Ўзбекистон Республикаси Вазирлар Маҳкамасининг 27.05.2021 й. 327-сон "2021-2022 йилларда Қорақалпоғистон Республикаси табиий-хомашё ва минерал ресурсларини чуқур қайта ишлаш бўйича хомашё базасини кенгайтириш ҳамда шу асосда қўшилган қиймат занжирини яратишга доир қўшимча чора-тадбирлар тўғрисида"ги Қарори

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

27.05.2021 й.

N 327

2021-2022 ЙИЛЛАРДА

ҚОРАҚАЛПОҒИСТОН РЕСПУБЛИКАСИ

ТАБИИЙ-ХОМАШЁ ВА МИНЕРАЛ РЕСУРСЛАРИНИ

ЧУҚУР ҚАЙТА ИШЛАШ БЎЙИЧА ХОМАШЁ

БАЗАСИНИ КЕНГАЙТИРИШ ҲАМДА ШУ

АСОСДА ҚЎШИЛГАН ҚИЙМАТ ЗАНЖИРИНИ

ЯРАТИШГА ДОИР ҚЎШИМЧА ЧОРА-

ТАДБИРЛАР ТЎҒРИСИДА

Табиий ва минерал ресурсларни ҳимоя қилиш, кўпайтириш ва улардан оқилона фойдаланиш фаолиятини такомиллаштириш, табиатни муҳофаза қилиш билан боғлиқ қонунчилик талаблари бузилиши ҳолатларини аниқлаш ва уларнинг олдини олиш, давлат органлари раҳбарлари ва хўжалик субъектларининг шахсий масъулиятини кучайтириш, шунингдек, Ўзбекистон Республикаси Президентининг "2030 йилгача бўлган даврда Ўзбекистон Республикасининг Атроф муҳитни муҳофаза қилиш концепциясини тасдиқлаш тўғрисида" 2019 йил 30 октябрдаги ПФ-5863-сон Фармони ижросини таъминлаш мақсадида Вазирлар Маҳкамаси ҚАРОР ҚИЛАДИ:

1. Қуйидагилар устувор йўналишлар этиб белгилансин:

а) артемия цисталарини йиғиш ва қайта ишлаш соҳасида:

илмий тадқиқотлар, шу жумладан, артемия цисталарини барқарор такрор ишлаб чиқариш хавфларини баҳолаш, артемия цисталари жойлашган акваторияси минераллашуви даражасининг ўзгариши, сунъий етиштириш, биокимёвий таркиби, шунингдек, улардан био қўшимчалар ва дори воситалари учун субстанциялар ишлаб чиқариш муаммоларини ўрганишни ташкил этиш;

ажратилган квоталар доирасида артемия цисталарини йиғиб олиш ҳажмларини ҳисобга олиш ва ушбу ҳажмларга риоя этилишини назорат қилиш тизимини жорий этиш;

артемия цисталарини йиғиш ва қайта ишлаш фаолиятини давлат томонидан тартибга солишни такомиллаштириш ва шаффофлигини таъминлаш;

чет эллик инвесторларни фақат артемия цисталарини чуқур қайта ишлаш лойиҳалари, жумладан, қимматбаҳо турдаги денгиз маҳсулотлари ва балиқлар етиштириш учун био қўшимчалар ишлаб чиқариш лойиҳаларини амалга оширишга жалб этиш;

артемия цисталарини йиғиш ва ишлатиш бўйича ноқонуний фаолият, браконьерликнинг олдини олиш, сақлаш ва қайта ишлаш инфратузилмасига эга бўлган тадбиркорлик субъектларигагина қайта ишлашга рухсат бериш тизимини яратиш;

б) қизилмия илдизини йиғиш ва қайта ишлаш соҳасида:

қизилмия илдизи плантацияларини, биринчи навбатда, унинг республикада ўсмайдиган янги турлари плантацияларини ташкил қилаётган тадбиркорлик субъектларини рағбатлантириш ва қўллаб-қувватлаш орқали қизилмия илдизи хомашё базасини кенгайтириш;

қизилмия илдизини кластер усулида етиштириш ва юқори даражадаги тайёр маҳсулотгача кўп босқичли қайта ишлашни амалга оширувчи тадбиркорлик субъектлари учун шароитлар яратиш;

