Оригинал, элита ва кейинги авлодларга мансуб уруғлик қишлоқ хўжалиги экинларини етиштириш ҳуқуқига эга бўлиш учун фермер хўжаликлари ва бошқа қишлоқ хўжалиги ташкилотлари ўртасида танлов ўтказиш тартиби тўғрисида Низом (ЎзР ВМ 12.10.2021 й. 641-сон қарорига 1-илова)

Вазирлар Маҳкамасининг

2021 йил 12 октябрдаги

641-сон қарорига

1-ИЛОВА

Оригинал, элита ва кейинги авлодларга мансуб

уруғлик қишлоқ хўжалиги экинларини етиштириш ҳуқуқига эга

бўлиш учун фермер хўжаликлари ва бошқа қишлоқ хўжалиги

ташкилотлари ўртасида танлов ўтказиш тартиби тўғрисида

НИЗОМ

1-БОБ. УМУМИЙ ҚОИДАЛАР

1. Мазкур Низом оригинал, элита ва кейинги авлодларга мансуб уруғлик қишлоқ хўжалиги экинларини етиштириш ҳуқуқига эга бўлиш учун фермер хўжаликлари ва бошқа қишлоқ хўжалиги ташкилотлари (кейинги ўринларда - уруғлик етиштирувчи субъектлар) ўртасида танлов ўтказиш тартибини белгилайди.

2. Қорақалпоғистон Республикаси Қишлоқ хўжалиги вазирлиги ва вилоятлар қишлоқ хўжалиги бошқармаларининг туман ҳокимликлари билан келишилган ҳолда берилган таклифлари асосида ҳудудларда уруғлик қишлоқ хўжалиги экинлари экиладиган майдонлардан келиб чиқиб, талаб этиладиган уруғлик миқдорлари белгиланади.

3. Оригинал, элита ва кейинги авлодларга мансуб уруғлик қишлоқ хўжалиги экинларини етиштириш ҳуқуқига эга бўлиш учун уруғлик етиштирувчи субъектлар ўртасида танлов ўтказиш бўйича ушбу Низомга 1-иловага мувофиқ туман ишчи гуруҳи (кейинги ўринларда - туман ишчи гуруҳи) таркиби туман ҳокими томонидан тасдиқланади.

Қорақалпоғистон Республикаси Қишлоқ хўжалиги вазирлиги, вилоят қишлоқ хўжалиги бошқармалари туман ҳокимликлари билан келишган ҳолда танловда иштирок этиш учун уруғлик етиштирувчи субъектлар томонидан туман ишчи гуруҳига ҳужжатларни тақдим этиш муддатини ҳамда танлов ўтказиш вақтини ҳамда танлов ўтказиладиган жойни маҳаллий оммавий ахборот воситаларида ёки ўзининг расмий веб сайтида эълон қилади.

4. Оригинал, элита ва кейинги авлодларга мансуб уруғлик қишлоқ хўжалиги экинларини етиштириш ҳуқуқига эга бўлиш учун уруғлик етиштирувчи субъектлар ўртасида танлов ўтказиш ушбу Низомга 2-иловага мувофиқ схема бўйича амалга оширилади.

2-БОБ. ТАНЛОВДА ИШТИРОК ЭТИШ ВА

ТАЛАБГОРЛАР ТЎҒРИСИДАГИ МАЪЛУМОТЛАРНИ

ТЎПЛАШ ТАРТИБИ

5. Танлов ўтказиш учун талабгорлардан аризалар ҳар йили қуйидаги муддатларда қабул қилинади:

а) уруғлик пахта хомашёси ва бошқа уруғлик қишлоқ хўжалиги экинлари етиштириш учун - 15 январдан 5 февралга қадар;

б) бошоқли дон экинларини етиштириш учун - 15 июлдан 5 августга қадар.

Уруғлик етиштирувчи субъектлар танловда иштирок этиш учун туман ишчи гуруҳига бевосита, почта орқали ёки электрон шаклда ариза билан мурожаат қилади.

