарафларга юборилган.

Апелляция инстанцияси суди эса биринчи инстанция суди томонидан йўл қўйилган хато-камчиликларга тегишли баҳо бермаган.

Баён этилганларга асосан иш бўйича қабул қилинган суд қарорлари бекор қилиниб, иш янгидан биринчи инстанция судида кўриш учун юборилиши лозим.

Ишни янгидан кўришда ҳар иккала тарафнинг важлари тўлиқ текширилиши, низо хусусида тақдим этилган барча ҳужжатлар муҳокама қилиниб, уларга ҳуқуқий баҳо берилиши ва тўпланган далиллар асосида қонуний ҳамда асослантирилган қарор қабул қилиниши лозим.

Юқоридагиларга асосан, Раёсат ушбу иш бўйича қабул қилган Сирдарё вилоят хўжалик судининг 2005 йил 17 январдаги ҳал қилув қарори ва апелляция инстанциясининг 2005 йил 26 февралдаги қарорини бекор қилиб, ишни янгидан биринчи инстанцияда кўриш учун юбориш ҳақида қарор қабул қилди.

“Ўзбекистон Республикаси Олий хўжалик суди Ахборотномаси”,

2007 йил, 6-сон