қизилмия илдизини чуқур қайта ишлайдиган тадбиркорлик субъектларининг маҳсулотлари истеъмолчилари, жумладан, қандолатчилик ва фармацевтика ташкилотлари билан кооперация алоқаларини кенгайтириш;

в) вермикулитни қазиб олиш ва қайта ишлаш соҳасида:

ер қаъри участкаларидан фойдаланиш шартларига хомашёни мустақил ёки бошқа тадбиркорлик субъектлари билан биргаликда босқичма-босқич чуқур қайта ишлаш шартларини киритиш;

вермикулитдан фойдаланиш самарадорлигини, шу жумладан, хомашё ажратиб олиш коэффициенти, ишлаб чиқариладиган маҳсулот сифати ва уни қайта ишлаш даражасини ошириш.

2. Ўзбекистон Республикаси Инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлиги, Қишлоқ хўжалиги вазирлиги, Экология ва атроф муҳитни муҳофаза қилиш давлат қўмитаси ва Қорақалпоғистон Республикаси Вазирлар Кенгаши томонидан ишлаб чиқилган ҳамда 2021-2022 йилларда амалга ошириладиган:

артемия цисталарини чуқур қайта ишлаш ҳажмларини кенгайтириш бўйича инвестиция лойиҳаларининг рўйхати 1-иловага;

қизилмия илдизини етиштиришни кўпайтириш ва кўп босқичли қайта ишлаш бўйича инвестиция лойиҳаларининг рўйхати 2-иловага;

вермикулит қазиб олишни кенгайтириш ва уни чуқур қайта ишлаш бўйича инвестиция лойиҳаларининг рўйхати 3-иловага;

пахта, ипак ва терини чуқур қайта ишлаш бўйича янги инвестиция лойиҳаларининг рўйхати 4-иловага;

ички тармоқ ва тармоқлараро кооперация асосида кимё, электротехника ва фармацевтика маҳсулотларини ишлаб чиқариш бўйича янги инвестиция лойиҳаларининг рўйхати 5-иловага мувофиқ маъқуллансин.

3. Ушбу қарорнинг 2-бандида рўйхати тасдиқланган инвестиция лойиҳаларининг амалга оширилиши натижасида 2022-2025 йилларда:

майдони 3,5 минг гектардан зиёд плантациялар ташкил қилиш ҳисобидан қизилмия илдизининг, қўшимча геология-қидирув ишларини амалга ошириш, ер қаъридан фойдаланувчилар сонини кенгайтириш, захиралар ва қазиб олиш ҳажмларини 22,2 минг тоннага кўпайтириш ҳисобидан вермикулитнинг минерал ресурслар ва табиий хомашё базасини кенгайтириш;

иссиқлик изоляцияси, иссиқликка чидамли ва бошқа юқори қўшилган қийматли материаллар ишлаб чиқариш ҳисобидан вермикулитни чуқур қайта ишлаш даражасини 60 фоизгача, артемия цисталарини қуритиш ва артемия цисталаридан озиқа сифатида фойдаланган ҳолда майда қисқичбақалар, денгиз қисқичбақаси ва қимматбаҳо балиқ турларини етиштириш учун фермаларни босқичма-босқич жорий қилиш ҳисобидан артемия цисталарини чуқур қайта ишлаш даражасини 70 фоизгача ҳамда юқори қўшилган қийматли янги ишлаб чиқаришларни ташкил этиш ҳисобидан қизилмия илдизини чуқур қайта ишлаш даражасини 75 фоизгача ошириш;

вермикулитдан ярим фабрикатлар ва тайёр маҳсулотлар экспорт улушини 10 фоиздан 80 фоизгача, чакана қадоқланган қуритилган артемия цисталарининг экспорт улушини 2 фоиздан камида 70 фоизгача оширишган ҳолда, 2025 йилда вермикулит ва ундан тайёрланган маҳсулотларни экспорт қилиш ҳажмини 0,5 млн доллардан 6,4 млн долларгача, артемия цисталарини экспорт қилиш ҳажмини 9 млн доллардан 50 млн долларгача, қизилмия илдизи маҳсулотларини экспорт қилиш ҳажмини 35 млн доллардан 77 млн долларгача кўпайтириш назарда тутилаётгани маълумот учун қабул қилинсин.