Талабгорларнинг мурожаатлари туман ишчи гуруҳи котиби томонидан махсус дафтарга қайд этилиб, талабгор тўғрисида маълумотларни тўплаш қуйидаги ташкилотларга сўровнома юборади:

а) сўнгги 3 йил ичида қишлоқ хўжалиги экинлари майдонлари касалликларга чалинганлиги, зараркунандалар билан зарарланганлиги, бегона ўтлар тарқалганлиги тўғрисида - Ўсимликлар карантини ва ҳимояси туман (шаҳри) бўлимига;

б) ер майдонининг сув таъминоти тўғрисида - туман (Қувасой шаҳри) ирригация бўлимига;

в) талабгорнинг маълумоти, мутахассислиги ва қишлоқ хўжалиги соҳасидаги умумий иш стажи тўғрисида - туман (шаҳар) аҳоли бандлигига кўмаклашиш марказига;

г) талабгорнинг мавжуд қишлоқ хўжалиги техникалари тўғрисида - Агросаноат мажмуи устидан назорат қилиш инспекциясининг туман бўлимига;

д) ер майдони тупроқ унумдорлиги ҳамда сўнгги уч йилда етиштирилган қишлоқ хўжалиги экинлари ҳосилдорлиги ўртача кўрсаткичи тўғрисида - туман (Қувасой шаҳри) қишлоқ хўжалиги бўлимига.

6. Талабгор тўғрисидаги маълумотлар туман ишчи гуруҳига бевосита, почта орқали ёки электрон шаклда тақдим этилади.

Туман ишчи гуруҳига почта орқали ёки электрон шаклда тақдим этилган маълумотларда камчиликлар аниқланганда туман ишчи гуруҳи котиби бу тўғрисида уч иш кунидан кечиктирмасдан тегишли ташкилотни электрон почта манзилига хабар юборади.

7. Танловда иштирок этиш учун аризаларни қабул қилиш танлов эълон қилинган куннинг ўттизинчи куни соат 18.00 да тўхтатилади. Агар охирги кун дам олиш кунига тўғри келса, дам олиш кунидан кейинги биринчи иш куни соат 18.00 да тўхтатилади.

3-БОБ. ТАЛАБГОРЛАР ЎРТАСИДА ТАНЛОВ

ЎТКАЗИШ ТАРТИБИ

8. Туман ишчи гуруҳи уруғлик қишлоқ хўжалиги экинларини етиштириш ҳуқуқига эга бўлиш учун уруғлик етиштирувчи субъектлар ўртасида ҳужжат қабул қилиш якунланган кундан бошлаб 10 иш куни давомида танлов ўтказади.

Туман ишчи гуруҳи аъзолари умумий сонининг камида учдан икки қисми иштирок этганда танлов ўтказилади.

9. Танловда уруғлик етиштирувчи субъектларнинг имкониятлари ўрганилади ва ушбу Низомга 3-иловага мувофиқ рейтинг шкаласи асосида баҳоланади.

10. Туман ишчи гуруҳига тақдим этилган ҳужжатлар ҳақиқатга тўғри келмаганда ёки маълумотларни сохталаштириш ҳолатлари аниқланганда уруғлик етиштирувчи субъект ишчи гуруҳининг қарори асосида танловда қатнашиш ҳуқуқидан маҳрум этилади.

11. Туман ишчи гуруҳи раҳбари ва аъзолари танлов ошкора, ҳаққоний ва адолат тамойиллари асосида белгиланган муддатларда ўтказилиши учун шахсан жавобгар ҳисобланади.

12. Танловда уруғлик етиштирувчи субъектнинг кўрсаткичлари ва имкониятлари баҳоланади ва тўпланган баллар йиғиндиси ҳисоблаб чиқилади.

13. Танловда иштирок этган уруғлик етиштирувчи субъектнинг экин майдони кўрсатилган ҳолда уларнинг тўплаган бали бўйича энг юқори баллдан бошлаб энг паст баллгача талабгорлар рўйхати шакллантирилади.

