Директор фамилиясини ўзгартирганда, электрон рақамли имзони нима қилиш керак

Мазкур ҳолатда унинг номига аввал олинган ЭРИ сертификатларини бекор қилишга ҳамда янги фамилияга янгиларини олишга тўғри келади. Buxgalter.uz қуйидаги режа бўйича иш тутишни тавсия қилади:

1-қадам: СТИР реквизитларини аниқлаштирамиз

– ЭРИ билан машғул бўлишдан олдин солиқ тўловчининг идентификацион рақамига доир масалани ҳал қилиш керак. СТИР реквизитларида янги фамилия қайд этилиши лозим. Одатда янги фамилияга паспорт олинганда СТИР реквизитлари автоматик тарзда алмаштирилади. Бироқ айрим ҳолатларда носозликлар туфайли бундай бўлмаслиги ҳам мумкин. СТИР борасидаги носозликлар шундай ҳолатларга ҳам олиб келиши мумкинки, бошқа ахборот тизимлари сизни СТИР бўйича топа олмаслиги мумкин. Номувофиқликлар бартараф этилмагунга қадар зарур хизматни олишингизнинг имкони бўлмайди.

Маълумот олиш учун паспорт серияси ва рақами, шунингдек туғилган сана керак бўлади. «Излаш» тугмаси босилганидан кейин «Натижа» жойида сизнинг СТИР маълумотларингиз бу тасдиқни қоғозга чиқариш таклифи билан намоён бўлиши лозим.

Жавоб бошқача бўлганда, қуйидагиларни амалга оширинг:

· my.soliq.uz даги бош саҳифада «Ҳисобга қўйиш» тугмасини босинг;

· очилган саҳифада «Ҳисобга олиш маълумотларини ўзгартириш» ҳаволасини босинг;

· очилган шаклни тўлдиринг. Бунда «Ариза тури» сатрида «Жисмоний шахсларни ҳисобга қўйиш маълумотларини ўзгартириш» ва паспорт саҳифаларини сканерлаш ёки расмга олишни тўхтатиш вариантини кўрсатишни ёддан чиқарманг. Сканерлаш ёки расмга олиш матни тиниқ бўлиши лозим.

ДСИ аризани кўриб чиқиш натижалари ҳақида сизни хабардор қилади. Натижа паспорт маълумотларига мувофиқ СТИР реквизитлари ўзгартирилишидан иборат бўлиши керак.

Сизда компьютер ёки Интернет билан боғлиқ муаммолар мавжуд бўлса, ДСИга бориб ушбу масала юзасидан мурожаат қилишингиз мумкин. Қўшимча маслаҳатлар олиш учун қуйидаги телефонларга мурожаат қилинг: (71) 202-32-82 ёки 1198.

2-қадам: янги ЭРИ оламиз

Раҳбарнинг номига бир нечта ЭРИ расмийлаштирилиши мумкин: ҳам жисмоний шахсга, ҳам юридик шахсга. Ҳаммасини ўзгартиришга тўғри келади. Бу нима учун муҳим саналади?

Ҳар қандай ЭРИнинг реквизитларидан бири сертификат эгасининг номи ҳисобланади. Кўп ҳолатларда у ҳужжатларда ахборот тизими томонидан ҳужжат имзоланганлиги тўғрисида белги қўйиладиган жойда (катакчада) акс эттирилади. У ерда янги «Петрова» фамилияси ўрнига олдинги «Иванова» фамилияси акс эттирилган бўлса, ҳеч бўлмаганда контрагентлар томонидан тушунмовчилик юзага келиши мумкин ва бу ҳужжатлардаги чалкашликларга сабаб бўлади.

Янги ЭРИларни (ҳар бирига алоҳида буюртма расмийлаштирилади) қуйидаги йўллардан бири орқали олиш мумкин:

· яқин атрофда жойлашган Давлат хизматлари марказига мурожаат қилинади (паспортни олишни унутманг, қолган масалаларда марказ ходимлари ўзлари ёрдам кўрсатадилар); · масофавий тарзда – e-imzo.uz портали ёрдамида. Йўриқномани бу ерда ўқинг.

3-қадам: эски сертификатларни бекор қиламиз

ЭРИ соҳиби аввалги ЭРИлар сертификатларини бекор қилиш тўғрисида қарор қабул қилиши лозим, сабаби ушбу ЭРИлар амал қилиш муддати тугагунига қадар фаол ҳолатда бўлади ҳамда фирибгарларнинг қўлига тушиб қолиши мумкин. Шу боисдан янги ЭРИлар олинганидан кейин хавфсизлик нуқтаи назаридан дарҳол мазкур ишларни амалга ошириш лозим.

ЭРИ сертификатини фақат шахсан бориб бекор қилиш мумкин. Бунинг учун сертификат эгаси яқин атрофда жойлашган Давлат хизматлари марказига мурожаат қилиши керак, бунда унинг ёнида шахсини тасдиқловчи ҳужжат бўлиши лозим.

Бу нафақат директорга тааллуқли…

Фамилия ўзгартирилган тақдирда, номига ЭРИ (уларнинг туридан қатъи назар) олинган ҳар қандай жисмоний шахс шундай алгоритмдаги тартибда ҳаракат қилиши лозим.

Олег ГАЕВОЙ.