4. Қорақалпоғистон Республикаси Вазирлар Кенгаши, Ўзбекистон Республикаси Инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлигининг артемия цисталарини қазиб олишга ихтисослаштирилган "Орол артемия саноати" агросаноат зонасини (кейинги ўринларда - агросаноат зонаси) ташкил этиш тўғрисидаги таклифига розилик берилсин.

5. "Орол артемия саноати" агросаноат зонасини фаолиятини мувофиқлаштириш бўйича махсус комиссия (кейинги ўринларда - Махсус комиссия) таркиби 6-иловага мувофиқ тасдиқлансин.

Белгилансики:

Махсус комиссия табиий усулда кўпаядиган ва Орол денгизининг Ўзбекистон қисмидаги акваторияда териб олинадиган артемия цисталарини йиғишнинг чекланган ҳажмларини, уларни қайта ишлаш учун квоталар беришни, шунингдек, артемия цисталарини йиғиб олиш бўйича белгиланган тартибга риоя этилишини назорат қилувчи органлар фаолиятини тартибга солади;

Махсус комиссия артемия цисталарини қазиб олишга ихтисослаштирилган "Орол артемия саноати" агросаноат зонасини ҳудудини белгилаб беради;

Вазирлар Маҳкамасининг "Қорақалпоғистон Республикаси Мўйноқ тумани ҳокимлиги ҳузурида "Орол артемия саноати" давлат унитар корхонаси фаолиятини ташкил этиш тўғрисида" 2020 йил 11 июлдаги 438-сон қарорига мувофиқ ташкил этилган "Орол артемия саноати" давлат унитар корхонаси (кейинги ўринларда - Дирекция) "Орол артемия саноати" агросаноат зонаси ижро этувчи органи ҳисобланади.

6. Қуйидагиларга:

а) Махсус комиссияга:

артемия цисталарини йиғиш ҳажмларини, популяцияни кенгайтириш шароитларини, шунингдек, чуқур қайта ишлаш технологияларини асослаш учун илмий тадқиқотлар ташкил этиш;

Дирекция фаолиятини мувофиқлаштириш ва назорат қилиш;

ҳақиқий баҳолаш бўйича белгиланган аниқ мезонлар ва ўлчовларга мувофиқ очиқ ҳамда ошкора тизим асосида йиғиб олишнинг чекланган миқдорларини белгилаш ва қайта ишлаш квоталарини тақсимлаш;

2025 йилга қадар артемия цисталарининг бирламчи қайта ишланган маҳсулотлари экспортини босқичма-босқич тўхтатиш ва қуритилган артемия цисталари, шунингдек, капсулаланган артемия цисталари ва янада чуқур қайта ишланган маҳсулотлар экспортига тўлиқ ўтишни таъминлаш вазифалари.

б) Дирекцияга:

Орол денгизи акваториясида артемия цисталарини асраб-авайлаш, самарали қайта тикланиши ва популяциясини кўпайтиришни ташкил қилиш;

артемия цисталарини ноқонуний ва браконьерлик йўли билан йиғишнинг олдини олиш учун қирғоқни қўриқлашни ташкил этиш;

Орол денгизи акваториясида артемия цисталарини халқаро стандартларга мувофиқ йиғиш;

артемия цисталарини чуқур қайта ишлаш ва маҳсулот экспорти бўйича лойиҳаларни амалга ошириш тўғрисида артемия цисталарини қайта ишлаш учун квоталар олишга талабгор бўлган қайта ишловчилар билан келишувларни кейинчалик Қорақалпоғистон Республикаси Инвестициялар ва ташқи савдо вазирлиги билан тузишга тайёрлаш;

қайта ишлайдиган корхоналар реестрини юритиш, уларга Махсус комиссия қарорларига биноан квоталар ҳажмлари ҳақида тегишли гувоҳномалар бериш;

белгиланган тартибда танлаб олинган қайта ишловчилар билан Махсус комиссия қарорига мувофиқ квоталар ҳажмларида йиғилган артемия цисталарини етказиб бериш учун хўжалик шартномалари тузиш;

артемия цисталарини ишлаб чиқилган жадваллар ва тасдиқланган ҳажмларга мувофиқ қайта ишлаш квоталари эгаларига етказиб бериш ишларини ташкил қилиш;

маҳаллий аҳоли учун артемия цисталарини сунъий, шу жумладан, интенсив саноат сув ҳавзалари базасида етиштириш ҳамда кейинчалик уларни чуқур қайта ишлаш ва юқори қўшилган қийматли маҳсулот ишлаб чиқаришни ташкил этиш учун шарт-шароитлар яратиш;

артемия цисталари ва улардан тайёрланадиган маҳсулотнинг сифати ҳамда параметрларини аниқлаш лабораторияларини ташкил қилиш ва белгиланган тартибда аккредитациядан ўтказиш;

маҳаллий қайта ишловчиларга миллий брендни яратиш ва илгари суриш билан боғлиқ масалаларни ҳал этишга кўмаклашиш вазифалари юклансин.