Рўйхатда энг юқори балл тўплаган уруғлик етиштирувчи субъектдан бошлаб туманда уруғлик учун экиладиган қишлоқ хўжалиги экинлари майдони қамраб олингунгача бўлган уруғлик етиштирувчи субъектлар танлов ғолиби деб топилади.

14. Танлов якуни бўйича мазкур Низомга 4-иловага мувофиқ шаклда икки нусхада баённома тузилади, туман ишчи гуруҳи аъзолари томонидан имзоланади ва туман ҳокимлигига тақдим этилади.

15. Туман ҳокимлиги туман ишчи гуруҳининг баённомасини тасдиқлаш бўйича икки иш кунида тегишли қарор қабул қилади ва танлов ғолибларини эълон қилади.

Туман ҳокимининг қарори нусхаси ва баённоманинг бир нусхаси тегишли ҳужжатлар илова қилинган ҳолда Ўзбекистон Республикаси Қишлоқ хўжалиги вазирлиги ҳузуридаги Уруғчиликни ривожлантириш марказининг (кейинги ўринларда - Марказ) Қорақалпоғистон Республикаси, вилоятлар бошқармаларига юборилади.

16. Марказнинг Қорақалпоғистон Республикаси ва вилоятлар бошқармалари:

уч иш кунида туман ҳокими қарорини ва туман ишчи гуруҳининг баённомасини ўрганиб чиқади;

танлов натижалари бўйича умумлаштирилган маълумотларни туман ҳокимининг қарори нусхасини илова қилган ҳолда Марказга икки иш кунида тақдим этади.

Уруғлик қишлоқ хўжалиги экинларини етиштирувчиларнинг реестрлари шакллантирилади.

4-БОБ. ОРИГИНАЛ, ЭЛИТА ВА КЕЙИНГИ АВЛОДЛАРГА

МАНСУБ УРУҒЛИК ҚИШЛОҚ ХЎЖАЛИГИ ЭКИНЛАРИНИ

ЕТИШТИРИШ ҲУҚУҚИГА ЭГА БЎЛИШ УЧУН ТАНЛОВ

ЎТКАЗИШ БЎЙИЧА ҲУЖЖАТЛАРНИ ЮРИТИШ

17. Уруғлик қишлоқ хўжалиги экинларини етиштириш ҳуқуқига эга бўлиш учун талабгорларни танлаш ва танлов ўтказиш бўйича ҳужжатлар туман ишчи гуруҳи котиби томонидан юритилади.

18. Туман ишчи гуруҳи уруғлик етиштирувчи субъектлар томонидан танловда иштирок этиш учун тақдим этилган барча ҳужжатларни алоҳида йиғма жилдларга тикилган ҳолда танлов якунлангандан кейин ўн кундан кечиктирмасдан Марказнинг Қорақалпоғистон Республикаси ва вилоятлар бошқармаларига топширади.

Йиғма жилдда қуйидаги ҳужжатлар тикилиши шарт:

туман ишчи гуруҳи таркибининг тасдиқланган нусхаси;

Қорақалпоғистон Республикаси Қишлоқ хўжалиги вазирлиги, вилоятлар қишлоқ хўжалиги бошқармаларининг туман ҳокимликлари билан келишилган ҳолда танловга ҳужжат қабул қилиш ва танловни ўтказиш муддатлари, танлов ўтказиладиган жойни белгилаш тўғрисидаги ҳужжат нусхаси;

туман ишчи гуруҳининг танлов ўтказиш тўғрисидаги эълонлари нусхалари;

танловда иштирок этувчи талабгорларни рўйхатга олиш учун тикилган ҳамда бетлар сони кўрсатилган махсус дафтар;

танловга талабгор томонидан тақдим этилган ҳужжатлар;

ҳар бир ишчи гуруҳ аъзоси томонидан тўлдирилган танлов варақалари;

танлов якуни бўйича қўйилган баллар ҳисоб-китоби;

рейтинг балларини бериш учун асос бўлган барча ҳужжатлар;

ўтказилган танлов якуни бўйича туман ишчи гуруҳи баённомаси нусхаси.

