Янги ходимга «касаллик варақаси» қандай ҳисобланади

«Ҳали бир йил ишламаган ходим касаллик таътилига чиқди. Янги ходимга вақтинчалик меҳнатга лаёқатсизлик нафақасини қандай тўлаш керак?»

Обуначининг илтимосига кўра, «Норма» кадрлар хизмати раҳбари, «Жавоб берамиз!» хизматининг мутахассиси Валерия ЛЯНДРЕС саволларга жавоб берди:

– Вақтинчалик меҳнатга лаёқатсизлик (ҳомиладорлик ва туғиш бўйича эмас) нафақасининг миқдори вақтинчалик меҳнатга лаёқатсизлик бошланган кунда умумий иш стажидан келиб чиқиб (вақтинчалик меҳнат қобилияти юзага келган корхонадаги иш стажидан қатъи назар) меҳнат дафтарчаси (электрон меҳнат дафтарчаси), шунингдек унинг ўрнига берилган бошқа ҳужжат асосида белгиланади 31.05.2024 й. 314-сон ВМҚга 1-илова 26-б..

Вақтинчалик меҳнатга лаёқатсизлик нафақасини ўртача ойлик иш ҳақининг қуйидаги миқдорларида тўланг 31.05.2024 й. 314-сон ВМҚга 1-илова 24-б.:

• умумий иш стажи 8 йилгача бўлган ходимларга – 60%;
• умумий иш стажи 8 йил ва ундан ортиқ бўлган ходимларга, шунингдек 21 ёшга етмаган чин (сағир) етимларга – 80%.

Иш стажидан қатъи назар, қуйидаги ходимларга касаллик варақасини ўртача ойлик иш ҳақининг 100% миқдорида тўланг 31.05.2024 й. 314-сон ВМҚга 1-илова 22-б.:

• байналминал жангчиларга;
• қарамоғида 16 ёшга (ўқувчилар 18 ёшга) етмаган уч ёки ундан ортиқ болалари бўлган ходимларга;
• Чернобиль АЭСдаги авария оқибатларини тугатишда қатнашган ходимларга;
• Чернобиль АЭСдаги авария натижасида радиоактив ифлосланиш зонасидан эвакуация қилинган ва кўчирилган, қон ҳосил қилувчи органлар касалликлари (ўткир лейкоз), қалқонсимон без (аденома, рак) ва хавфли ўсмалар билан боғлиқ касалликларга чалинган ходимларга;
• меҳнатда майибланиш ва касб касаллиги натижасида вақтинчалик меҳнатга лаёқатсиз бўлган ходимларга;
• пандемия, техноген, табиий ва экологик тусдаги фавқулодда вазиятлар юзага келган ҳолларда, ушбу фавқулодда вазиятларга сабабчи бўлган инфекцияси билан зарарланиши ёки зарарланган деб гумон қилиниши муносабати билан карантинга жойлаштирилган ва 14 ёшгача бўлган боласини парвариш қилаётган ота-оналарга (уларнинг ўрнини босувчи шахслар, васийлар, ҳомийлар).

Нафақалар тўлашнинг алоҳида тартиби белгиланган яна бир тоифа – ижтимоий аҳамиятга эга бўлган касалликлар (сил касаллиги, онкология касалликлари, янгидан пайдо бўладиган хатарли ўсимталар, жинсий йўл билан ўтадиган касалликлар, ОИТС, мохов (лепра) касаллиги, руҳий касалликлар) бўйича ҳисобда турган ходимлар 31.05.2024 й. 314-сон ВМҚга 1-илова 23-б..

Бундай ходимларга нафақани умумий иш стажига қараб ўртача ойлик иш ҳақининг қуйидаги миқдорларида тўланг:

• 5 йилгача – 60%;
• 5 йилдан 8 йилгача – 80%;
• 8 йил ва ундан ортиқ – 100%.