Қорақалпоғистон Республикаси Вазирлар Кенгаши Махсус комиссия ва Дирекция фаолиятини ташкил этиш тўғрисидаги низомни бир ой муддатда ишлаб чиқиб тасдиқласин.

7. Шундай тартиб ўрнатилсинки, унга кўра 2021 йил 1 июндан бошлаб:

артемия цисталарини йиғиш ҳажмлари Махсус комиссия томонидан Қорақалпоғистон Республикаси Экология ва атроф муҳитни муҳофаза қилиш қўмитаси ҳамда Фанлар академиясининг тавсиялари ҳисобга олинган ҳолда белгиланади;

артемия цисталари тасдиқланган квоталар доирасида йиғиб олинади;

артемия цисталарини қайта ишлаш квоталарини тасдиқлаш ва тадбиркорлик субъектлари ўртасида тақсимлаш, артемия цисталарини йиғиш, қайта ишлаш, шунингдек, артемия цисталари ва қайта ишланган маҳсулотни тижорат мақсадида айлантиришда қонунчилик ҳужжатларига риоя этилишининг назоратини ташкил қилиш Махсус комиссия томонидан амалга оширилади;

артемия цисталарини қайта ишлаш квоталари талабгорларнинг сақлаш, бирламчи қайта ишлаш ва қуритиш бўйича мавжуд ишлаб чиқариш қувватларига мутаносиб уларнинг умумий ҳажмлари инобатга олинган ҳолда тақсимланади;

артемия цисталарини қайта ишлаш учун квоталар ҳар йили бирламчи ва чуқур қайта ишлаш бўйича моддий базанинг мавжудлигини текшириш натижалари асосида берилади;

артемия цисталарини йиғиш ва қайта ишлайдиган корхоналарга сотиш Дирекция томонидан, жумладан, қайта ишлаш квоталари ва йиғиш учун техника воситалари бўлган қайта ишлайдиган корхоналар билан тузиладиган пудрат шартнома асосида амалга оширилади;

артемия цисталарини қайта ишлайдиган корхоналарга етказиб беришнинг чекланган нархи Махсус комиссия томонидан белгиланади ва йиғиш харажатларини, шунингдек, Дирекциянинг унга юкланган вазифаларни бажариш билан боғлиқ харажатларни ўз ичига олади. Бунда артемия цисталари квотаси учун тўланадиган йиғим чекланган нархга киритилмайди.

артемия цисталарини бирламчи қайта ишлаш учун моддий базасига эга бўлмаган тадбиркорлик субъектларига, 2022 йил 1 январдан эса артемия цисталарини қуритиш учун моддий базасига эга бўлмаган тадбиркорлик субъектларига квоталар бериш ман этилади.

8. Дирекция 2021 йил 31 декабргача аҳоли томонидан ноқонуний йиғиб олинган артемия цисталари қолдиқларини қуритиш қувватларига эга бўлган қайта ишлайдиган корхоналар ўртасида тайёр маҳсулотни экспорт қилиш мажбурияти билан қўшимча квота сифатида тақсимлаш учун хатловдан ўтказсин ва белгиланган тартибда легаллаштириш чораларини кўрсин.

9. Белгилансинки, қуритилган ва капсулаланган артемия цисталарини экспорт қилишга фақат уларни қайта ишлаш квоталари эгаларига рухсат этилади.