19. Туман ишчи гуруҳи фаолиятига доир ҳужжатларнинг тўлиқ юритилиши, сақланиши ва белгиланган муддатларда Марказнинг Қорақалпоғистон Республикаси ва вилоятлар бошқармаларига сақлаш учун топширилиши учун туман ишчи гуруҳи раҳбари ва котиби шахсан жавобгар ҳисобланади.

20. Марказ уруғлик қишлоқ хўжалиги экинларини етиштириш ҳуқуқига эга бўлган уруғлик етиштирувчи субъектларнинг ягона реейстрини шаклландиради ҳамда ягона электрон базага киритади.

5-БОБ. ТАНЛОВ ҒОЛИБЛАРИНИНГ

ВАЗИФАЛАРИ ВА ФУНКЦИЯЛАРИ

21. Қуйидагилар уруғлик қишлоқ хўжалиги экинларини етиштириш ҳуқуқига эга бўлган танлов ғолибларининг вазифалари ҳисобланади:

контрактация ёки фъючерс шартномасига асосан навлар бўйича зарур ҳажмдаги, Хz DSt 663:2017 стандарт талабларига мос келувчи нав уруғларининг авлодларини ҳисобга олган ҳолда етиштириш;

фақат уруғлик, бир авлодга мансуб бўлган битта нав экилишини таъминлаш;

кўпайтирилаётган навнинг қимматли хўжалик белгилари ва технологик хусусиятларини сақлаш;

юқори сифатли ва нав софлигига эга бўлган авлодли уруғлар етиштириш;

авлодли уруғликларни етиштириш тартиби ва қоидаларига амал қилиш;

нав оригинаторлари томонидан ишлаб чиқилган илмий асосланган тавсиялар асосида агротехник тадбирлар белгиланган муддатларда ва меъёрларда сифатли ўтказилишини таъминлаш.

Қуйидагилар уруғлик қишлоқ хўжалиги экинларини етиштириш ҳуқуқига эга бўлган танлов ғолибларининг функциялари ҳисобланади:

уруғлик учун экиладиган экинларни юқори унумдор, механизмлар ёрдамида ишлов беришга қулай, сув билан яхши таъминланган, шўрланмаган ва текис далаларда жойлаштириш;

алмашлаб экиш ва агротехник тадбирларни ўз вақтида ўтказиш режа-жадвалини тузиш ва амалга ошириш;

хўжаликда уруғчилик бўйича агроном ёки агроном мутахассиси бўлишини таъминлаш (хўжалик раҳбари уруғчилик бўйича агроном ёки агроном бўлганда бу талаб қилинмайди);

фойдаланишга рухсат этилган кимёвий препаратлар билан қайта ишланган (зарарсизлантирилган) уруғлик материалларини экиш (махсус элита уруғчилик хўжаликлари бундан мустасно);

уруғлик учун экилган майдонларни бегона нав ва ўсимликлардан тозалаш;

касаллик келтирувчи бегона экинларни уруғлик майдонлар атрофига экмаслик ҳамда бошқа навлар билан чатишишга йўл қўймаслик;

уруғлик пахта экилган майдонларда уруғлик пахта ҳосили тўлиқ йиғиштириб олингандан сўнг ғўза дефолиациясини ўтказиш;

уруғлик пахта майдонларида ғўзанинг ҳар тупида ўрта толали навларда 3-8-ҳосил шохларини 1-2 ўринлардан, ингичка толали навларда 3-13-ҳосил шохларини тўлиқ пишиб очилган кўсакларидан қўл билан териш, машиналар ёрдамида терилганда кўсаклар 60-65 фоиз очилганда териш;

уруғлик учун экилган бошоқли дон экинлари майдонлари уруғлик дон ўриш учун ажратилган комбайнларда ўрилиши, уруғлик донни уруғлик дон ташиш учун ажратилган автомашина билан ташиш;

йиғиштириб олинган қишлоқ хўжалиги экинлари уруғликлари авлодлари бўйича ишлаб чиқилган давлат стандартлари талабига кўра уруғлик қабул қилувчи корхоналарга топшириш.

