Ўзбекистон Республикаси Президентининг 28.02.2024 й. Ф-7-сон "Хоразм вилоятида Тошсақа тизимидаги магистрал суғориш каналларини қайта тиклаш (2-босқич)" лойиҳасини амалга ошириш чора-тадбирлари тўғрисида"ги Фармойиши

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ФАРМОЙИШИ

28.02.2024 й.

N Ф-7

"ХОРАЗМ ВИЛОЯТИДА ТОШСАҚА ТИЗИМИДАГИ

МАГИСТРАЛ СУҒОРИШ КАНАЛЛАРИНИ ҚАЙТА

ТИКЛАШ (2-БОСҚИЧ)" ЛОЙИҲАСИНИ АМАЛГА

ОШИРИШ ЧОРА-ТАДБИРЛАРИ ТЎҒРИСИДА

Хоразм вилоятида сув ресурсларини оқилона бошқариш, ирригация тизими ва суғориш тармоқларида сув йўқотишларини камайтириш, қишлоқ хўжалиги ишлаб чиқарувчиларини сув билан кафолатли таъминлаш, сув хўжалиги соҳасига ресурс тежайдиган замонавий инновация технологияларини кенг жорий этиш мақсадида:

1. Сув хўжалиги вазирлиги ва Хоразм вилояти ҳокимлигининг "Хоразм вилоятида Тошсақа тизимидаги магистрал суғориш каналларини қайта тиклаш (2-босқич)" лойиҳасини (кейинги ўринларда - Лойиҳа) амалга ошириш тўғрисидаги таклифига розилик берилсин.

2. Сув хўжалиги вазирлиги (Ш.Р. Хамраев) Хоразм вилояти ҳокимлиги (Ж.Р. Рахимов) ҳамда манфаатдор вазирлик ва идоралар билан биргаликда:

2024 йил 25 мартга қадар Лойиҳа концепциясини ишлаб чиқсин ҳамда Инвестициялар, саноат ва савдо вазирлигига келишиш учун тақдим этсин;

2024 йил якунига қадар Лойиҳанинг техник-иқтисодий асоси ишлаб чиқилишини, белгиланган тартибда экспертизадан ўтказилишини ва Вазирлар Маҳкамасига киритилишини ташкил қилсин.

3. Инвестициялар, саноат ва савдо вазирлиги (Л.Ш. Қудратов):

Иқтисодиёт ва молия вазирлиги (Ж.Х. Қаршибоев) билан биргаликда 2024 йил 1 апрелга қадар Ислом тараққиёт банки билан музокаралар ўтказиб, белгиланган тартибда Лойиҳани молиялаштириш шартлари олинишини таъминласин;

Сув хўжалиги вазирлиги (Ш.Р. Хамраев) билан биргаликда Лойиҳанинг техник-иқтисодий асоси белгиланган тартибда экспертизадан ўтказилиб тасдиқлангандан сўнг, ушбу Лойиҳани 2025 йилда давлат ташқи қарзи жалб қилинадиган янги инвестиция лойиҳаларининг асосий рўйхатига киритиш бўйича Инвестицияларни жалб қилиш, саноатни ривожлантириш ва савдони тартибга солиш масалалари бўйича Ҳукумат комиссиясига таклиф киритсин.

4. Сув хўжалиги вазирлиги (Ш.Р. Хамраев) Лойиҳанинг техник-иқтисодий асоси ва ишчи ҳужжатларини ишлаб чиқиш бўйича бош лойиҳачи ташкилотни белгиланган тартибда, очиқлик ва ошкораликни таъминлаган ҳолда тендер савдолари орқали аниқласин.

5. Лойиҳанинг техник-иқтисодий асосини ишлаб чиқиш харажатлари 2024 йилда Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури доирасида Сув хўжалиги вазирлигига ажратилган маблағларнинг иқтисод қилинган қисми ҳисобидан амалга оширилсин.

6. Қуйидагилар:

Бош вазир ўринбосари Ж.А. Ходжаев Лойиҳанинг 2025 йилда давлат ташқи қарзи жалб қилинадиган янги инвестиция лойиҳаларининг асосий рўйхатига киритилишига;

инвестициялар, саноат ва савдо вазири Л.Ш. Қудратов Ислом тараққиёт банки билан музокаралар асосида Лойиҳани молиялаштириш шартлари олинишига;

сув хўжалиги вазири Ш.Р. Хамраев Лойиҳанинг техник-иқтисодий асоси замонавий қурилиш техника ва технологиялари ҳамда қурилиш материалларидан фойдаланишни назарда тутган ҳолда ўз вақтида ва сифатли ишлаб чиқилишига;

Хоразм вилоят ҳокими Ж.Р. Рахимов ҳудуддаги реал ҳолатнинг таҳлили асосида Лойиҳанинг техник-иқтисодий асосини ишлаб чиқишга зарур бўлган ҳужжатлар ва маълумотларни, шу жумладан канал харитаси, чизмаси, статистик кўрсаткич ва бошқалар тайёрланиши ва тақдим этилишига;

"Тошкент ирригация ва қишлоқ хўжалигини механизациялаш муҳандислари институти" миллий тадқиқот университети ректори Б.С. Мирзаев Лойиҳанинг техник-иқтисодий асоси ишлаб чиқилишида инновацион технологияларни қўллаш бўйича илмий асосланган таклифлар ишлаб чиқишга шахсан масъул ва жавобгар эканлиги белгилаб қўйилсин.

7. Бош прокуратура (Ж.Ж. Хатамов) ва Ҳисоб палатаси (А.М. Бобоев) Лойиҳанинг амалга оширилиши устидан доимий назорат ўрнатсин ҳамда ҳар ярим йилда Ўзбекистон Республикаси Президенти Администрациясига ахборот киритиб борсин.

8. Мазкур фармойишнинг ижросини самарали ташкил қилишга масъул ва шахсий жавобгар этиб сув хўжалиги вазири Ш.Р. Хамраев белгилансин.

Фармойиш ижроси учун масъул ташкилотлар фаолиятини мувофиқлаштириш ва назорат қилиш Бош вазир ўринбосари Ж.А. Ходжаев зиммасига юклансин.

Ўзбекистон Республикаси Президенти                                 Ш. Мирзиёев

Қонун ҳужжатлари маълумотлари миллий базаси (www.lex.uz),

2024 йил 28 февраль