Ўзбекистон Республикаси Президентининг 04.06.2019 й. ПҚ-4351-сон "Аҳоли пунктларини ободонлаштириш соҳасида ишлар самарадорлигини оширишга доир қўшимча чора-тадбирлар тўғрисида"ги Қарори

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

04.06.2019 й.

N ПҚ-4351

АҲОЛИ ПУНКТЛАРИНИ ОБОДОНЛАШТИРИШ

СОҲАСИДА ИШЛАР САМАРАДОРЛИГИНИ

ОШИРИШГА ДОИР ҚЎШИМЧА ЧОРА-

ТАДБИРЛАР ТЎҒРИСИДА

Республикада шаҳарлар, туман марказлари, шаҳар посёлкалари ва қишлоқ аҳоли пунктларига замонавий қиёфа бахш этиш мақсадида, шу жумладан республика туманлари ва шаҳарларидаги мавжуд ободонлаштириш масалалари бўйича ташкилотлар (бўлинмалар) негизида ободонлаштириш бошқармаларини ташкил этиш йўли билан ободонлаштиришни яхшилаш юзасидан изчил чоралар кўрилмоқда.

Шу билан бирга, туман (шаҳар) ободонлаштириш бошқармаларининг моддий-техник жиҳатдан етарлича таъминланмаганлиги ва жиҳозланмаганлиги, малакали кадрлар етишмаслиги, уларни моддий рағбатлантириш ва ижтимоий таъминлашнинг паст даражада эканлиги, давлат-хусусий шериклик суст жорий этилганлиги, шунингдек, ушбу соҳада таъсирчан жамоатчилик назоратининг йўқлиги аҳоли пунктларини ободонлаштириш соҳасида комплекс чора-тадбирлар кўрилишини тақозо этмоқда.

Аҳоли пунктларини ободонлаштириш ишлари самарадорлигини янада ошириш мақсадида, шунингдек, "2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини "Фаол инвестициялар ва ижтимоий ривожланиш йили"да амалга оширишга оид Давлат дастурига мувофиқ:

1. Қуйидагилар ободонлаштириш соҳасида ишларни ташкил этишни такомиллаштиришнинг асосий вазифалари ва йўналишлари этиб белгилансин:

аҳоли пунктлари ҳудудларини ободонлаштириш соҳасида давлат бошқарувини такомиллаштириш, ободонлаштириш соҳасида норматив-ҳуқуқий база, стандартлар, шаҳарсозлик нормалари ва қоидаларини ишлаб чиқиш ва янгилаш;

тасдиқланган стратегиялар асосида шаҳарларнинг кўча-йўл ва жамоат жойларини комплекс ривожлантиришни таъминлаш, ҳудудларни ободонлаштириш масалаларига кенг жамоатчиликни жалб қилиш;

ободонлаштириш соҳасида давлат маблағларидан фойдаланиш самарадорлигини ва кўрсатиладиган хизматлар сифатини оширишга қаратилган давлат-хусусий шериклик механизмларини босқичма-босқич жорий қилиш;

ободонлаштириш бошқармаларининг куч ва ресурсларидан оқилона фойдаланиш, уларнинг ишини оптималлаштириш, қўл меҳнатини камайтириш, юзага келаётган муаммоларга тезкорлик билан муносабат билдиришга, шунингдек, самарали, шу жумладан жамоатчилик назоратини таъминлашга йўналтирилган инновацион ечимларни жорий қилиш;

ободонлаштириш соҳаси ходимларига муносиб меҳнат шароитларини яратиш, уларни моддий рағбатлантириш ва ижтимоий муҳофаза қилиш даражасини ошириш.

2. Ўзбекистон Республикаси Қурилиш ва уй-жой коммунал хўжалиги вазирлиги ҳудудларни ободонлаштириш соҳасидаги муаммолар ўрганиш ва методологик таъминлаш учун масъул орган этиб белгилансин.

