9 ойни хатоларсиз ёпамиз:
2026 йил ноябрь ойи тадбиркорлар учун навбатдаги енгилликлар ва рақамли ислоҳотларни олиб келади: бизнес учун электр ва газ учун олдиндан тўловни камайтириш, «яшил» иссиқхоналарни давлат томонидан қўллаб-қувватлаш, божхона тўловларини камайтириш ва электрон шартномаларга ўтиш.
Анъанавий шарҳимизда қонунчиликдаги асосий ўзгаришларни кўриб чиқамиз.
Эътибор беринг
Муҳим янгиликларни ўтказиб юбормаслик учун Телеграм-каналимизга обуна бўлинг.
Материаллардан нусха кўчириш ва улардан фойдаланишга фақат манбага фаол ҳавола ёки таҳририятнинг ёзма рухсати мавжуд бўлгандагина йўл қўйилади.
Smart ҳисоблагичли тадбиркорлар учун электр энергияси ва табиий газ учун олдиндан тўловлар камайтирилади
2026 йил 1 ноябрдан бошлаб «Электр энергиясини ҳисобга олиш ва назорат қилишнинг автоматлаштирилган тизими» (АСКУЭ) ва «Табиий газ назорати ва ҳисобининг автоматлаштирилган тизими»га (АСКУГ) уланган, масофадан ўчириш (ёқиш) функциясига эга бўлган ҳисобга олиш приборларига эга бўлган тадбиркорлик субъектлари учун ҳар ойлик электр энергияси ва табиий газ истеъмоли учун тўланадиган олдиндан тўлов миқдори 15% миқдорида белгиланди. Бироқ бу норма охирги 2 ой давомида тўлов интизомига риоя қилмаган шахсларга нисбатан татбиқ этилмайди.
Бундан ташқари, бундай тадбиркорлар электр энергияси ва газ истеъмоли тўғрисидаги ёзма ҳисоботларни ҳудудий таъминот ташкилотларига тақдим этиш мажбуриятидан озод этилади 
.
Курьерлик жўнатмаларининг божхона расмийлаштируви учун йиғим камайтирилди
2026 йил 1 ноябрдан бошлаб халқаро курьерлик жўнатмаларини божхона расмийлаштирувидан ўтказганлик учун божхона йиғимининг амалдаги ставкаси 20%га камайтирилади .
Тавсия
Агар компаниянгиз хорижий курьерлик хизматлари хизматларидан фойдаланса, сизга «Норезидентларга кўрсатиладиган воситачилик хизматларини расмийлаштириш, ҳисобга олиш ва уларга солиқ солиш» тавсияси фойдали бўлади, унда экспертлар норезидентлар билан воситачилик битимларини божхона расмийлаштируви масалаларини ҳам тушунтириб бердилар.
Реклама қўнғироқлари ва СМС-хабарномалар янги қоидалар асосида тарқатилади
2026 йил 1 ноябрдан бошлаб СМС-хабарномалар орқали товарларни (ишларни, хизматларни) таклиф қилувчи (реклама қилувчи) ҳар қандай юридик ва жисмоний шахслар рекламани фақат олувчининг ёзма ёки электрон розилигини олгандан сўнг тарқатиши мумкин бўлади.
Бундан ташқари, мобил алоқа воситаларига реклама қўнғироқлари ва СМС-хабарномалар юбориш бўйича хизматлар кўрсатувчи юридик шахслар ўзларининг ахборот тизимларини Шахсга доир маълумотлар базалари давлат реестрида рўйхатдан ўтказишлари зарур.
Шу билан бирга, соат 18:00 дан 09:00 гача реклама қўнғироқлари ва СМС-хабарномаларни тарқатишга тўлиқ тақиқ жорий этилади.
Шунингдек, мобил алоқа операторлари зиммасига улар томонидан тарқатилаётган реклама қўнғироқлари ва хабарномаларини абонент сўровига кўра тўлиқ ёки қисман блоклаш мажбурияти юклатилмоқда.
Агар янги талабларга риоя қилинмаса, бу реклама ва шахсий маълумотлар тўғрисидаги қонунчиликни бузиш деб топилади, бу эса тегишли чоралар кўрилишига асос бўлади .
«Экологик» иссиқхоналарга электр энергияси харажатларининг бир қисми қоплаб берилади
2026 йил 1 ноябрдан 2030 йил 1 апрелгача иссиқхоналарнинг ишлаши учун махсус иссиқликни тежайдиган «кўрпа» қопламаси ва (ёки) энергия тежамкор «яшил» иситиш қурилмаларидан (иссиқлик насослари, геотермал иситиш тизимлари, қуёш иссиқлик тизимлари, электр энергияси билан ишлайдиган юқори самарали иситиш тизимлари) фойдаланадиган иссиқхона хўжаликларига октябрь-март ойларида истеъмол қилинган электр энергияси қийматининг 50 фоизи миқдорида субсидиялар тақдим этилади (13.10.2026 й. ПҚ-371-сон 3-б.).
Архивлар учун янги талаблар кучга киради
2026 йил 1 ноябрдан бошлаб ташкилотлар, шу жумладан нодавлат архивлар ўзларида сақланаётган архив ҳужжатлари тўғрисидаги маълумотларни давлат архивларига Архив ахборот тизими орқали онлайн тақдим этишлари шарт.