10. Орол денгизи артемия цисталарини йиғиш учун квотага тўлов сифатида тушган маблағлар Қорақалпоғистон Республикаси республика бюджетига ўтказилади ва 2022-2023 йилларда тегишли равишда қуйидагича йўналтирилсин:

артемия цисталарини йиғиш бўйича қонунчилик ҳужжатларига риоя этилишини назорат қилиш, уларни йиғишнинг чекланган ҳажмларини белгилаш, Орол акваториясининг мақбул экологик ҳолатини таъминлаш чора-тадбирларини амалга оширишга мақсадли йўналтириш учун Ўзбекистон Республикаси Экология ва атроф муҳитни муҳофаза қилиш давлат қўмитаси ҳамда Қорақалпоғистон Республикаси Экология ва атроф муҳитни муҳофаза қилиш қўмитасига 500 миллион сўмдан;

артемия цисталари, қизилмия илдизи ва бошқа турдаги доривор воситаларни барқарор такрор ишлаб чиқаришни таъминлаш бўйича илмий тадқиқотларни молиялаштиришга мақсадли йўналтириш учун Ўзбекистон Республикаси Фанлар академиясига ҳамда Академиянинг Қорақалпоғистон бўлимига 500 миллион сўмдан.

Қорақалпоғистон Республикаси Жўқорғи Кенесига 2024 йилдан бошлаб Қорақлапоғистон Республикаси республика бюджети параметрларида ушбу мақсадлар учун зарур маблағларни назарда тутиш тавсия этилсин.

11. Ўзбекистон Республикаси Давлат солиқ қўмитаси ҳузуридаги Кадастр агентлиги 2022 йил 1 январгача Орол денгизининг Ўзбекистон қисмидаги акваториянинг давлат кадастри ва бош режасини ишлаб чиқсин.

12. Ўзбекистон Республикаси Фанлар академияси Қорақалпоғистон Республикаси Вазирлар Кенгаши билан биргаликда бир ой муддатда артемия цисталари, қизилмия илдизи, бошқа ноёб ўсимлик ва биологик ресурслар муаммоларини илмий ўрганиш бўйича Ўзбекистон Республикаси Фанлар академиясининг Қорақалпоғистон бўлимининг бўлинмаларини ташкил қилиш бўйича таклиф киритсин.

Молия вазирлиги, Қорақалпоғистон Республикаси Вазирлар Кенгаши Ўзбекистон Республикаси Фанлар академияси билан биргаликда бир ой муддатда мазкур бўлинмалар сонини ва уларни молиялаштириш манбаларини белгиласин.

13. Ўзбекистон Республикаси Қишлоқ хўжалиги вазирлиги Давлат солиқ қўмитаси ҳузуридаги Кадастр агентлиги, Экология ва атроф муҳитни муҳофаза қилиш давлат қўмитаси, Фанлар академияси, Ўрмон хўжалиги давлат қўмитаси Қорақалпоғистон Республикаси Вазирлар Кенгаши билан биргаликда бир ой муддатда:

а) қуйидагиларни хатловдан ўтказсин:

ерлар тоифалари кесимида учувчисиз учиш аппаратларидан (дронлардан) фойдаланган ҳолда ёввойи ҳолда ўсадиган қизилмия майдонлари ва захираларини;

қишлоқ хўжалигига мўлжалланган ерларда қизилмия сунъий равишда етиштириладиган мавжуд плантациялар, шунингдек, плантациялар ташкил қилиш мақсадида жисмоний ҳамда юридик шахсларга кейинчалик ажратиш учун қизилмияни, шу жумладан, унинг янги навларини етиштиришга яроқли янги ерларни;

б) Вазирлар Маҳкамасига қизилмияни сунъий етиштириш учун ажратиладиган майдонлар ҳажмлари ва дислокациялар бўйича таклифлар киритсин.

Қорақалпоғистон Республикаси Экология ва атроф муҳитни муҳофаза қилиш қўмитаси, Ўзбекистон Республикаси Фанлар академиясининг Қорақалпоғистон бўлими, Ботаника институти ва Зоология институтига мазкур қарорда назарда тутилган топшириқларни бажариш учун дронлардан фойдаланишга рухсат берилсин.

14. Ўзбекистон Республикаси Инвестициялар ва ташқи савдо вазирлиги, Ташқи ишлар вазирлиги, Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги билан биргаликда қуйидагилар юзасидан соддалаштирилган ва имтиёзли тартиботларни қўллаш тўғрисида Хитой Халқ Республикаси ҳукумати билан келишувга эришиш бўйича музокаралар ўтказсин:

доривор ўсимликлар, экстрактлар ва субстанцияларни Хитой Халқ Республикасига олиб кириш;

доривор ўсимликлар экстрактларини ишлаб чиқарувчи маҳаллий корхоналарни Хитой Халқ Республикаси масъул давлат органи томонидан сертификатлаш;

доривор ўсимликлар экстрактларини ишлаб чиқарувчи маҳаллий корхоналар маҳсулотларни Хитой бозорига киритилишини таъминлаш.