Ўзбекистон Республикаси Қурилиш ва уй-жой коммунал хўжалиги вазирлигининг Уй-жой коммунал хизмат кўрсатиш соҳасида меъёрий базани такомиллаштириш бошқармаси тегишли равишда вазирлик марказий аппарати бошқарув ходимларининг чекланган сонини кўпайтириб, 2 нафар қўшимча штат бирлиги ажратилган ҳолда Уй-жой коммунал хўжалиги ва ҳудудларни ободонлаштириш соҳаларининг методологик базасини такомиллаштириш бошқармасига айлантирилсин.

Ўзбекистон Республикаси Қурилиш ва уй-жой коммунал хўжалиги вазирлигига Қорақалпоғистон Республикаси Вазирлар Кенгаши, вилоятлар ва Тошкент шаҳар, туман (шаҳар) ҳокимликларидан жойларда ҳудудларни ободонлаштириш бўйича амалга оширилаётган чора-тадбирлар тўғрисида зарур ахборотни сўраб олиш ҳуқуқи берилсин.

3. Қуйидагилар:

2019-2020 йилларда ободонлаштириш соҳасида ишлар самарадорлигини янада ошириш бўйича "Йўл харитаси" (кейинги ўринларда - "Йўл харитаси") 1-иловага мувофиқ;

2020-2024 йиллар даврида туман (шаҳар) ободонлаштириш бошқармаларини махсус техника ва механизмлар билан жиҳозлашнинг йиғма параметрлари ва параметрлари (кейинги ўринларда - жиҳозлаш параметрлари) 2 ва 2а-иловаларга мувофиқ тасдиқлансин.

4. Ўзбекистон Республикаси Молия вазирлиги 2020 йилдан бошлаб ҳар йили Қорақалпоғистон Республикаси бюджети, вилоятлар ва Тошкент шаҳрининг маҳаллий бюджетлари параметрларини шакллантиришда тасдиқланган "Йўл харитаси"ни ва жиҳозлаш параметрларини молиялаштириш учун маблағларни назарда тутсин.

5. Белгилансинки, 2020 йил 1 январдан бошлаб:

а) қуйидагиларга:

Тошкент шаҳар ҳокимлиги ҳузуридаги Ободонлаштириш бош бошқармаси ва Мустақиллик майдонини кўкаламзорлаштириш, ободонлаштириш ва сақлаш департаменти, шунингдек, Тошкент шаҳар ҳокимлиги ҳузуридаги Ободонлаштириш бош бошқармасининг ихтисослаштирилган бошқармалари (Фуқароларга хизмат кўрсатиш бошқармасидан ташқари) ходимларига - ойлик тариф ставкасининг (лавозим маошининг) 30 фоизи миқдорида;

Тошкент шаҳар ҳокимлиги ҳузуридаги Ободонлаштириш бош бошқармасининг Фуқароларга хизмат кўрсатиш бошқармаси, Тошкент шаҳри туманларининг ободонлаштириш бошқармалари, Нукус шаҳри ва шаҳарлар - вилоят марказлари ободонлаштириш бошқармалари, вилоят (Қорақалпоғистон Республикасида - республика) бўйсунувидаги шаҳарлар ва туманлар ободонлаштириш бошқармалари ходимларига - ойлик тариф ставкасининг (лавозим маошининг) 15 фоизи миқдорида устама белгиланади;

б) ободонлаштириш бўлинмалари ходимларига овқатланиш учун қонун ҳужжатларида белгиланган базавий ҳисоблаш миқдорининг бир баравари миқдорида компенсация тўланади;

в) Қорақалпоғистон Республикаси ва вилоятларнинг туман ва шаҳар ободонлаштириш бошқармалари ходимлари учун меҳнатга ҳақ тўлаш бўйича тармоқ тариф сеткасига мувофиқ меҳнатга ҳақ тўлаш миқдорлари Тошкент шаҳри туманларининг ободонлаштириш бошқармалари ва Фуқароларга хизмат кўрсатиш бошқармаси ходимлари учун назарда тутилган миқдорда белгиланади;

г) фаолияти ҳайвонларнинг жасадларини зарарсизлантириш ва утилизация қилиш билан бевосита боғлиқ бўлган ободонлаштириш бошқармаларининг назоратсиз ҳайвонларни тутиш бўлимлари ходимларига меҳнатнинг зарарли шароитлари учун-лавозим маошига 20 фоиз миқдорида устамалар белгиланади.

