Ўзбекистон Республикаси Вазирлар Маҳкамасининг 27.10.2009 й. 284-сон "Ғишт хом ашёсини геологик жиҳатдан ўрганиш, тажриба-саноат ва саноат асосида кавлаб олиш учун ер қаъри участкаларидан фойдаланиш ҳуқуқини берадиган лицензиялар беришнинг соддалаштирилган тартиби тўғрисидаги Вақтинчалик низомни тасдиқлаш ҳақида"ги Қарори

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

27.10.2009 й.

N 284

ҒИШТ ХОМ АШЁСИНИ ГЕОЛОГИК

ЖИҲАТДАН ЎРГАНИШ, ТАЖРИБА-САНОАТ

ВА САНОАТ АСОСИДА КАВЛАБ ОЛИШ УЧУН

ЕР ҚАЪРИ УЧАСТКАЛАРИДАН ФОЙДАЛАНИШ

ҲУҚУҚИНИ БЕРАДИГАН ЛИЦЕНЗИЯЛАР

БЕРИШНИНГ СОДДАЛАШТИРИЛГАН

ТАРТИБИ ТЎҒРИСИДАГИ ВАҚТИНЧАЛИК

НИЗОМНИ ТАСДИҚЛАШ ҲАҚИДА

Ўзбекистон Республикаси Президентининг "Деворбоп материаллар ишлаб чиқаришни кўпайтиришни рағбатлантириш ва сифатини яхшилаш борасидаги қўшимча чора-тадбирлар тўғрисида" 2009 йил 19 июндаги ПҚ-1134-сон қарорини бажариш юзасидан, шунингдек энергияни тежайдиган замонавий технологиялар асосида пишиқ ғишт ишлаб чиқараётган корхоналарни қўллаб-қувватлаш мақсадида Вазирлар Маҳкамаси ҚАРОР ҚИЛАДИ:

1. Ғишт хом ашёсини геологик жиҳатдан ўрганиш, тажриба-саноат ва саноат кўламида кавлаб олиш учун ер қаъри участкаларидан фойдаланиш ҳуқуқини берадиган лицензиялар беришнинг соддалаштирилган тартиби тўғрисидаги Вақтинчалик низом иловага мувофиқ тасдиқлансин.

2. Ўзбекистон Республикаси Давлат геология ва минерал ресурслар қўмитаси "Ўзқурилишматериаллари" акциядорлик компанияси билан биргаликда 2010 йил 1 февралгача энергияни тежайдиган замонавий технологиялар асосида пишиқ ғишт ишлаб чиқараётган ишлаб турган корхоналарга уларнинг буюртманомалари бўйича ғишт хом ашёсини геологик жиҳатдан ўрганиш, тажриба-саноат ва саноат асосида кавлаб олиш учун ер қаъри участкаларидан фойдаланиш ҳуқуқини берадиган лицензиялар берилишини таъминласин.

Белгилаб қўйилсинки, энергияни тежайдиган замонавий технологиялар асосида пишиқ ғишт ишлаб чиқарадиган корхоналар ғишт хом ашёсини геологик жиҳатдан ўрганиш, тажриба-саноат ва саноат асосида кавлаб олиш ҳуқуқини берадиган лицензия олингунга қадар, бироқ 2010 йил 1 февралдан кеч бўлмаган муддатгача ишлаб чиқариш фаолиятини давом эттириш ҳуқуқига эга.

3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.А. Хўжаев зиммасига юклансин.

Ўзбекистон Республикасининг Бош вазири                            Ш. Мирзиёев

"Ўзбекистон Республикаси қонун ҳужжатлари тўплами", 2009 йил, 44-сон, 468-модда.