Воситачилик савдосида онлайн-НКТни қандай созлаш керак

Дўкон воситачилик шартномалари бўйича товарларни реализация қилади. Агар комитент – резидент ёки норезидент бўлса, реализация қилиш учун онлайн-НКТни қандай тўғри созлашни “Норма” ва buxgalter.uz илтимосига биноан “Гаров тараққиёт НКМ” МЧЖ таъсисчиси Владимир ГИБЕЛЬ тушунтирди:

 

– Резидентлар ва норезидентлар билан сиз шартноманинг айни бир турини – воситачилик шартномасини тузишингизга қарамай, созламалар товарга эгалик қилувчининг резидентлигига боғлиқ ҳолда фарқ қилади.

 

1. Агар комитент – резидент бўлса

Бу ҳолда комитент ҳамда воситачи созлашни амалга оширади.

 

Комитентга тавсиялар:

1) my.soliq.uzда шахсий кабинетга киринг;

2) хизматлар рўйхатида “Ташкилот воситачиларининг рўйхатини шакллантириш”ни танланг;

3) “Воситачини яратиш” иловасини очинг ва “Қўшиш” тугмасига босинг;

4) очилган ойнада тегишли майдонларга қуйидагиларни киритинг:

• воситачининг – юридик шахснинг СТИРи ёки якка тартибдаги тадбиркорнинг ЖШШИРи;
• ташкилот-воситачининг номи (автоматик тарзда акс эттирилади);
• воситачилик шартномасининг рақами;
• воситачининг МФОси;
• воситачининг ҳисобрақами;
• шартнома тузилган сана;
• шартноманинг амал қилиш муддати бошланадиган сана;
• шартноманинг амал қилиш муддати тугайдиган сана.

“Комитент (СТИР/ЖШШИР)” устуни тўлдирилмаган ҳолда қолдирилади.

5) “Қўшиш” тугмасига босинг.

 

Воситачига тавсиялар:

Воситачилик шартномалари бўйича реализация қилинаётган товарлар бўйича онлайн-НКТ хотирасидаги товарлар ва хизматлар тўғрисидаги маълумотга комитентнинг СТИРи ёки ЖШШИРини киритинг. Онлайн-НКТ қайта созлангандан сўнг онлайн-НКМ чекида воситачилик шартномаси бўйича реализация қилинган товарнинг номи остида қуйидагилар кўрсатилади:

• СТИР, агар комитент – юридик шахс бўлса;
• ЖШШИР, агар комитент – ЯТТ бўлса.

 

2. Агар комитент – норезидент бўлса

Барча созламалар воситачи томонидан амалга оширилади:

1) комитентнинг ID-рақамини олинг;

2) онлайн-НКТ хотирасига унинг товарларига комитентнинг ID-рақамини киритинг.

 

Комитентнинг 9 белгили ID-рақамини олиш учун

1) my.soliq.uzда шахсий кабинетга киринг;

2) “Ташкилот воситачиларининг рўйхатини шакллантириш” тугмасига босинг;

3) “Комитентни шакллантириш” иловасини танланг;

4) “Комитентнинг тури” устунида чиқиб келадиган тавсиядан юридик шахс – норезидентни (норезидент ЮШ) танланг;

5) “Шартноманинг файлларини бириктиринг zip, rar” устунида унинг асосида комитент билан ишлаётган шартномани (ҳужжатни) бириктиринг;

6) “Телефон рақамини киритинг” устунида комитентнинг телефон рақамини кўрсатинг;

7) “Жўнатиш”га босинг.

Сизнинг аризангиз бўйича комитент рўйхатдан ўтказилганлиги тўғрисидаги ёзув “Комитентни шакллантириш” иловасида – жадвалда экраннинг пастки қисмида акс эттирилади. “Комитентнинг ID-рақами” устунида автоматик тарзда шакллантирилган 9 белгили ноёб рақам кўрсатилади.

 

3. Солиқ базаси қандай шакллантирилади

Ушбу созламаларда комитентларнинг товарларини сотишдан олинган сумма қуйидагича акс эттирилади:

• агар комитент – резидент бўлса – автоматик тарзда 100% унинг ҳисоботида;
• агар комитент – норезидент бўлса – шартнома иштирокчиларининг ҳеч бирида.

Воситачилар бундай шартномалар бўйича воситачилик ҳақи қисмида ўз солиқ базасини шакллантириш учун:

• агар комитент – резидент бўлса – комитентга воситачилик ҳақига ЭҲФ  тақдим этадилар;
• агар комитент – норезидент бўлса – Ўзбекистоннинг ташқарисида хизматларни реализация қилишга бир томонлама ЭҲФ тақдим этадилар.

Олег ГАЕВОЙ тайёрлади