Ўзбекистон Республикаси Президентининг 15.04.1999 й. Ф-986-сон "Тошкент шаҳрида жамоат тартиби ва хавфсизликни таъминлаш Концепциясини амалга ошириш бўйича ишчи гуруҳини ташкил қилиш тўғрисида"ги Фармойиши

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ФАРМОЙИШИ

15.04.1999 й.

N Ф-986

ТОШКЕНТ ШАҲРИДА ЖАМОАТ ТАРТИБИ

ВА      ХАВФСИЗЛИКНИ      ТАЪМИНЛАШ

КОНЦЕПЦИЯСИНИ АМАЛГА ОШИРИШ

БЎЙИЧА ИШЧИ ГУРУҲИНИ ТАШКИЛ

ҚИЛИШ ТЎҒРИСИДА

“Тошкент шаҳрида жамоат тартиби ва хавфсизликни таъминлаш Концепцияси тўғрисида” Ўзбекистон Республикаси Вазирлар Маҳкамасининг 1999 йил 12 апрелдаги 170-40-сон қарорини бажариш, шунингдек пойтахтда ички ишлар органларини ислоҳ қилиш бўйича Ўзбекистон Республикаси вазирликлари ва идораларининг, Тошкент шаҳар ҳокимлигининг фаолиятини мувофиқлаштириш мақсадида:

1. Тошкент шаҳрида жамоат тартиби ва хавфсизликни таъминлаш Концепциясини амалга ошириш бўйича ишчи гуруҳи иловага мувофиқ ташкил қилинсин.

2. Ишчи гуруҳининг асосий вазифалари қуймидагилардан иборат этиб белгилансин:

пойтахтда жамоат тартиби ва хавфсизликни таъминлаш Концепциясини босқичма-босқич ва мунтазам суратда амалга оширишда Ўзбекистон Республикаси ИИВ, Тошкент шаҳар ИИББ раҳбариятига ёрдам кўрсатиш;

Тошкент шаҳар ички ишлар органларини ислоҳ қилиш жараёнининг ҳар томонлама таҳлили ва жорий назоратини ташкил қилиш;

Чет эл тажрибасини ўрганиш ҳамда Ўзбекистон Республикаси ИИВ, ИИББ ҳокимлик ҳамда Тошкент шаҳрида жамоат тартиби ва хавфсизликни сақлаш ва таъминлашни ташкил этишда қатнашаётган мамлакатнинг бошқа вазирликлари ҳамда идоралари фаолиятида ана шу тажрибадан фойдалаланиш бўйича таклифлар тайёрлаш;

Ўзбекистон Республикаси Ички ишлар вазирлигининг тузилмаси ва фаолиятини такомиллаштириш ҳамда ислоҳ қилиш бўйича чора-тадбирлар ишлаб чиқиш мақсадида Тошкент шаҳар ички ишлар органларини ислоҳ қилиш тажрибасини умумлаштириш.

3. Ўзбекистон Республикаси вазирликлари, идоралари, Тошкент шаҳар ҳокимлиги ишчи гуруҳи зиммасига юкланган вазифаларни бажаришда унга ҳар томонлама ёрдам кўрсатсинлар.

4. Гуруҳ раҳбари (А.Х. Носиров) Тошкент шаҳрида жамоат тартиби ва хавфсизликни таъминлаш Концепциясини амалга ошириш бўйича чора-тадбирлар қандай бажарилаётганлиги тўғрисида ҳар ой ахборот бериб турсин.

Ўзбекистон Республикаси Президенти                                         И. Каримов

"Ўзбекистон Республикаси Олий Мажлисининг Ахборотномаси", 1999 й., 4-сон, 97-модда