15. Белгилаб қўйилсинки, 2021 йил 1 июндан бошлаб:

инвесторларга қизилмия етиштириш учун белгиланган тартибда ажратилган ер участкаларини Ер кодексининг 36-38-моддаларида назарда тутилмаган бошқа ҳолатларда олиб қўйишга мораторий жорий этилади;

шундай тартиб татбиқ этиладики, унга кўра глицирризин кислотасининг моно-аммон тузи ва ди-калий тузини ишлаб чиқарувчи корхоналар томонидан ўз эҳтиёжлари учун этил спирти сотиб олишда тўланган акциз солиғи миқдори қўшилган қиймат солиғини қоплаш сингари ушбу корхоналар тайёр маҳсулотни экспорт қилишида қоплаб берилади;

корхоналар илмий лабораторияларида фойдаланиш учун ТИФ ТН 2207 (таҳлил учун тоза, кимёвий тоза, соф тоза) кодлари бўйича спиртни импорт қилишга рухсат берилади;

қизилмия ва бошқа доривор ўсимликларни қайта ишлайдиган корхоналар томонидан экспортга маҳсулот ишлаб чиқариш ва сотиш учун фойдаланиладиган қадоқлаш материалларни "божхона ҳудудида қайта ишлаш" божхона режимида жойлаштиришнинг соддалаштирилган тартиби жорий қилинади.

16. Белгилансинки:

Ўзбекистон Республикасининг қизилмия илдизини йиғиш, етиштириш, қайта ишлаш ва экспорт қилишни тартибга солиш соҳасидаги кейинги қонунчилик ҳужжатлари инвестиция киритиш шартларини ёмонлаштирадиган бўлса, Ўзбекистон Республикасида ўсадиган ва етиштириладиган қизилмияни қайта ишлайдиган корхоналарга нисбатан беш йил давомида ушбу қарор қабул қилинган санада амалда бўлган қонунчилик ҳужжатлари қўлланилади;

Ўзбекистон Республикасида ўсадиган ва етиштириладиган қизилмияни қайта ишлайдиган корхоналар ўз хоҳишига кўра янги қонунчилик ҳужжатининг уларга инвестиция киритиш шартларини яхшилаш имконини берадиган қоидаларини қўллаш ҳуқуқига эга бўлади.

17. Ўзбекистон Республикаси Қишлоқ хўжалиги вазирлиги, Экология ва атроф муҳитни муҳофаза қилиш давлат қўмитаси, Давлат солиқ қўмитаси ҳузуридаги Кадастр агентлиги ёввойи ҳолда ўсадиган қизилмия плантациялари ва захираларидан, қизилмия плантацияларини ташкил қилиш учун ажратилган ерлар ҳамда Орол денгизининг Ўзбекистон қисмидаги акваториядаги артемия цисталари ресурсларидан мақсадли фойдаланиш бўйича назоратни кучайтирсин.

18. Ўзбекистон Республикаси Молия вазирлиги бир ой муддатда суғурта ташкилотлари томонидан қизилмия тайёрловчи корхоналар ташкил қилган қизилмия маданий плантацияларини суғурталаш тартиби қабул қилинишини ташкил этсин.

19. Ўзбекистон Республикаси Давлат геология ва минерал ресурслар қўмитаси:

икки ҳафта муддатда Қорақалпоғистон Республикаси ҳудудида жойлашган карьерларни (вермикулит, қурилиш тошлари, кварц қуми ва бошқалар) хатловдан ўтказсин, шунингдек, инвесторлар томонидан инвестиция мажбуриятлари бажарилишини ўргансин;

бир ой муддатда Қорақалпоғистон Республикаси ҳудудида мавжуд вермикулит минерал-хомашё ресурслари ва қурилиш материллари ишлаб чиқариш учун бошқа минерал хомашёлар кўрсатилган харитани ишлаб чиқсин ва ўзининг расмий веб-сайти ҳамда Қорақалпоғистон Республикаси Вазирлар Кенгашининг веб-сайтида жойлаштирилишини таъминласин;