Давлат архивларини бутлаш манбалари бўлган ташкилотлар нодавлат архивлар томонидан уларга пулли хизматлар кўрсатилиши учун давлат архивининг розилигини олиши шарт эмас.
Давлат архивларининг ўқув залларидан фойдаланувчилар эса энди архив ҳужжатларидан 2 ойгача вақтинча фойдаланиш ҳуқуқига эга .
Тавсия
Buxgalter Pro тизимида қоғоз ва электрон бухгалтерия ҳужжатларини сақлаш қоидалари, уларни архивларга топшириш, йўқ қилиш ва бошқа жиҳатлар ҳақида «Бухгалтерия ҳужжатларини қандай сақлаш керак» мавзусида батафсил тавсиянома мавжуд.
Шаҳарсозлик ҳужжатларини рақамлаштириш жорий этилмоқда
2026 йил 1 ноябрдан бошлаб Урбанизация ва уй-жой бозорини барқарор ривожлантириш миллий қўмитаси мастер-режаларнинг ягона электрон реестрини юритади. Қўмитада уларнинг рақамлаштирилган нусхалари ҳам сақланади.
Бунда, рўйхатдан ўтказилмаган мастер-режаларни амалга ошириш, шунингдек, улар асосида шаҳарсозлик, қурилиш, инвестиция ва бошқа фаолиятни амалга ошириш тақиқланади .
Электр энергияси ва газ етказиб бериш шартномаларини қоғоз шаклида расмийлаштириш бекор қилинмоқда
2026 йил 1 ноябрдан истеъмолчиларга электр ва газ таъминоти хизматларини кўрсатиш шартномаларини қоғоз шаклида расмийлаштириш тартиби бекор қилинади. Барча янги шартномаларни тузиш қоғоз форматидан электрон форматга ўтказилади .
Аҳоли ва ижтимоий соҳа учун суюлтирилган газ биржадан сотиб олинади
2026 йил 1 ноябрдан бошлаб «LPG-Trade» МЧЖ («Ҳудудгазтаъминот» АЖ муассислигида ташкил этилган) аҳолига суюлтирилган газни биржа орқали сотиб олган ҳолда етказиб беради.
«Ўзбекнефтгаз» АЖ ва «Lukoil Overseas Supply and Trading Ltd» компанияси томонидан ишлаб чиқариладиган суюлтирилган газ тўлиқ ҳажмда товар-хомашё биржаларининг алоҳида савдо майдончаларига қўйилади.
Импорт қилувчи корхоналар суюлтирилган газни ихтиёрий равишда биржаларнинг алоҳида савдо майдончасида сотишлари мумкин.
Ушбу майдондан харид қилинадиган газ ҳажми аҳоли эҳтиёжлари учун етарли бўлмаса, «LPG-Trade» МЧЖ уни очиқ биржа савдолари орқали сотиб олади.
«LPG-Trade» МЧЖ ижтимоий соҳа объектлари эҳтиёжлари учун суюлтирилган газни бозор тамойиллари асосида шаклланадиган биржа нархларида етказиб беради .
Кеча-ю кундуз ишлайдиган фуд-стритларда жамоат тартибини сақлаш шартнома асосида амалга оширилади
2026 йил 1 ноябрдан бошлаб 24/7 режимида ишловчи гастрономик кўчаларда жамоат тартибини сақлаш учун ички ишлар органлари ва ҳудудий ҳокимликлар ўртасида тузиладиган шартнома асосида ППХ бўлинмалари жалб этилади .
Штат қисқартирилганда пенсиялар муддатидан олдин ва проактив тарзда тайинланади
2026 йил 1 ноябрдан иш ҳажми қисқариши ёки корхона тугатилиши муносабати билан ишсиз деб топилган шахсларга ёшга доир пенсиялар умумбелгиланган ёшдан 2 йил олдин ва проактив шаклда тайинланади.
Бунда уларга проактив шаклда тайинланган пенсияларни олишдан воз кечиш ҳуқуқи берилади .
30 ноябрда бизнесни рўйхатга олиш якунланади
Ҳукумат томонидан тасдиқланган Ўзбекистонда бизнесни рўйхатга олиш чора-тадбирлари (09.10.2026 й. 557-сон ВМҚ) тадбиркорлик субъектларини тўлиқ қамраб олиш ва статистик маълумотлар базаларини янгилашга қаратилган.
Аввалроқ аҳолини рўйхатга олишда кимлар ва қандай рўйхатга олиниши, шунингдек, олинган ҳисобот ҳолатини қандай текшириш ва хатоларни тузатиш ҳақида ёзган эдик. Бу постлар сизга фойдали бўлиши мумкин.
Агар ушбу тадбирни ўтказиш жараёнида сизда саволлар пайдо бўлса, изоҳ олиш учун учун 1851 рақамли колл-марказга мурожаат қилишингиз мумкин.
Эслатиб ўтамиз, 2026 йил ноябрь ойи учун Бош бухгалтер режаси аллақачон эълон қилинган. Солиқларни ўз вақтида тўлаш ва ҳисоботларни хатосиз топшириш учун унга қараб қўйишни унутманг.
Саида ЖАНИЗАКОВА тайёрлади