6. Ўзбекистон Республикаси Қурилиш вазирлиги Уй-жой коммунал хизмат кўрсатиш вазирлиги билан биргаликда 2020 йил 1 январга қадар:

шу жумладан ногиронлиги бўлган шахслар ва кекса ёшдагилар учун қулай муҳит яратишни назарда тутган ҳолда ободонлаштириш соҳасидаги стандартлар, шаҳарсозлик нормалари ва қоидаларини;

тегишли лойиҳаларни ишлаб чиқишга очиқ танловлар ўтказиш йўли билан кўча-йўл ҳудуди, истироҳат боғлари, хиёбонлар ва бульварлар ташкил этиш тамойилларини жорий этиш, ёритиш элементлари, меъморий шаклларни жойлаштириш, кўкаламзорлаштириш, одамлар учун қулай ҳудудлар яратиш, йўловчилар ва велосипедлар ҳаракатланишини ривожлантириш учун шарт-шароитларни такомиллаштиришни назарда тутувчи "одамлар учун шаҳар" ва "яшил шаҳар" моделларининг элементларини қўллаган ҳолда, ҳудудларни ободонлаштиришнинг намунавий лойиҳаларини ишлаб чиқиш ва янгилашни таъминласин.

7. Ўзбекистон Республикаси Уй-жой коммунал хизмат кўрсатиш вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларинингқуйидаги имкониятларни берувчи "Обод ҳудуд" ахборот тизимини яратиш тўғрисидаги таклифига розилик берилсин:

фуқаролар томонидан ободонлаштириш соҳасидаги мавжуд муаммолар бўйича мурожаатлар юбориш ва жамоатчилик назоратини амалга ошириш, шунингдек, улар учун қайта алоқани, шу жумладан бажарилган иш натижаларини "аввал" ва "кейин" форматида таққослаш имкониятини таъминлаш;

аҳоли билан ҳамкорликда ободонлаштириш ишларини режалаштириш, бунда мавжуд моддий ресурслар ва инфратузилма имкониятларидан самарали ва оқилона фойдаланишни ҳисобга олиш;

фуқаролар билан ҳудудларни ободонлаштириш ҳолати тўғрисида ахборот алмашиш, қурилиш, таъмирлаш ва ободонлаштириш объектлари бўйича таклифларни йўналтириш орқали уларни ободонлаштириш лойиҳаларини амалга оширишга жалб қилиш;

ободонлаштириш, кўкаламзорлаштириш ва санитария ҳолатидан келиб чиқиб ҳудудлар рейтингини белгилаш;

махсус онлайн-майдончада лойиҳалаштириш ва ободонлаштириш бўйича йўриқномалар ва қўлланмалар, ҳудудларни ободонлаштиришнинг намунавий лойиҳалари, шунингдек, стандартлар, шаҳарсозлик нормалари ва қоидаларини жойлаштириш.

8. Қуйидагилар:

"Обод ҳудуд" ахборот тизимини яратиш бўйича буюртмачи этиб Ўзбекистон Республикаси Уй-жой коммунал хизмат кўрсатиш вазирлиги;

"Обод ҳудуд" ахборот тизимини яратиш, техник қўллаб-қувватлаш ва ривожлантириш бўйича ишларни молиялаштириш манбалари этиб Қорақалпоғистон Республикаси бюджети, вилоятлар ва Тошкент шаҳрининг маҳаллий бюджетлари белгилансин.

Ўзбекистон Республикаси Уй-жой коммунал хизмат кўрсатиш вазирлиги манфаатдор вазирликлар ва идоралар билан биргаликда бир ой муддатда "Обод ҳудуд" ахборот тизимини яратиш ва ишга туширишни ташкиллаштириш бўйича "Йўл харитаси"ни ишлаб чиқсин ва тасдиқлаш учун Вазирлар Маҳкамасига киритсин.

9. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари икки ой муддатда ҳар бир туман (шаҳар) ободонлаштириш бошқармасида ягона рақам бўйича чақириш тизимини жорий этган ҳолда диспетчерлик хизматларини ташкил этсин ва ушбу тадбирларни молиялаштиришнинг аниқ манбаларини белгиласин.

10. Туман (шаҳар) ободонлаштириш бошқармаларига жисмоний ва юридик шахслар, шу жумладан хусусий уй-жой мулкдорлари ширкатлари билан ҳудудларни ободонлаштириш хизматларини кўрсатиш, ободонлаштириш соҳасида товарлар ишлаб чиқариш ва реализация қилиш бўйича шартномалар тузиш, шунингдек, соҳага ихтисослашган тижорат ташкилотлари (хўжалик бирлашмалари) иштирокчилари таркибига кириш ҳуқуқи берилсин.

Белгилансинки:

жисмоний ва юридик шахсларнинг ҳудудларни ободонлаштириш хизматларини кўрсатиш бўйича буюртманомалари "Обод ҳудуд" ахборот тизими ёки ягона рақам бўйича ободонлаштириш бўлинмаларини чақириш тизими орқали қабул қилинади;

ҳудудларни ободонлаштириш хизматларини кўрсатганлик учун тушадиган маблағлар бевосита тегишли ободонлаштириш бўлинмаларининг бюджетдан ташқари жамғармалари ҳисобрақамларига ўтказилади.

11. Шундай тартиб жорий қилинсинки, унга мувофиқ 2020 йил 1 январдан бошлаб:

шаҳар кўчаларини қуриш ва реконструкция қилиш бўйича лойиҳа-смета ҳужжатлари параметрларида ушбу кўчаларнинг туташ ҳудудларини ободонлаштириш (ирригация тармоқлари, ёритиш элементлари, кўкаламзорлаштириш, йўлаклар, ахлат қутилари, кичик меъморий шакллар ва бошқалар) бўйича комплекс тадбирлар мажбурий тартибда назарда тутилади;

йўл қатлами ва ободонлаштиришнинг бошқа объектлари остида жойлашган ер ости муҳандислик коммуникацияларини қуриш, реконструкция қилиш ва капитал таъмирлаш қўшма графиклар асосида ободонлаштириш объектларида лойиҳа ва пудрат ишлари билан ўзаро боғлиқ ҳолда амалга оширилади;

янги қурилган объектларни, реконструкция қилинган ва капитал таъмирланган бинолар ёки иншоотларни туташ ҳудудларни ободонлаштирмасдан туриб фойдаланишга қабул қилиш тақиқланади.

12. Тошкент шаҳар ҳокимлигининг пойтахтда, эксперимент тартибида, жаҳоннинг йирик шаҳарларида муваффақиятли қўлланилаётган жараёнларни бошқариш ва автоматлаштиришнинг замонавий тизимларини жорий этиш тўғрисидаги таклифига розилик берилсин.

Тошкент шаҳар ҳокимига эксперимент доирасида:

Ободонлаштириш бош бошқармаси, туманларнинг ободонлаштириш бошқармалари тузилмаларини, туман (шаҳар) ободонлаштириш бошқармалари тўғрисидаги низомларни тасдиқлаш;

2019-2020 йиллар даврида Тошкент шаҳрини ободонлаштириш тизимини ривожлантириш концепцияси лойиҳасини ишлаб чиқиш ва кейинчалик амалга оширишга энг яхши таклифларни танлаш йўли билан манфаатдор ташкилотлар, шу жумладан хорижий ташкилотларни жалб этиш ҳуқуқи берилсин.

13. Ўзбекистон Республикаси Уй-жой коммунал хизмат кўрсатиш вазирлиги, Ўзбекистон Республикаси Молия вазирлиги ҳузуридаги Давлат-хусусий шерикликни ривожлантириш агентлиги Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда:

2019 йил 1 октябрга қадар давлат-хусусий шериклик шартларида ободонлаштириш бўйича ишларни ва хизматларни ташкил этиш учун ҳудудларни бериш имкониятини ўрганиб чиқсин ва зарур ҳужжатларни тайёрласин;

2019 йил 1 декабрга қадар камида бешта шаҳар ва туманларда давлат-хусусий шериклик шартларида ободонлаштириш бўйича ишларни ва хизматларни ташкил этиш учун ҳудудларни бериш чораларини кўрсин;

ижобий тажриба якунлари бўйича уни кейинчалик бутун республика ҳудудида жорий этиш юзасидан таклифлар тайёрласин.