Кон-геология фаолиятини назорат қилиш инспекцияси, Экология ва атроф муҳитни муҳофаза қилиш қўмитаси, Қорақалпоғистон Республикаси Вазирлар Кенгаши, "Ўзбекистон темир йўллари" АЖ билан биргаликда таркибида темир бўлган "Тебинбулоқ" конида рудаларга ишлов бериш истиқболларини ҳисобга олинган ҳолда, тадбиркорлик субъектлари томонидан вермикулит минерал хомашёсини ўзлаштириш механизми ва схемасини белгилаш бўйича Вазирлар Маҳкамасига таклиф киритсин;

вермикулит ва бошқа минерал хомашёни чуқур қайта ишлаш, шунингдек, юқори қўшилган қийматли янги турдаги маҳсулотлар ишлаб чиқариш бўйича инвестиция лойиҳалари доирасида участкалардан фойдаланиш ҳуқуқларини бериш масалаларини тезкор ҳал қилиш чораларини кўрсин.

20. Ўзбекистон Республикаси Давлат геология ва минерал ресурслар қўмитаси, Инвестициялар ва ташқи савдо вазирлиги ҳузуридаги Инвестиция лойиҳаларини ишлаб чиқиш маркази, "Ўзсаноатқурилишматериллари" уюшмаси ишлаб чиқарувчи корхоналар билан биргаликда икки ой муддатда:

республика корхоналарида вермикулитни қазиб олиш ва ундан маҳсулотлар ишлаб чиқариш борасида қўлланилаётган технологияларни жойига чиққан ҳолда ўргансин;

вермикулитдан фойдаланиш самарадорлигини, шу жумладан, хомашё олиш коэффициентини, ишлаб чиқариладиган маҳсулот сифатини ва қайта ишлаш даражасини оширишга доир манзилли тадбирларни ишлаб чиқсин ҳамда амалга оширсин.

21. Ўзбекистон Республикаси Инновацион ривожланиш вазирлиги, Қурилиш вазирлиги, "Ўзсаноатқурилишматериллари" уюшмаси билан биргаликда икки ой муддатда:

вермикулит хомашёсини янада чуқур қайта ишлаш, талаб юқори бўлган сифатли маҳсулот турларини кенгайтириш, шунингдек, экспорт салоҳиятини ошириш тўғрисида таклифлар ишлаб чиқсин;

энергия жиҳатидан самарадор ва экологик хавфсиз янги турдаги, шу жумладан, вермикулитдан ва вермикулитни қайта ишлашдан олинган маҳсулотлардан тайёрланган қурилиш материаллари амалиётга жорий этилишини ҳамда уларнинг қурилишда қўлланилишини таъминласин.

22. Ўзбекистон Республикаси Иқтисодий тараққиёт ва камбағалликни қисқартириш вазирлиги Инвестициялар ва ташқи савдо вазирлиги, Молия вазирлиги, Энергетика вазирлиги, Автомобиль йўллари қўмитаси, "Ўзсувтаъминот" АЖ, "Ҳудудий электр тармоқлари" АЖ ва "Ҳудудгазтаъминот" АЖ Қорақалпоғистон Республикаси Вазирлар Кенгаши билан биргаликда ушбу қарорда назарда тутилган юқори қўшилган қийматли янги турдаги маҳсулотларни ишлаб чиқариш бўйича инвестиция лойиҳаларини амалга ошириш учун қуриш ва реконструкция қилиш зарур бўлган ташқи инфратузилма объектлари рўйхатини икки ой муддатда шакллантирсин ва Вазирлар Маҳкамасига киритсин.

23. Ўзбекистон Республикаси Инвестициялар ва ташқи савдо вазирлиги, Қорақалпоғистон Республикаси Вазирлар Кенгаши манфаатдор вазирликлар ва идоралар, тижорат банклари билан биргаликда:

икки ҳафта муддатда манзилли рўйхатларга киритилган инвестиция лойиҳаларининг тармоқ жадвалларини тасдиқласин ва уларнинг ўз вақтида сифатли бажарилишини таъминласин;

манзилли рўйхатларга киритилган инвестиция лойиҳаларининг амалга оширилишини тизимли мониторинг қилсин ва бу борада тўсиқ бўладиган муаммоларни ҳал этиш учун тезкор ҳамда амалий чоралар кўрсин.