22. Танлов ғолиблари томонидан мазкур Низом талаблари ёки агротехника қоидалари мунтазам равишда бузилганда етиштирилган уруғлик қишлоқ хўжалиги экинлари майдонлари Қорақалпоғистон Республикаси қишлоқ хўжалиги вазирлиги ва вилоят қишлоқ хўжалиги бошқармалари ҳамда манфаатдор ташкилотлар билан келишган ҳолда тасдиқланади, туман апробация комиссияси (кейинги ўринларда - туман апробация комиссияси) томонидан яроқсиз деб топилади ва уруғлик етиштириш ҳуқуқидан маҳрум этилади.

Уруғлик етиштирувчи субъектда битта ғўза навининг иккита авлоди экилган тақдирда, устама тўлашдаги фарқлар инобатга олинган ҳолда туман апробация комиссияси томонидан кейинги авлодга расмийлаштирилади.

Уруғлик пахта майдонларида илмий асосланган тавсияларга амал қилган ҳолда кўчат қалинлигини таъминлаш талаб этилади, қўшқатор усулида уруғлик пахта хомашёси етиштиришга йўл қўйилмайди. Мазкур талабларга амал қилинмаган ҳолларда туман апробация комиссияси томонидан уруғлик етиштирувчи субъект уруғлик етиштириш ҳуқуқидан маҳрум этилади.

6-БОБ. ЯКУНЛОВЧИ ҚОИДАЛАР

23. Илмий-тадқиқот муассасалари ва уларнинг илмий-тажриба станциялари, олий таълим муассасалари, Марказ тизимидаги қишлоқ хўжалиги экинларининг янги, истиқболли навларини дастлабки кўпайтирувчи ва районлашган навларнинг бирламчи уруғчилиги билан шуғулланувчи элита уруғчилик хўжаликлари танловда иштирок этмасдан оригинал ва элита уруғлик қишлоқ хўжалиги экинларини етиштириш ҳуқуқига эга.

24. Танлов иштирокчилари танлов натижаларидан норози бўлган тақдирда, белгиланган тартибда судга шикоят қилиш ҳуқуқига эга.

25. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Низомга

1-ИЛОВА

Оригинал, элита ва кейинги авлодларга мансуб

уруғлик қишлоқ хўжалиги экинларини етиштириш

ҳуқуқига эга бўлиш учун фермер хўжаликлари ва

бошқа қишлоқ хўжалиги ташкилотлари ўртасида

танлов ўтказиш бўйича туман ишчи гуруҳининг

НАМУНАВИЙ ТАРКИБИ

Низомга

2-ИЛОВА

Оригинал, элита ва кейинги авлодларга мансуб уруғлик

қишлоқ хўжалиги экинларини етиштириш ҳуқуқига эга

бўлиш учун фермер хўжаликлари ва бошқа қишлоқ

хўжалиги ташкилотлари ўртасида танлов ўтказиш

СХЕМАСИ

Низомга

3-ИЛОВА

Уруғлик қишлоқ хўжалиги экинларини

етиштириш ҳуқуқига эга бўлиш учун танлов ўтказишда

фермер хўжаликлари ва бошқа қишлоқ хўжалиги

ташкилотлари имкониятларини баҳолаш бўйича

РЕЙТИНГ БАЛЛАРИ

Изоҳ. Фермер хўжалиги ёки бошқа қишлоқ хўжалиги ташкилотининг имкониятларини баҳолашда ҳар бир йўналиш учун энг юқори балл 10 баллдан ошмаган ҳолда баҳоланади.

Низомга

4-ИЛОВА

     

ишчи гуруҳи йиғилишининг

_________________-сонли баённомаси

Кун тартиби

________________ уруғчилик хўжаликлари ўртасида ўтказилган танлов якунлари тўғрисида.

       

ҚАРОР ҚИЛАДИ:

Қонун ҳужжатлари маълумотлари миллий базаси (www.lex.uz),

2021 йил 13 октябрь