14. 2019 йил 1 октябрдан бошлаб шундай тартиб ўрнатилсинки, унга мувофиқ:

юридик ва жисмоний шахслар - аҳоли пунктидаги бинолар ва иншоотларнинг мулкдорлари ёки улардан фойдаланувчилар, шу жумладан, ижарага олувчилар ўзига бириктирилган ҳудудни ободонлаштириш ишлари ўз вақтида ва сифатли амалга оширилиши учун масъул ҳисобланади;

ободонлаштириладиган ҳудуднинг майдони маҳаллий давлат ҳокимияти органлари томонидан белгиланади. Бунда бириктирилган ҳудуд майдони тегишли ер участкаси майдонидан катта бўлиши мумкин эмас;

бириктирилган ҳудудни ободонлаштириш ишлари бинолар ва иншоотларнинг мулкдорлари ёки улардан фойдаланувчилар томонидан белгиланган шаҳарсозлик нормалари ва қоидаларига, шаҳарлар ва аҳоли пунктларининг ташқи кўринишига қўйиладиган талабларга мувофиқ амалга оширилади.

15. Қуйидагиларга:

Ўзбекистон Республикаси Олий Мажлиси Сенатига парламент назорати доирасида Сенат мажлисларида тегишли ҳудудни ривожлантириш масалалари бўйича вилоятлар, туманлар, шаҳарлар ҳокимларининг ҳисоботларини эшитишда ободонлаштиришни ривожлантириш масалаларини ҳам кўриб чиқиш;

Ўзбекистон миллий телерадиокомпанияси, Ўзбекистон Миллий ахборот агентлигига бошқа оммавий ахборот воситаларини жалб этган ҳолда телерадиоканаллар эфирларида, босма ва интернет-нашрларда ҳудудларни ободонлаштириш соҳасидаги долзарб масалалар бўйича махсус рукнлар ва мавзуга оид материалларни мунтазам равишда жойлаштиришни ташкил қилиш тавсия этилсин.

16. Ўзбекистон Республикаси Уй-жой коммунал хизмат кўрсатиш вазирлиги Молия вазирлиги ва бошқа манфаатдор идоралар билан биргаликда икки ой муддатда қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

17. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов, Қорақалпоғистон Республикаси Вазирлар Кенгаши раиси, вилоятлар ва Тошкент шаҳар ҳокимлари зиммасига юклансин.

Ўзбекистон Республикаси Президенти                                                        Ш. Мирзиёев

Ўзбекистон Республикаси

Президентининг

2019 йил 4 июндаги

ПҚ-4351-сон қарорига

1-ИЛОВА

2019-2020 йилларда ободонлаштириш соҳасида

ишлар самарадорлигини янада ошириш бўйича

"ЙЎЛ ХАРИТАСИ"

Ўзбекистон Республикаси

Президентининг

2019 йил 4 июндаги

ПҚ-4351-сон қарорига

2-ИЛОВА

2020-2024 йиллар даврида туман (шаҳар)

ободонлаштириш бошқармаларини махсус

техника ва механизмлар билан жиҳозлашнинг

ЙИҒМА ПАРАМЕТРЛАРИ

(млн.сўм)

Ўзбекистон Республикаси

Президентининг

2019 йил 4 июндаги

ПҚ-4351-сон қарорига

2а-ИЛОВА

2020-2024 йиллар даврида туман (шаҳар)

ободонлаштириш бошқармаларини махсус

техника ва механизмлар билан жиҳозлашнинг

ПАРАМЕТРЛАРИ

(млн сўм)

           

Қонун ҳужжатлари маълумотлари миллий базаси (www.lex.uz),

2019 йил 4 июнь

"Ўзбекистон Республикаси қонун ҳужжатлари тўплами",

2019 йил 10 июнь, 23-сон, 429-модда