24. Ўзбекистон Республикаси Инвестициялар ва ташқи савдо вазирлиги:

а) тижорат банклари билан биргаликда халқаро молия институтлари ва хорижий ҳукумат молия ташкилотларининг маблағлари ҳисобидан Қорақалпоғистон Республикасида мева-сабзавотчилик соҳасини ривожлантиришга камида 60 миллион доллар йўналтирилишини таъминласин;

б) 2021 йил 31 декабргача халқаро ва миллий экспертларни жалб қилган ҳолда:

қизилмиянинг маданий навларини саноат миқёсида етиштириш ва ундан ташқи бозорларда рақобатбардош бўлган юқори қўшилган қийматли маҳсулот ишлаб чиқаришни ташкил қилиш;

артемия цисталаридан биологик фаол қўшимчалар ва доривор воситалар ишлаб чиқариш бўйича юқори технологияли корхоналарни ташкил қилиш тўғрисида таклифлар киритсин.

25. Қорақалпоғистон Республикасида касаначилик асосида балиқчилик соҳасидаги лойиҳаларни молиялаштираётган тижорат банклари Ўзбекистон Республикаси Президентининг "Ҳар бир оила - тадбиркор" дастурини амалга ошириш тўғрисида" 2018 йил 7 июндаги ПҚ-3777-сон қарори доирасида оилавий тадбиркорликни ривожлантириш учун бериладиган кредитлар миқдорини ҳудудларни ижтимоий-иқтисодий ривожлантириш бўйича секторлар раҳбарлари ва маҳалла фуқаролар йиғини тавсияномалари асосида фоиз тўловлари тўланмайдиган олти ойлик имтиёзли давр билан базавий ҳисоблаш миқдорининг икки юз бараваригача кўпайтирсин.

26. Ушбу қарорнинг бажарилишини назорат қилиш Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари - инвестициялар ва ташқи савдо вазири С.У. Умурзаков ва Қорақалпоғистон Республикаси Вазирлар Кенгаши раиси Қ.Р. Сариев зиммасига юклансин.

Ўзбекистон Республикасининг Бош вaзири                                                    А. Арипов

Вазирлар Маҳкамасининг

2021 йил 27 майдаги

327-сон қарорига

1-ИЛОВА

Артемия цисталарини чуқур қайта ишлаш

ҳажмларини кенгайтириш бўйича

инвестиция лойиҳаларининг

РЎЙХАТИ

Вазирлар Маҳкамасининг

2021 йил 27 майдаги

327-сон қарорига

2-ИЛОВА

Қизилмия илдизини етиштиришни кўпайтириш

Ва кўп босқичли қайта ишлаш бўйича

инвестиция лойиҳаларининг

РЎЙХАТИ

Вазирлар Маҳкамасининг

2021 йил 27 майдаги

327-сон қарорига

3-ИЛОВА

Вермикулит қазиб олишни кенгайтириш ва уни чуқур

қайта ишлаш бўйича инвестиция лойиҳаларининг

РЎЙХАТИ

Вазирлар Маҳкамасининг

2021 йил 27 майдаги

327-сон қарорига

4-ИЛОВА

Пахта, ипак ва терини чуқур қайта ишлаш

бўйича янги инвестиция лойиҳаларининг

РЎЙХАТИ

Вазирлар Маҳкамасининг

2021 йил 27 майдаги

327-сон қарорига

5-ИЛОВА

Ички тармоқ ва тармоқлараро кооперация асосида кимё,

электротехника ва фармацевтика маҳсулотларини ишлаб

чиқариш бўйича янги инвестиция лойиҳаларининг

РЎЙХАТИ

Вазирлар Маҳкамасининг

2021 йил 27 майдаги

327-сон қарорига

6-ИЛОВА

"Орол артемия саноати" агросаноат зонасини

фаолиятини мувофиқлаштириш

бўйича махсус комиссия

ТАРКИБИ

Изоҳ. Махсус комиссияси аъзолари бошқа ишга ўтган тақдирда унинг таркибига ушбу лавозимга янгидан тайинланган ёки зиммасига тегишли функцияларни бажариш юкланган шахслар киритилади.

Қонун ҳужжатлари маълумотлари миллий базаси (www.lex.uz),

2021 йил 28 май